Marke 4 - MUKANDA WA MYIDI MUKULU

Lusumuinu lua mumiaminyi wa ntete

¹ Yezu kubanga kulongesha tshiakabidi ku dijiba dia Ngalileya. Bantu bavule kudisangisha, kumuela munkatshi. Yeye kubuela mu buatu, kusomba. Buatu buvua pa mayi, bantu bonsu bavua ku muelelu wa dijiba.

² Yezu uvua ubalongeha malu a bungi mu nsumuinu. Mu dilongesha diende uvua ubambila ne:

³ — Telejayi! Kuvua muntu muye bua kumiamina ntete.

⁴ Pavuaye umiamina ntete mu budimi buende, mikuabu kumata ku muelelu wa njila, nyunyi kufika, kuyidia.

⁵ Mikuabu kumata pa buloba bua mabue pavua kapayi buloba bua bungi. Ntete kutoloka, diakamue bu muvua buloba kabuyi bondoke.

⁶ Padi diba dibanda mulu, kuoshadi bisekiseki bivua bitoloke, kumabi bualu kabivua ne miji minene.

⁷ Ntete mikuabu kumata mu mionji ya meba. Mionji ya meba kulepa, kukulakaja bisekiseki bimpe, mushindu udibi kabiyi mua kukuama.

⁸ Kadi ntete mikuabu kumata mu buloba buimpe. Bisekiseki kutolokabi, kukola, kuela miepu: mikuabu ivua ne miepu ya ntete makumi asatu, mikuabu makumi asambombu ne minga lukama.

⁹ Yezu kuamba ne: — Udi ne matshi, asangane kumvua anyie!

Yezu udi wakula mu nsumuinu bua tshinyi?

¹⁰ Pavua Yezu mumane kushala nkayende, bantu bavua bamuele munkatshi ne balongi bende dikumi ne babidi kumulombabu bua kubumvuija nsumuinu.

¹¹ Ke Yezu kubandamuna ne: — Nuenu, Mvidi Mukulu mmunumanyishe malu masokome a Bukalenga buende. Kadi bantu bakuabu badi bumvua malu onsu aa bu badi babambilawu mu nsumuinu,

¹² bua ne: “Bajooja bimpe kabayi bamona tshintu, bateleja bilenga, kabayi bajingulula bualu, kadi bafuane mua kupingana kudi Mvidi Mukulu, Mvidi Mukulu kuvua kubafuila luse!”

Yezu udi umvuija lusumuinu lua mumiaminyi

¹³ Pashishe Yezu kubakonka ne: — Kanuena nujingulula lusumuinu elu anyi? Kadi munudi mua kujingulula nsumuinu mikuabu mbishi?

¹⁴ Mumiaminyi udi umiamina muaku wa Mvidi Mukulu.

¹⁵ Bantu bakuabu mbafuanangane ne ku mielelu ya njila, muaba uvua muaku mumatshile: diakamue padibu baumvua, diabolu udi ufika, umusha muaku uvuabu bamiamina munda muabu.

¹⁶ Bantu bakuabu bidi mumue ne ntete ivua imata mu buloba bua mabue. Padibu bumvua muaku ewu, badi bawitaba ne disanka.

¹⁷ Kadi kabena baushindamija munda muabu. Badi baulama amu tshitupa tshipi. Padi ntatu ibakuata, nansha babakengesha bua muaku wa Mvidi Mukulu, badi bajimija ditaba diabu lukasa.

¹⁸ Bantu bakuabu, mmumue ne ntete idibu bamiamina mu mionji ya meba: bobu badi bumvua muaku,

¹⁹ kadi disumpakana dia malu a panu, lukuka lua biuma ne majinga makuabu, bidi bibabuela munda, bikutakaja muaku, badi bapanga mua kukuama bimuma.

²⁰ Kadi bantu bakuabu mbafuanangane ne ntete idibu bamiamina mu buloba buimpe. Ke badi bumvua muaku, bawitaba, bakuama bimuma bamue makumi asatu, bakuabu makumi asambombu banga lukama.

