Luke 5 - MUKANDA WA MYIDI MUKULU

Yezu udi ubikila balongi bende

¹ Dituku dikuabu, Yezu uvua ku muelelu wa dijiba dia Ngenesarete. Bantu bavua bamunguila bua kuteleja muaku wa Mvidi Mukulu.

² Yezu kumona matu abidi ku muelelu wa dijiba. Balobi bavua batuluke, basukula makondu abu.

³ Yezu kubuela mu buatu bukuabu buvua bua Simone. Kumulombaye ne: “Semena kakese ne buatu mu mayi.” Ke Yezu kusomba mu buatu amu, ulongesha bantu.

⁴ Yeye mumane kulongesha nanku, kuambilaye Simone ne: — Semeja buatu kumpala, muaba udi mayi mondoke. Pashishe wewe ne balobi nebe, nuele makondu mu mayi bua kuloba.

⁵ Simone kumuandamuna ne: — Mukalenga, tudi balobe butuku bujima. Katuena bakuate kantu to. Kadi bu muudi ungambila bua meme kuenza, nengele makondu.

⁶ Nanku kuelabu makondu. Ke kukuatabu mishipa mipite bungi, makondu atuadija kupandika.

⁷ Kubikilabu balobi nabu bavua mu buatu bukuabu bua babambuluishe. Abu bafika, kuwujabu matu abidi tente ne mishipa ya bungi, matu akeba kudina mu mayi.

⁸ Simone Petro umona nanku, kutuaye binu kumpala kua Yezu, wamba ne: — Mfumu, umuka kundi. Ndi muena malu mabi.

⁹ Bualu Petro ne bonsu bavuaye nabu bavua ne bowa bua bungi, bua mishipa mivule ivuabu bakuate.

¹⁰ Yakobe ne Yowanane, bana ba Zebede, bavua bakuata mudimu ne Simone, bavua kabidi ne bowa. Kadi Yezu kuambila Simone ne: — Kutshinyi to. Biangatshile ku mpindiewu, newikale tshilembi tshia bantu.

¹¹ Nanku kukokabu matu ku mukuna, kushiyabu bionsu, kulondabu Yezu.

Yezu udi ujikija nsudi ya muntu

¹² Pavua Yezu mu tshimenga kampanda, muena nsudi kufika kudiye. Umona amu Yezu, kutuaye mpala panshi kumpala kuende, umusengelela ne: — Mfumu, bu wewe musue, unjikije disama.

¹³ Yezu kuolola tshianza, kumulenga, wamba ne: — Ndi musue, mubidi webe wakane! Diakamue nsudi kujika pambidi pa muntu awu.

¹⁴ Ke Yezu kumukandika ne: — Kuena mua kuambila muntu bualu ebu to! Kadi uye kudi mutuangaji bua akukenkete. Pashishe ulambule mulambu wa kudikobolola uvua Moshe mufunde, bua bantu bonsu bajadike ne: ukadi mupande.

¹⁵ Nanku lumu lua Yezu kutangalaka. Bantu ba bungi bavua bamunguila bua kumuteleja, ne bua ajikije masama abu.

¹⁶ Kadi Yezu uvua uya miaba mipengame bua kutendelela Mvidi Mukulu.

Yezu udi ujikija disama dia tuneke

¹⁷ Dituku dikuabu Yezu uvua ulongesha. Baparushe ne balongeshi ba mikenji bavua basomba pavuaye. Bavua bafume ku misoku yonsu ya mu Ngalileya, ya mu Yudeya, ne ku tshimenga tshia Yerushalayime. Yezu uvua ne bukole bua kudi Maweja-Nangila, buvuaye ujikija nabu masama a bantu.

¹⁸ Bantu bakuabu kufika kudiye, bambule muena tuneke. Bavua bakeba pa kumubuejila mu nzubu, kumuteka kumpala kua Yezu.

¹⁹ Kadi bua bungi bua bantu kabavua bamona pa kumubuejila. Nanku kumubandishilabu mu musonga wa nzubu. Kumushabu mampana makuabu. Kumupuekeshilabu mu bulalu buende munkatshi mua bantu kumpala kua Yezu.

