Luke 9 - MUKANDA WA MYIDI MUKULU

Yezu udi utuma bapostolu bende ku mudimu

¹ Yezu kusangisha balongi bende dikumi ne babidi, kubapa bukole ne bumfumu bua kuipata mikishi mibi yonsu, ne bua kujikija masama a bantu.

² Kubatumaye bua baye kulongesha malu a Bukalenga bua Mvidi Mukulu, ne bua bajikijile babeedi masama.

³ Kubambilaye ne: — Kanuyi ne tshintu mu njila, nansha dikombu dia luendu, nansha tshibuta, nansha diampa, nansha makuta. Muntu kikadi ne bilamba bia pambidi bibidi to.

⁴ Muaba onsu wanuakidilabu, nusombe mu nzubu umue awu, too ne diba dinudi numuka mu musoku awu.

⁵ Kadi muaba wabenga bantu kunuakidila, numuke mu musoku awu, nututule lupuishi lua ku makasa enu, bua lushale kubavuluija tshiyuabu benze.

⁶ Balongi kumuka, kuya mu misoku yonsu, kumanyisha bantu Lumu lua Disanka, kujikijila kabidi babeedi masama miaba yonsu.

Erode udi upampakana

⁷ Ke Erode, mukalenga wa buloba abu, kumvua malu onsu avua menzeke. Kavua mumanye tshia kuenza, bualu bamue bantu bavua bamba ne: — Yowanane-Batiste mmubiike ku lufu.

⁸ Bakuabu bavua bamba ne: — Ke Eliya udi mutumuenekele. Banga bavua bamba ne: — Umue wa ku bambi ba kale mmubiike ku lufu.

⁹ Kadi Erode kuamba ne: — Mvua mukoseshe Yowanane mutu. Kadi muntu udi wenza malu andi ngumvua bayukila aa nnganyi? Uvua ujinga kumonangana ne Yezu.

Yezu udi udisha bantu binunu bitanu

¹⁰ Bapostolu ba Yezu kupingana kudiye, bamuambila bionsu bivuabu benze. Yezu kubangata, kuya nabu pa nkayabu pabuipi ne tshimenga tshia Betsayida.

¹¹ Kadi bantu kumanya bualu, kulonda Yezu. Ke Yezu kubakidila, kubalongesha malu a Bukalenga bua Mvidi Mukulu, kujikija masama a bavua nawu.

¹² Pakavua diba dibuela, balongi dikumi ne babidi kuya kudi Yezu, bamuambila ne: — Tangalaja bantu aba, baye mu misoku, nansha mu miaba mikuabu ya pabuipi, bakebe biakudia, ne muaba wa kulala, bualu tudi mu mpata.

¹³ Kadi Yezu kubandamuna ne: — Nuenu mene nubapeshe biakudia. Balongi kumuandamuna ne: — Tudi amu ne mampa atanu ne mishipa ibidi. Kadi udi musue tuye kusumbila bantu bonsu aba biakudia anyi?

¹⁴ (Bualu muaba awu bantu balume bavua bu binunu bitanu.) Ke Yezu kuambila balongi bende ne: — Nubambile basombe panshi. Ku tshisumbu tshionsu kuikale bantu bu makumi atanu.

¹⁵ Balongi kuitaba, kusombesha bantu bonsu panshi.

¹⁶ Yezu kuangata mampa atanu ne mishipa ibidi, kutangila mulu, kuela Mvidi Mukulu tuasakidila bua biakudia abi. Kubikosololaye, kutapa balongi, bua babiabanyine bantu.

¹⁷ Bonsu bavua badia, buukuta. Balongi kukunguja bivua bishale mu bibondu dikumi ne bibidi tente.

Petro udi wamba patoke ne: Yezu udi Kristu

¹⁸ Dimue dituku Yezu uvua utendelela nkayende. Balongi bende kuya kudiye. Yezu kubakonka ne: — Bantu badi bangamba ne: ndi nganyi?

¹⁹ Kumuandamunabu ne: — Bakuabu badi bakuamba ne: udi Yowanane-Batiste. Banga badi bamba ne: udi Eliya. Bakuabu kabidi ne: udi umue wa ku bambi ba kale, mubiike ku lufu.

