Luke 18 - MUKANDA WA MYIDI MUKULU

Lusumuinu lua mukaji mukamba ne mukoshi wa nsambu

¹ Pashishe bua kulongesha balongi bende mudibu ne bua kutendelela diba dionsu, kabayi batekesha mu maboku, Yezu kubelela lusumuinu ne:

² — Mu tshimenga kampanda muvua mukoshi wa nsambu. Kavua utshina Mvidi Mukulu, kavua unemeka muntu nansha umue.

³ Mu tshimenga atshi muvua kabidi mukaji mukamba. Uvua uya kudi mukoshi wa nsambu misangu ne misangu, umulomba ne: “Unkosele tshilumbu tshianyi amu pa tshiotshi ne muena lukuna wanyi.”

⁴ Mukoshi wa nsambu kubenga matuku a bungi. Kadi pashishe kudielaye meji ne: “Nansha meme tshiyi ntshina Mvidi Mukulu, tshiyi nnemeka bantu,

⁵ kadi bu mudi mukaji mukamba ewu unsuya, nenkose tshilumbu tshiende mudi tshi. Patupu neansuye misangu yonsu, bifuane wangela nzadi mu mesu.”

⁶ Ke Mfumu kuamba kabidi ne: — Telejayi tshidi mukoshi wa nsambu mubi ewu wamba!

⁷ Kadi Mvidi Mukulu kakukosa nsambu ya bena diende badi bamubila munya ne butuku pa yoyi anyi? Kakubambuluisha pa lukasa anyi?

⁸ Ndi nnujadikila ne: neakose nsambu yabu lukasa amu pa yoyi. Kadi pafika Muana wa muntu, neasangane bantu ne ditaba pa buloba anyi?

Lusumuinu lua Muparushe ne mulambuishi wa bitadi

⁹ Bantu bavua badifunyisha ne: tudi bakane ku mesu a Mvidi Mukulu, bapepeja kabidi bantu bakuabu, Yezu kubelela lusumuinu ne:

¹⁰ — Bantu babidi bavua babuela mu nzubu wa Mvidi mukulu bua kutendelela. Umue uvua Muparushe, mukuabu mulambuishi wa bitadi.

¹¹ Muparushe uvua muimane kulu, utendelela, wamba mundamunda muende ne: “Mvidi Mukulu wanyi, ndi nkuela tuasakidila, bualu tshiena bu bantu bakuabu. Bonsu badi amu biba, bakengesha bantu, babuelela bakaji ba bende mu nzubu. Ndi nkuela tuasakidila nangananga, bualu tshiena bu mulambuishi wa bitadi wawa.

¹² Meme ndi njila biakudia matuku abidi ku lumingu, nkulambula tshia dikumi tshia bintu bionsu bindi mpeta.”

¹³ Mulambuishi wa bitadi uvua muimane yeye pa bule, kayi nansha ukimina kutangila mu diulu. Kadi uvua udituuta pa tshiadi, wamba ne: “Eyi, Mvidi Mukulu wanyi, ungumvuileku luse. Meme ndi muenji wa malu mabi.”

¹⁴ Ndi nnujadikila ne: muntu ewu mmupingane kuende, mutokela Mvidi Mukulu ku muoyi, kadi mukuabu awu to. Bualu muntu yonsu udi uditambisha, nebamupuekeshe. Kadi yonsu udi ndipuekesha, neapete lumu.

Yezu ne bana batekete

¹⁵ Bantu kufika kudi Yezu ne bana, ne ba mu diboku, bua abatenteke bianza. Balongi bende babamona, kubatandishabu.

¹⁶ Kadi Yezu kubikila bana kudiye, wamba ne: — Lekelayi bana! Bafike kundi! Kanubakandiki! Bualu Bukalenga bua Mvidi Mukulu mbua badi bu bana.

¹⁷ Ndi nnujadikila bulelela ne: udi kayi wanyisha bukalenga bua Mvidi Mukulu bu muana, kakubuelamu to.

Nsongalume muena mpetu

¹⁸ Muntu munene wa bena Yuda kukonka Yezu ne: — Mulongeshi muimpe, bua meme kupeta muoyi wa kashidi ngenze tshinyi?

¹⁹ Yezu kumukonka ne: — Udi umbikila muimpe bua tshinyi? Kakuena muntu udi muimpe, amu Mvidi Mukulu nkayende.