Lusumuinu lua muinda

²¹ Pashishe Yezu kubakonka ne: — Muntu udi wangata muinda bua kuuteka muinshi mua kapanza nansha mua bulalu anyi? Kena uuteka pa tshitekelu tshia muinda anyi?

²² Bualu buonsu bua mu musokoku, nebumanyike patoke. Kabidi tshionsu tshidi tshisokoka netshimanyike, batshipatule patoke.

²³ Nenuikale ne ntema, muena matshi a kumvua asangana kumvua anyie!

²⁴ Yezu kubambila kabidi ne: — Nuadimuka panudi numvua bualu! Mvidi Mukulu neanupime ne tshipimu tshinudi nupima natshi bakuabu, nebanusakidile tshikuabu kabidi.

²⁵ Bualu muntu udi ne tshintu, neapete bipite, kadi udi kayi ne tshintu nebamunyenge ne tshikese tshidiye utekemena ne: ndi natshi.

Lusumuinu lua lutete lua tshidimenena

²⁶ Yezu kubambila kabidi ne: — Telejayi, Bukalenga bua Mvidi Mukulu mbufuanangane ne muntu udi umiamina ntete mu budimi buende.

²⁷ Pashishe udi ulala tulu butuku bujima, kabidi ujuka dituku dionsu, kadi ntete musangu awu idi imena, ikola yeye kayi umanya mudibi bienzeka.

²⁸ Buloba nkayabu ke budi bumenesha lutete: kumpala muonji wa lutete udi wanji kupatuka, pashishe muepu, ku ndekelu ntete imueneka ku muepu.

²⁹ Padi ntete ipia, muntu udi utuadija kunowa ne muele, bualu tshikondu tshia kupola ntshimane kufika.

Lusumuinu lua lutete lua mutshi wa lusanga

³⁰ Yezu kuamba ne: — Tudi mua kufuanyikija Bukalenga bua Mvidi Mukulu ne tshinyi? Tudi mua kubuamba bufuanangane ne lusumuinu kaayi?

³¹ Budi bufuanangane ne lutete lua mutshi wa lusanga, padibu balukuna mu buloba, ludi lupite bukese ku ntete yonsu ya biakudia.

³² Bobu bamane kulukuna, ludi lulepa, lukola lupita mitshi yonsu. Ludi luela matamba manene adi nyunyi ilua kuibakila masua ayi mu dileji diawu.

³³ Yezu uvua ulongeshila bantu mu nsumuinu ya bungi ya mushindu ewu. Uvua ubalongesha mushindu udibu mua kumvua.

³⁴ Uvua wakula nabu mu nsumuinu. Kavua uyukila nabu kayi wela nsumuinu. Kadi patataye ushala nkayende ne balongi bende, uvua ubumvuija bionsu.

Yezu udi ubatamija tshipepele pa mayi

³⁵ Dilolu dia dituku adi, Yezu kuambila; balongi bende ne: — Tusabukayi dia muamua dia dijiba.

³⁶ Kumukabu pavua bantu. Balongi kubuela mu buatu buvua Yezu mumane kubuela, kuyabu nende. Matu makuabu avua pamue nende.

³⁷ Tshipepele tshikole kutuuta. Mavuala kudiela mu buatu, buatu buvua buenda buwule tente ne mayi.

³⁸ Yezu uvua musombele ku muelelu kua buatu, mulale tulu, muteka mutu pa musamu. Balongi bende kumubisha ku tulu, bamba ne: — Mulongeshi, tudi mua kufua, wewe kuena umona bu bualu anyi?

³⁹ Yezu utabuluka, kukanyinaye bikole tshipepele, kuambilaye mayi a dijiba ne: — Puwa! Batanta! Tshipepele kutuya, bionsu kubalama menemene.

⁴⁰ Pashishe Yezu kubakonka ne: — Nudi ne bowa nenku bua tshinyi? Kanuena ne ditaba anyi?

⁴¹ Kadi batua ne bowa bukole. Bavua bakonkangana ne: — Muntu udi tshipepele nansha mayi a dijiba bitumikile nenku nnganyi?