²⁰ Ke Yezu kubakonka ne: — Kadi nuenu nudi nungamba ne: ndi nganyi? Ke Petro kumuandamuna ne: — Wewe udi Kristu, Musungidi wetu, uvua Mvidi Mukulu mutulaye.

Yezu udi umanyisha bantu lufu ne dibika diende

²¹ Yezu uvua mukandike balongi bikole, bua kabambidi muntu nansha umue bualu ebu.

²² Kubambilaye kabidi ne: — Muana wa muntu neakenge bikole. Bakulu, batuangaji banene, ne balongeshi ba mikenji, nebamubenge, bamushipe. Kadi dituku disatu neabike ku lufu.

²³ Kubambilaye kabidi bonsu ne: — Padi muntu musue kuya nanyi, kakebi amu bidi bimulengelela yeye. Ambule mutshi mutshiamakane ku dituku ku dituku, andonde.

²⁴ Bualu muntu udi musue kusungila muoyi wende, neaujimije. Kadi wajimija muoyi wende bualu buanyi, neausungile.

²⁵ Muntu nansha yeye mupete buloba bujima, bidi mua kumuenzela tshinyi padiye udijimija, nansha udibutula.

²⁶ Pikala muntu umfua meme bundu, ubenga kuitaba patoke miaku yanyi, Muana wa muntu neamufue kabidi bundu, paluaye mu butumbi buende, ne mu butumbi bua Tatu, ne bua batumibue bende ba tshijila.

²⁷ Ndi nnujadikila bulelela ne: bakuabu badi muaba ewu nebamone Bukalenga bua Mvidi Mukulu, kabayi banji kufua.

Balongi basatu badi bamona butumbi bua Yezu

²⁸ Yezu mumane kuamba malu onsu aa, kupita lumingu, kuangataye Petro, Yowanane ne Yakobe, kubanda nabu ku mukuna bua kutendelela Mvidi Mukulu.

²⁹ Patshivuaye utendelela, mpala wende kuandamuka, bilamba kukenka bikole, bibalakana.

³⁰ Diakamue bantu babidi kumueneka muaba uvua Yezu, bayukila nende. Bavua Moshe ne Eliya,

³¹ bamuenekela mu butumbi bua mu diulu. Bavua bayukila ne Yezu mushindu uvuaye ne bua kutuila mu Yerushalayime, kukumbaja bivua Mvidi Mukulu musue.

³² Petro ne binende bavua bapita ku tulu. Kadi bapapuka ku tulu, kumonabu butumbi bua Yezu, ne bantu babidi bavuaye nabu.

³³ Pakavua bantu aba bumuka kudi Yezu, ke Petro kumuambila ne: — Mfumu, tudi ne disanka patudi tusomba apa. Nanku netuase tuzubu tua ntente tusatu, kamue kebe, kakuabu ka Moshe, kisatu ka Eliya. (Kavua mumanye tshivuaye wamba.)

³⁴ Patshivuaye wakula, divuba kumueneka, kubabuikila ne mundidimbi wadi. Balongi kukuatshika bowa.

³⁵ Diyi kumvuika ku divuba, diamba ne: — Ewu mmuananyi umvua musungule, numuteleje!

³⁶ Diyi dimane kumvuika, balongi kumona amu Yezu nkayende. Kadi bobu kupuwa ne bualu abu. Tshikondu atshi ki mbalondele muntu mukuabu bivuabu bamone nansha.

Muana muena tshiseke

³⁷ Butshia nenku, Yezu ne balongi bende kutuluka ku mukuna. Bantu ba bungi bavua bafika bua kusambakena nende.

³⁸ Muntu kampanda kuela mbila munkatshi muabu, wamba ne: — Mulongeshi, ndi nkusengelela ne: tangila muananyi wa balume. Ndi amu ne muana umue epele!

³⁹ Mukishi udi umukuata, umuelesha mbila tshimpitshimpi, umunyukula bikole, umupatuisha ntutu ku mishiku. Nanku udi umukengesha, kauyi musue kumushila muaba lukasa.

⁴⁰ Mvua musengelele balongi bebe bua bipate mukishi awu, kadi bakapangila bualu!

