Luke 6 - MUKANDA WA MYIDI MUKULU

Yezu udi mfumu wa dituku dia Dikisha

¹ Dituku dikuabu dia dikisha, Yezu uvua ukosoluela mu madimi a ntete ya kuenza bukula. Balongi bende bavua batula miepu ya ntete, bayivinga mu bianza, badia ntete.

² Baparushe bakuabu kubakonka ne: — Nudi nuenza bualu budi mikenji yetu mikandike bua kuenza dituku dia Dikisha bua tshinyi?

³ Yezu kubandamuna ne: — Kanuena babale tshivua Davide wenza dituku divua nzala mibasume, yeye ne bantu bende, anyi?

⁴ Davide kubuela mu nzubu wa Mvidi Mukulu, kuangata mampa avuabu balambule Mvidi Mukulu, kuadia, kuapesha kabidi bantu bende. Kadi mikenji yetu idi yamba ne: mampa awu, badi mua kuadia anu kudi batuangaji nkayabu.

⁵ Yezu kubambila kabidi ne: — Muana wa muntu udi mfumu wa dituku dia Dikisha.

Muena tshianza tshifulame

⁶ Dituku dikuabu dia dikisha, Yezu mumane kubuela mu nzubu wa ditendelela wa bena Yuda, kutuadijaye kulongesha bantu. Muntu uvuamu, muikale ne tshianza tshia balume tshifulame.

⁷ Balongeshi ba mikenji ne Baparushe bavua babambisha Yezu bikole, badiebeja ne: neajikije disama dia muntu awu dituku dia Dikisha anyi? Bualu bavua bakeba mua kumufunda ne: udi wenza bibi.

⁸ Kadi Yezu uvua mumanye meji avua munda muabu. Ke kuambilaye muena tshianza tshibalame ne: — Juka, imana kuaka, bantu bonsu bakumone. Muntu awu kujuka, kuimana.

⁹ Ke Yezu kubebeja ne: — Mikenji yetu idi mianyishe dituku dia Dikisha bua tuenze bimpe anyi bibi? Bua tupandishe muntu anyi bua tumubutule?

¹⁰ Yezu kubatangila bonsu. Ke kuambilaye muntu awu ne: — Olola tshianza tshiebe! Kutshiololaye. Tshianza tshiende kuakana.

¹¹ Kadi baluishi ba Yezu bavua bafika munda bikole, bebejangana tshiyuabu mua kuenzela Yezu.

Yezu udi usungula balongi bende

¹² Tshikondu atshi Yezu uvua mubande ku mukuna bua kutendelela. Uvua mushaleku butuku bujima, utendelela Mvidi Mukulu.

¹³ Butshia kubikilaye balongi bende. Kusungulaye munkatshi muabu dikumi ne babidi, kubinyikaye ne: mbapostolu.

¹⁴ Ke Simone (uvuaye muinyike kabidi dina dia Petro), ne muanabu Andre, Yakobe ne Yowanane, Filipe ne Bartolmayi,

¹⁵ Matayi ne Tomase, Yakobe muana wa Alfayi, ne Simone (uvua mu tshisumbu tshia baluidi ba ditunga),

¹⁶ Yudase muana wa Yakobe, ne Yudase Iskariyote uvuile kupangila Yezu.

Yezu udi ulongesha bantu, ujikija masama abu

¹⁷ Yezu kupueka ne bapostolu bende pa mukuna, kuimana pa muaba mutentema. Balongi bende bakuabu ba bungi bavua muaba awu. Muvua kabidi tshisumbu tshinene tshia bantu ba mu misoku yonsu ya mu ditunga dia Yudeya, ba mu Yerushalayime, ne ba mu Tire ne Sidone, bimenga bia ku muelelu wa mayi manene.

¹⁸ Bavua bafika bua kumvua dilongesha dia Yezu, ne bua ajikije masama abu. Bavua ne mikishi mibi ibakengesha, bavua bapanda.

¹⁹ Bantu bonsu bavua bakeba kumulenga, bualu bukole buvua bufuma kudiye, bubapandisha bonsu.

Bena diakalenga ne bena diakabi

²⁰ Ke Yezu kutangila balongi bende, ubambila ne: “Nuenu bapele nudi bena diakalenga, bualu nenuikale ne Mvidi Mukulu mu Bukalenga bupiabupia!

²¹ “Nuenu badi ne nzala mpindiewu, nudi bena diakalenga, bualu Mvidi Mukulu neanudishe, nuukute! “Nuenu badi badila mpindiewu, nudi bena diakalenga, bualu nenuseke!

²² “Padi bantu banukina, banubenga, banupenda, banupenda bualu bua Muana wa muntu, nudi bena diakalenga.

²³ Nusanke dituku adi, nutue tshianga, bualu difutu dinene ndinuindile mu diulu. Ke muvua bankambua bakengesha bambi nanku.

²⁴ “Kadi nuenu babanji, nudi bena diakabi, bualu nukadi bamane kupeta diakalenga dienu!

²⁵ “Nuenu badi ne bintu bionsu mpindiewu, nudi bena diakabi, bualu nenufue ne nzala! “Nuenu badi baseka mpindiewu, nudi bena diakabi, bualu nenubungame, nudile!

²⁶ “Padi bantu bonsu banutumbisha, nudi bena diakabi, bualu ke muvua bankambua babu benzela bambi ba dishima nanku!”