²⁰ Udi mumanye meyi ne mikandu: “Kubueledi mukaji wa bende mu nzubu, kushipi muntu, kuibi, kushiminyinyi muntu bualu, unemeke tatuebe ne mamuebe.

²¹ Muntu awu kuandamuna ne: — Ndi mukumbaje bionsu ebi bituadije ku buana buanyi.

²² Nanku Yezu kumuambila ne: — Bualu bumue butshidi bukushale: pana bionsu biudi nabi, wabanyine bapele makuta. Nanku newikale ne bubanji mu diulu. Pashishe Ulue, undonde meme.

²³ Kadi umvua anu miaku ayi, muntu awu kubungama bikole, bualu uvua ne biuma bivule.

²⁴ Yezu umona muvuaye ubungama, kuambaye ne: — Bidi bikole bua bena biuma kubuela mu Bukalenga bua mu diulu.

²⁵ Bu mudibi bikole bua nyama wa kamelu kubuela mu disu dia kashingi, ke mudibi bikole bipite bua muena mpetu kubuela mu Bukalenga bua Mvidi Mukulu.

²⁶ Bantu bavua bamuteleja, kumukonkabu ne: — Kadi biobi bikale nanku, wapanda nnganyi?

²⁷ Yezu kuandamuna ne: — Bidi bantu kabayi mua kuenza, Mvidi Mukulu udi ubikumbaja.

²⁸ Ke Petro kuamba ne: — Udi mumanye mutudi bashiye bionsu bimvua nabi bua kukulonda.

²⁹ Ke Yezu kubambila ne: — Ndi nnujadikila bulelela ne: muntu yonsu udi mushiye nzubuende, mukajende, bana babu, baledi bende, bana bende, bualu bua Bukalenga bua Mvidi Mukulu,

³⁰ neapete mpindiewu bia bungi bipite. Matuku adi kumpala, neapete muoyi wa kashidi.

Yezu udi umanyisha musangu muisatu ne: nebanshipe, kadi nembiike ku lufu

³¹ Yezu kubikila balongi bende dikumi ne babidi, kubambila ne: — Telejayi. Tukadi tuya ku Yerushalayime. Muaba awu bionsu bivua bambi bafunde bua Muana wa muntu nebikumbane.

³² Nebamufile mu bianza bia bantu ba bisamba bikuabu. Bobu abu nebamuseke, nebamupende, nebamutuile mate pambidi.

³³ Nebamutuute mikaba, nebamushipe. Kadi dituku disatu neabike ku lufu.

³⁴ Kadi bionsu abi balongi kabavua babijungulula to. Kabavua bumvua tshivua Yezu wamba to. Miaku yende eyi ivua mibakolele.

Yezu udi ujikija muntu bumpofu buende

³⁵ Pavua Yezu usemena pabuipi ne tshimenga tshia Yeriko, kuvua mpofu musombe ku muelelu wa njila, ulomba tshia pa luse.

³⁶ Mpofu awu uvua mumvue bantu tshisumbu bapita mu njila. Kukonkaye ne: — Ebi mbinganyi?

³⁷ Kumuambilabu ne: — Ke Yezu wa mu Nazarete udi upita mu njila emu.

³⁸ Ke mpofu kuela lubila ne: — Yezu, Muana wa Davide, ungumvuileku luse!

³⁹ Bantu bavua benda kumpala kua Yezu kutandishabu mpofu bua apuwe. Kadi yeye kuela amu mbila mikole mipite ne: — Yezu, Muana wa Davide, ungumvuileku luse!

⁴⁰ Ke Yezu kuimana, kubikidisha mpofu awu. Mpofu ufika, Yezu kumukonka ne:

⁴¹ — Udi musue nkuenzele tshinyi? Ke mpofu ne: — Mfumu, ndi musue, untabeje mesu, mmone tshiakabidi.

⁴² Nanku Yezu kumuambila ne: — Mesu ebe akane tshiakabidi! Ditaba diebe ndikupandishe!

⁴³ Diakamue mpofu kumona bimpe, kulonda Yezu, wenda utumbisha Mvidi Mukulu. Bantu bonsu bavua bamona bualu ebu, kutumbishabu kabidi Mvidi Mukulu.