⁴¹ Yezu kubandamuna ne: — Nudi bantu babi! Ditaba kanuena nadi! Ndi ne bua kushala kabidi nenu matuku bungi munyi? Nendengulule malu enu too ne ku diba kaayi? Luaku ne muanebe apa.

⁴² Muana ufika, mukishi kumuela panshi, kumunyukula bikole. Kadi Yezu kukanyina mukishi mubi bikole, kujikija disama dia muana, kumupingaja kudi tatuende.

⁴³ Bantu bonsu bavua bakema bukole budi Mvidi Mukulu nabu. Patshivua bantu bonsu bakema bionsu bivua Yezu muenze, kuambilaye balongi bende ne:

Yezu udi umanyisha bantu lufu luende musangu muibidi

⁴⁴ — Nuvuluke bimpe tshindi nnuambila mpindiewu ne: nebafile Muana wa muntu mu bianza bia bantu.

⁴⁵ Kadi balongi kabavua bajingulula tshi-vuaye muambe to. Bavua babasokoka malu aa bua kabumvu bimpe. Bavua batshina kabidi kukonka Yezu bualu ebu.

Udi mupite bakuabu nnganyi?

⁴⁶ Balongi bavua belangana mpata munkatshi muabu bua kumanya ne: wa kutudi udi mupite bakuabu nnganyi?

⁴⁷ Yezu kumanya mpata ivuabu bela. Nanku kuangataye muana, kumuimanyika pabuipi nende,

⁴⁸ ubambila ne: — Muntu udi wakidila muana ewu mu dina dianyi, mmungakidile meme mene. Udi ungakidila meme, udi wakidila kabidi uvua muntume. Bualu udi mushadile kunudi nuenu bonsu, ke udi mupite bonsu mene.

Udi kayi unubenga, ke wenu!

⁴⁹ Yowanane kuamba ne: — Mfumu, tuvua bamone muntu wipata mikishi mibi mu dina diebe. Tuvua bamukandike, bualu ki ngwa ku tshisumbu tshietu to.

⁵⁰ Kadi Yezu kumuandamuna ne: — Kanumukandiki nansha, bualu udi kayi unubenga, ke wenu!

Bena Samariya badi babenga kuakidila Yezu

⁵¹ Matuku avuabu ne bua kuya ne Yezu mu diulu akavua pabuipi. Ke Yezu kushindika bua kuya ku Yerushalayime.

⁵² Kutumaye bantu kumpala kuende. Kuyabu mu musoku wa bena Samariya, bua kumukebelamu muaba wa kulala.

⁵³ Kadi bantu aba bakabenga kuakidila Yezu, bualu uvua uya mu Yerushalayime.

⁵⁴ Balongi bende Yakobe ne Yowanane bamona nanku, kuambabu ne: — Mfumu, udi musue tutume diyi mu diulu, kapia kapueke, kababutule anyi?

⁵⁵ Yezu kubatangila, kubatandisha.

⁵⁶ Nanku kuyabu mu musoku mukuabu.

Badi mua kulonda Yezu mbanganyi?

⁵⁷ Pavuabu mu njila, muntu kampanda kuambila Yezu ne: — Nenkulonde kuonsu kuudi uya.

⁵⁸ Yezu kumuandamuna ne: — Nyama ya mibuabua idi ne miaba ya kulala, nyunyi ya mulu idi ne masua. Kadi Muana wa muntu kena ne muaba wa kulala, nansha wa kuikisha.

⁵⁹ Yezu kuambila muntu mukuabu ne: — Undonde meme. Kadi muntu awu kuamba ne: — Mfumu, witabe bua nganji kuya kujika tatu.

⁶⁰ Ke Yezu kumuandamuna ne: — Kuenji nanku to! Bafue bajike bafue nabu. Kadi wewe uye kulongesha malua Bukalenga bua Mvidi Mukulu.

⁶¹ Muntu mukuabu kabidi kuamba ne: — Mfumu, nenkulonde. Kadi witabe, nganji kuya kulayangana ne bena diku dietu.

⁶² Yezu kumuambila ne: — Tshidime udi ukuata lukasu mu bianza, utangila kunyima kuende, Mvidi Mukulu kena mua kukuata nende mudimu mu Bukalenga buende.