Mika 2 - MUKANDA WA MYIDI MUKULU

Bantu badi banyanga bumfumu buabu

¹ Bantu badi bela meji butuku, badilongolola bua kuenza malu mabi, butshia baakumbaja, bualu badi ne bukole bua kuenza, mbena diakabi.

² Padibu bajinga madimi a bende, badi baangata ku bukole. Padibu balakana nzubu ya bakuabu, badi bayinyenga bantu ku bukole. Badi biba bintu bia muntu, ne bia bena diku diabu, banyenga bantu maloba abu.

³ Ke padi Maweja-Nangila wamba ne: “Ndi nnulongoluela dikenga dinene. Kanuena mua kudipanduka, kanuena mua kuditambisha kabidi, bualu diba dia dikenga dikadi difika.”

⁴ Tshikondu atshi, nebimbe musambu, nebanuelele kasala ka muadi ne; “Eyi! Mbatubutule bonsu. Mbanyenge tshisamba tshietu maloba atshi. Badi batuipata mu madimi etu, badi baabanyangana. Mbatunyenge bintu bietu bua tshinyi?”

⁵ Nanku muntu wa kunudi nansha umue, kakupeta buloba budi bantu ba Maweja-Nangila babanyangana. Kanuakupeta muaba munkatshi muabu.

Bantu badi babenga bidi muambi wamba

⁶ Bamue badi bangamba ne: “Lekela kuakula nanku! Udi ukolesha malu! Bilumbu biudi utuasa mbia patupu!

⁷ Bena Izrayele, mbabatshipe anyi? Maweja-Nangila kena ne lutulu anyi? Utu ne tshibidilu tshia kulujimija anyi?” Kadi meyi anyi adi alengelela amu bantu badi benda mu njila udi Mvidi Mukulu muanyishe.

⁸ Kadi nuenu, Maweja-Nangila udi unuambila ne: “Nudi badienza baluishi ba bambi banyi. Bantu badi benda talala mu njila, kabayi benzela bakuabu bibi, nudi nubanyenga tshinkutu tshiabu.

⁹ Nudi nuipata bakaji ba bantu banyi, mu nzubu idibu banange. Nudi nunyenga bana babu kashidi diakalenga ne lumu bimvua mubapeshe.

¹⁰ Jukayi! Umukayi! Dikisha dienu diajiki! Malu mabi anuvua benze, neanukebele makenga makole mapite!”

¹¹ Muntu kampanda neamueneke, wamba biambamba, unudinga ne: “Ndi nnumanyisha ne: nenupete mvinyo, ne maluvu makole.” Ke muambi mubule meji, udi mukumbanyine bantu aba!

Mvidi Mukulu neasangishe bena Izrayele

¹² Maweja-Nangila udi wamba ne: “Nuenu ndelanganyi ya Yakobe, nennusangishe bonsu. Nuenu badi bashale ne muoyi mu Izrayele, nennukunguje. Nennusangishe muaba umue, bu mikoku mu lupangu luayi, bu tshisumbu tshia nyama mu mpata. Nennuenze tshisumbu tshimue tshia bantu bavule.

¹³ Mvidi Mukulu udi upanda njila. Neende kumpala kuenu. Mbamane kunupikula. Nudi nudipandila njila, nupatuka, nuya! Maweja-Nangila mukalenga wenu, ke udi unulombola.”