Nunange bena lukuna

²⁷ “Kadi nuenu badi banteleja, ndi nnuambila ne: nangayi bena lukuna benu; enzelayi badi banukina bimpe.

²⁸ Badi banuela mulawu, nubajingile diakalenga. Badi banukengesha, nubalombele kudi Mvidi Mukulu.

²⁹ Pikala muntu mukukume dipi ku ditama, umuleje ditama dikuabu. Pikala muntu ukunyenga tshinkutu tshiebe, umupeshe kabidi ne tshilamba tshia pambidi.

³⁰ Muntu yonsu udi ukulomba tshintu, umupeshe. Pikala muntu muangate tshintu tshiebe, kutshinanyi nansha.

³¹ Enzelayi bantu bakuabu anu binudi basue bua banuenzele nuenu mene.

³² “Panudi nunanga anu badi banunanga, munuapeta difutu dia pa buadi mmunyi? Nansha benji ba malu mabi badi bananga badi babananga.

³³ Panudi nuenzelangana bimpe anu ne badi banuenzela bimpe, munuapeta difutu dia pa buadi mmunyi? Nansha benji ba malu mabi badi benza kabidi nanku!

³⁴ Panudi nusombesha anu banudi batekemena se: nebatupingajilebi, nudi mua kutekemena difutu dia pa buadi bishi? Benji ba malu mabi badi basombesha kabidi benji ba malu mabi, bua babapingajile bia momumue.

³⁵ Kadi nangayi bena lukuna benu, benzelayi bimpe. Sombeshayi bantu bintu, kanuyi nutekemena ne: nebatupingajilebi. Nanku nenupete difutu dinene. Nenuikale bana ba Mvidi Mukulu Muena kulu. Bualu Yeye udi wenzela bena kadiwu, ne bantu babi, bimpe.

³⁶ Ikalayi ne luse luvule, bu mudi Tatuenu ne luse luvule.

Kanutangidi bantu bakuabu bu bantu babi

³⁷ “Kanutangidi bantu bakuabu bu bantu babi, bua Mvidi Mukulu kanutangidi nuenu kabidi nanku. Kanudiwulu bakuabu, bua Mvidi Mukulu kanudiwulu nuenu kabidi. Nu-mvuilangane luse, nanku Mvidi Mukulu neanumvuile kabidi luse.

³⁸ Nupeshe bakuabu bintu, nanku Mvidi Mukulu neanupeshe kabidi. Nebanuelele pa tshilamba bintu bipima bimpe, bishindika, bisekenkeja, biya ne panshi. Nuenzele bantu bimpe ne muoyi wa kalolu. Nanku Mvidi Mukulu neanupe mapa ende ne muoyi wa momumue.”

³⁹ Yezu kubelela kabidi lusumuinu ne: “Mpofu udi mua kulombola mpofu nende anyi? Nansha kakese! Padi mpofu ulombola mpofu nende, bonsu babidi nebadishinde mu tshina.

⁴⁰ Mulongi nansha umue kena mua kupita mulongeshi wende. Kadi mulongi yonsu udi mulonge bimpe, mujikije, neafuane mulongeshi wende.

⁴¹ “Udi utangila anu kasosa kadi mu disu dia muanenu, kuyi utangila mutshi munene udi mu disu diebe bua tshinyi?

⁴² mMunyi muudi mua kuambila muanenu ne: ‘Muanetu, semena, nkumushe kasosa mu disu,’ kuyi umona mutshi munene udi mu diebe? Wewe muena mpala ibidi, bangabanga umushe mutshi munene udi mu disu diebe. Nanku neumone bimpe bua kumusha kasosa kadi mu disu dia muanenu.”

Mutshi ne bimuma biawu

⁴³ “Mutshi muimpe kawena ukuama bimuma bibi. Mutshi mubi kawena ukuama bimuma bimpe.

⁴⁴ Mutshi onsu badi baumanyina ku bimuma biawu. Kabena bapola bimuma bia mfiku ku muonji wa meba, nansha tumuma tua nwinyo ku mingonga.

⁴⁵ Muntu muimpe udi wenza malu mimpe, bualu muoyi wende udi muimpe. Muntu mubi udi wenza amu malu mabi, bualu munda muende mudi mubi. Bualu mukana mua muntu mudi muamba anu malu adi muwule munda muende.”

Lusumuinu lua bibaki babidi

⁴⁶ “Nudi numbikila ‘Mfumu, Mfumu,’ kanuyi nuenza mundi munuambile bua tshinyi?

⁴⁷ Muntu yonsu udi uvua kundi, uteleja miaku yanyi, uyikumbaja, nennuleje udiye mufuanangane nende.

⁴⁸ Udi ufuanangana ne muntu uvua mutuadije kuibaka nzubu. Uvua mumbule mukidi muondoke, muibake tshitaku tshia nzubu pa mabue. Pavua mayi a misulu uwula, apasalala, atuuta ku nzubu, kaavua amunyungisha nansha. Bualu nzubu uvua muibaka bimpe.

⁴⁹ Kadi muntu yonsu udi uteleja miaku yanyi, kayi uyikumbaja, udi ufuanangana ne muntu udi wibaka nzubu wende pa buloba, kayi tshitaku. Padi mayi a musulu atuuta ku nzubu awu, nzubu udi wupuka diakamue, ubutuka yonsu butubutu.”