²⁰ Yezu umona ditaba dia bantu abu, kuambilaye mubeedi ne: — Muanetu, mibi yebe mmimane kujimina.

²¹ Ke balongeshi ba mikenji ne Baparushe kuela meji ne: — Ewu muntu udi usendeka Mvidi Mukulu nenku nnganyi? Udi mua kujimija bubi nnganyi? Se amu Mvidi Mukulu nkayende!

²² Yezu kumanya meji avuabu bela. Kubakonkaye ne: — Nudi ne meji a mushindu ewu bua tshinyi?

²³ Tshidi tshitekete ntshinyi? Nkuamba ne: “Mibi yebe mmimane kujimina,” anyi nkuamba ne: “Juka, enda?”

²⁴ Kadi ndi musue numanye ne: Muana wa muntu udi ne bukole bua kujimija mibi pa buloba. Nanku kuambilaye muena tuneke ne: — Ndi nkutumina diyi ne: juka, ambula bulalu buebe, upingane kuebe!

²⁵ Diakamue muntu awu kujuka, bantu bonsu batangile. Kuambulaye bulalu buvuabu bamuladike. Kupinganaye kuende, wenda utumbisha Mvidi Mukulu.

²⁶ Bantu bonsu kukema. Bavua batumbisha Mvidi Mukulu, bikale ne bowa bua bungi, bamba ne: — Lelu tudi bamone malu a dikema!

Yezu udi ubikila Levi (Mat 9.9-13; Mar 2.13-17)

²⁷ Ke Yezu kupatuka, kumona mulambuishi wa bitadi musombe mu nzubu wende wa mudimu, dina diende Levi. Yezu kumubikila ne: — Undonde!

²⁸ Levi kujuka, kushiya bionsu, kulonda Yezu.

²⁹ Ke Levi kulongoluela Yezu didia dinene mu nzubu muende. Balambuishi ba bitadi bavule ne bantu bakuabu bavua nabu mu didia adi.

³⁰ Baparushe ne balongeshi ba mikenji ba mu tshisumbu tshiabu kubinduluka, bakonka balongi ba Yezu ne: — Nuenu nudi nudia, nunua ne balambuishi, kabidi ne bantu bakuabu ba lumu lubi, bua tshinyi?

³¹ Yezu kubandamuna ne: — Bantu badi ne bukole bua mubidi, kabena bakengela munganga to. Anu badi basama, ke badi bamukengela.

³² Tshiena muvue kubikila bantu ba nsongu, kadi anu bantu babi, bua balengeje nsombelu yabu.

Badi bakonka Yezu bua dijila dia biakudia

³³ Bantu kuamba Yezu ne: — Balongi ba Yowanane badi bajila biakudia misangu ne misangu, batendelela kabidi Mvidi Mukulu. Balongi ba Baparushe badi benza bia momumue. Kadi balongi bebe wewe badi anu badia, banua.

³⁴ Yezu kubakonka ne: — Bantu badibu babikila mu didia dia dibaka, nudi mua kubabambidika bua bajile biakudia, muena dibaka mutshikale nabu anyi? Kanuena mua kuenza nanku to!

³⁵ Kadi tshikondu netshilue tshiumushabu muena dibaka. Diba adi nebajile biakudia.

³⁶ Yezu kubelela kabidi lusumuinu elu ne: — Muntu kena mua kupanda tshilamba tshipiatshipia, bua kuangata tshitetela, kutshiasa ku tshilamba tshikulukulu. Bualu yeye muenze nanku, udi unyanga tshilamba tshipiatshipia. Kabidi tshitetela tshipiatshipia katshiena tshiumvuangana ne tshilamba tshikulukulu.

³⁷ Muntu kena wela nwinyo mupiamupia mu milondu ya biseba bia kale. Bualu yeye muenze nanku, nwinyo mupiamupia neapande milondu ya biseba bia kale, nwinyo upumuka panshi, milondu inyanguka.

³⁸ Kadi mbimpe kuela nwinyo mupiamupia mu milondu ya biseba bipiabipia.

³⁹ Muntu kena mua kusanka bua kunua nwinyo mupiamupia, yeye mumane kunua wa kale. Bualu bantu badi bamba ne: “Mvinyo wa kale ke udi muimpe.”