Mika 1 - MUKANDA WA MYIDI MUKULU

¹ Telejayi bivua Maweja-Nangila muambile Mika, muena mu musoku wa Moreshete, mu tshikondu tshiwa Yotame, Akaze, ne Izkiya, bakalenga ba mu Yuda. Maweja-Nangila uvua mumuleje malu adi atangila bimenga bibidi: tshia Samariya ne tshia Yerushalayime.

Maweja-Nangila udi ufunda bantu bende ku tshilumbu

² Nuenu bisamba bionsu, telejayi. Buloba ne bionsu bidipu, teyayi matshi. Maweja-Nangila Mvidi Mukulu udi ulua kunufunda, utumina mu nzubu wende wa tshijila.

³ Maweja-Nangila udi upatuka muaba udiye musombe. Udi utuluka, wendela pa mikuna ya buloba.

⁴ Padiye upita, mikuna idi ilandakana, bibandabanda bidi bipanduluka, mudi mafuta enguluka ku kapia, mudi mayi apulumuka pa kakuna.

⁵ Maweja-Nangila udi ufika bua kulumbuluisha bantu, bualu ndelanganyi ya Yakobe ivua imutombokela, bena Izrayele benza malu mabi. Udi utombuesha bena Izrayele nnganyi? Ke Samariya, tshimenga tshiabu tshikulu! Udi usaka bena Yuda bua batendelele mvidie pa mikuna nnganyi? Ke bena Yerushalayime mene!

⁶ Maweja-Nangila udi wamba ne: “Bua malu aa, nengandamune Samariya, ashale dikolu, muaba udibu bakuna mionji ya mvinyo. Nembunguluje mabue ende, aye muinshi mua lupongu. Nemmueneshe bitaku biende patoke.

⁷ Mpingu yende yonsu nebayishimbule. Neboshe bintu bia disanka bivuaye mupete. Nentshibule mpingu ya mvidie yende yonsu bitupa, bualu uvua musumbe bintu ebi bionsu, ne makuta avuabu bamufuta mu buendenda. Bionsu abi nebabiangate, bua kufuta bena buendenda bakuabu.”

Dikenga didi dikuata Yerushalayime

⁸ Pandi ngela meji ku bionsu abi, meme Mika, ndi ngasa muadi, ndi ndila, ntua mikemu. Ndi ngenda butaka, ku makasa kutupu. Ndi ngela mikunda, bu nyama ya mibuabua, ntua mikemu ngabakana bu nyunyi ya mikolu mile.

⁹ Mituutu idibu batuuta Samariya, idi imubutula kashidi. Baluishi mbabuele ne mu ditunga dia Yuda, mbafike ku biibi bia Yerushalayime, kudi bantu banyi basombe.

¹⁰ Kanuambi bualu ebu mu tshimenga tshia Ngate, kanudidimu muadi ne diyi dikole. Mu Bete-Leyafra, nudibonde mu lupuishi, bu bantu badi mu madilu.

¹¹ Nuenu badi basombe mu Shafire, muangalayi, nunyeme ne bundu, kanuyi bia kuvuala! Badi basomba mu Saanane, kabena bakimina kupatuka mu tshimenga. Badi badila mu tshimenga tshia Bete-Eshele, bualu nansha munda mua tshimenga mudi amu njiwu.

¹² Badi basomba mu Marote, badi bazakala bua bintu biabu bidibu mua kujimija. Dikenga didi Maweja-Nangila utuma, ndifike ne ku biibi bia Yerushalayime. Nedibuele ne mu ditunga dijima dia Yuda.

¹³ Nuenu badi basomba mu Lakishe, suikayi tubalu tuenu ku matempu, nunyeme. Nudi bidikije malu mabi, avua Izrayele muenze. Ke munuvua batombuesha Yerushalayime.

¹⁴ Nanku, nudi ne bua kutapulukangana ne badi basomba mu Moreshe-Ngate. Tshimenga tshia Akzibe katshiena mua kuambuluisha kabidi bakalenga ba bena Izrayele nansha kakese.

¹⁵ Nuenu badi basomba mu Maresha, Maweja-Nangila neanufile kudi muntu mupiamupia udi unutshimuna. Bamfumu ba lumu ba mu Izrayele, nebaye kusokoma mu nyongolu wa Adulame.

¹⁶ Nuenu badi basomba mu Yerushalayime, nubeye nsuki, nukungule mu mutu, mushale dibala, bu dia mukanku. Nudile bana benu banudi bananga: bualu nebaye nabu kule mu bupika.