Luke 16 - MUKANDA WA MYIDI MUKULU

Mulami wa bintu mutalame

¹ Yezu kuambila balongi bende ne: — Muena biuma kampanda uvua ne mumulaminyi wa bintu. Bantu kuambila muena biuma ewu ne: mukulaminyi wa bintu udi utulakaja bintu biebe.

² Nanku muena biuma kubikila muntu awu, umukonka ne: “Bualu bundi ngumvua bakuamba ebu budi bishi? Badika bintu bianyi bionsu, bualu kuakundamina kabidi bintu to.”

³ Ke mulami wa bintu kudikonka nkayende ne: “Mfumuanyi wa mudimu udi unnyenga bintu bimvua mumulamine. Mpindiewu nengenze tshinyi? Tshiena ne bukole bua kudiina. Bundu budi bungenza bua kushala muena lulombu.

⁴ Eyo, ndi mumanye tshindi mua kuenza. Nanku nansha meme mumuke ku mudimu, bantu bakuabu nebangakidile ku nzubu yabu.”

⁵ Kubikidishaye ku umue ku umue bonsu bavua ne mabanza a mfumuende. Kukonkaye wa kumpala ne: “Udi ne dibanza dia mfumuanyi dia bungi munyi?”

⁶ Muena dibanza kuandamuna ne: “Dia bipanza bia mafuta a olive lukama.” Mulami wa bintu kumuambila ne: “Ke dibeji didi ne dibanza diebe. Somba panshi, funda lukasa makumi atanu.”

⁷ Pashishe mulami kukonka muntu mukuabu ne: “Kadi wewe udi ne dibanza dia bungi munyi?” Awu kuandamuna ne: “Dia bibombi bia ntete ya kuenza bukula nkama itanu. Mulami wa bintu ne: “Ke dibeji didi ne dibanza diebe edi. Funda bibombi nkama inayi.”

⁸ Ke Mfumu kutumbisha mulami wa bintu ewu, bualu mmukuate mudimu ne budimu. Bualu bantu ba panu badi badimukila binabu, bapite mudi bantu badi benda mu butoke benza.

⁹ Yezu kuamba kabidi ne: — Meme ndi nnuambila ne: kebayi munudi mua kupeta balunda ne biuma bibi bia panu. Nanku panujika bia panu, balunda aba nebanuakidile mu nzubu ya kashidi.

¹⁰ Udi ulama bintu bikese bimpe, nealame kabidi bintu bivule bimpe. Udi udinga mu bintu bikese, neadinge kabidi mu bintu bivule.

¹¹ Paudi kuyi ulama biuma bibi bia panu bimpe, udi mua kukupesha biuma bia bushuwa nnganyi?

¹² Paudi kuyi ulama bintu bia muntu mukuabu bimpe, udi mua kukupesha bintu biebe wewe nnganyi?

¹³ Muena mudimu nansha umue kena mua kuenzela bamfumu babidi mudimu. Bualu neakine ewu, anange wawa. Neajinge ewu, apepeje wawa. Kanuena mua kuenzela Mvidi Mukulu mudimu, kuenzela kabidi ne biuma musangu umue.

Malongesha mashilangane a Yezu

¹⁴ Baparushe bavua bumvua miaku yonsu eyi. Kadi kusekabu Yezu, bualu bavua bananga makuta.

¹⁵ Yezu kubambila ne: — Nuenu nudi basue kudileja bu bantu bimpe ku mesu a bakuabu. Kadi Mvidi Mukulu udi mumanye mioyi yenu. Bualu tshidi bantu bamona ne: ntshinene, katshiena ne mushinga ku mesu a Mvidi Mukulu.

¹⁶ Too ne ku tshikondu tshia Yowanane-Batiste, nuvua ne mikenji ya Moshe, kabidi ne mikanda ya bambi. Kutuadija ku Yowanane, badi balongesha Lumu lua Disanka lua Bukalenga bua Mvidi Mukulu. Muntu yonsu udi upatata bua kubuela mu Bukalenga abu.

¹⁷ Diulu ne buloba bidi mua kujimina. Kadi kalu nansha kamue kadibu bafunde mu mikenji kakena mua kujimina to.

¹⁸ Muntu yonsu udi wipata mukajende, usela mukuabu, mmunyange dibaka. Udi usela mukaji uvuabu babenga kudi bayende, udi munyange pende dibaka.

Muena biuma ne Lazare

¹⁹ — Kuvua muena biuma uvuala bilamba bimpe bia mushinga mukole. Dituku dionsu uvua udia bilenga, usanka.

²⁰ Kuvua kabidi muntu mupele, dina diende Lazare. Uvua ne biuja mubidi mujima, ulala ku tshiibi tshia nzubu wa muena biuma.

²¹ Uvua ujinga kudia bisunsukila bivua bimata ku mesa a muena biuma. Kabidi mbua ivua ifika bua kulaka mu mputa yende.

²² Mupele kufua. Batumibue ba Mvidi Mukulu kumuambula, kuya kumuteka mu diulu pabuipi ne Abrahame. Muena biuma kufua kabidi. Kumujikabu.

²³ Muena biuma uvua ukengakana bikole mu kandondu ka bafue. Ukenzakana, kumonaye Abrahame ku bule, Lazare muikale pabuipi nende.

²⁴ Nanku kuelaye diyi ne: “Tatu Abrahame, ungumvuileku luse. Tuma Lazare, atue lusongu lua munu wende mu mayi, bua kuntalaja pa ludimi. Bualu ndi nkengakana bikole mu kadilu aka.”

²⁵ Kadi Abrahame kumuandamuna ne: “Muananyi, vuluka ne: uvua mupete biuma bia bungi, pautshivua ne muoyi panu. Diba adi Lazare uvua ne makenga mavule. Mpindiewu badi bamusamba munemu, kadi wewe udi mu dikenga.

²⁶ Vuluka kabidi ne: pankatshi petu nenu padi lupongu lule. Nanku bantu kabena mua kumuka kunu, kufika kunudi aku to. Kabidi kabena mua kumuka kunudi aku, kufika kutudi eku to.”

²⁷ Ke muena biuma kuamba ne: “Tatu, ndi nkusengelela ne: tuma Lazare mu nzubu mua tatu wanyi,

²⁸ mudi bana betu ba balume batanu. Aye kubadimuja bua kabafiki pabu muaba wa makenga ewu.”

²⁹ Abrahame kuandamuna ne: “Bana benu badi ne Moshe ne bambi badi mua kubadimuja. Babateleje.”

³⁰ Muena biuma ne: “Tatu Abrahame, ebi kabiena bikumbane to. Kadi pikala muntu mubiike ku bafue, muye kumonangana nabu, nebadilengeje.”

³¹ Kadi Abrahame kumuambila ne: “Pikalabu babenga kuteleja Moshe nansha bambi, muntu nansha yeye mubiike ku bafue, kabena mua kumuitaba to.”