Luke 15 - MUKANDA WA MYIDI MUKULU

Lusumuinu lua mukoku mijimine

¹ Balambuishi ba bitadi, ne bantu bakuabu ba lumu lubi, kuyabu kudi Yezu bua kumuteleja.

² Kadi Baparushe, ne balongeshi ba mikenji, bavua basodia, bamba ne: — Kia! Muntu ewu udi wakidila bantu ba lumu lubi, udia nabu!

³ Ke Yezu kubelela lusumuinu ne:

⁴ — Pikala muntu wa kunudi ne mikoku lukama, yeye mujimije umue, kena ushiya mikuabu makumi tshitema ne tshitema mu mpata, bua kuya kukeba udi mujimine anyi? Kakuikisha too ne muawangulaye.

⁵ Yeye mumane kuwangula, udi usanka bikole, uwambula pa makaya ende.

⁶ Udi upingana kuende, ubikila balunda bende ne bena mutumba nende, ubambila ne: “Tusankayi, bualu ndi muangule mukoku wanyi uvua mujimine.”

⁷ Ndi nnuambila ne: ke mudibu basanka bipite mu diulu, bua muena malu mabi udi udilengeja, mudibu kabayi mua kusanka bua bantu makumi tshitema ne tshitema badi kabayi ne bua kudilengeja.

Lukanu lutoke lua mushinga mukole bijimine

⁸ — Ambayi tumone! Mukaji muikale ne nkanu ya tshiamu tshitoke tshia mushinga mukole dikumi, yeye mujimije lumue, udi wenza tshinyi? Neatemeshe muendu, ukomba mu nzubu, ukeba bimpe too ne paluangulaye.

⁹ Yeye mumane kuluangula, udi ubikila bantu bakaji balunda bende ne bena mutumba nende, ubambila ne: “Tusankayi, bualu ndi muangule lukanu luanyi lumvua mujimije.”

¹⁰ Ndi nnuambila ne: ke mudi batumibue ba Mvidi Mukulu basanka bua muena malu mabi udi udilengeja.

Tatu ne bana bende babidi

¹¹ Yezu kuamba kabidi ne: — Muntu kampanda uvua ne bana bende ba balume babidi.

¹² Muana muakunyi uvua ulomba tatuende ne: “Tatu, umpeshe tshianyi tshia bumpianyi tshindi ne bua kupeta.” Nanku tatu awu kuabanyina bana bende bi-vuaye nabi.

¹³ Munkatshi mua matuku makese muana muakunyi kupana bintu biende bionsu, kuya ne makuta ku ditunga dia kule. Kuine aku uvua wenza buenzayi, utulakaja biuma biende.

¹⁴ Nsongalume mumane kudila makuta onsu, tshiyole tshia nzala tshikole kubuela mu ditunga adi. Ke nsongalume awu kutuadija kukenga.

¹⁵ Kuyaye kubuela ku mudimu kua muntu wa mu ditunga adi. Awu kumutuma ku bikumbi biende bua kulama ngulube.

¹⁶ Nsongalume uvua ujinga kudia bimuma bia mutshi bivua ngulube idia. Kadi muntu kavua umupeshabi to.

¹⁷ Kutuadijaye kuela meji, kudiambila ne: “Bena mudimu ba tatuanyi badi ne biakudia bipite bungi, kabayi mua kubidia, kubijikija. Meme apa nkadi mfua ne nzala!

¹⁸ Ndi musue kupingana kudi tatu wanyi, umuambila ne: ‘Tatu wanyi, ndi muenzele Mvidi Mukulu bibi. Ndi mukuenzele ne wewe kabidi.

¹⁹ Tshitshiena mukumbane bua untangile bu muanebe. Nanku ungangate bu muena mudimu webe.’ ”

²⁰ Ke yeye kujuka bua kupingana kudi tatuende. Yeye mutshikale kule ne nzubu wabu, tatuende kumumona. Kumumvuilaye luse bikole. Kuyaye lubilu bua kusambakena nende. Kumupukilaye ne disanka, umutua mishiku.

²¹ Ke muana kumuambila ne: “Tatu wanyi, ndi muenzele Mvidi Mukulu bibi. Ndi mukuenzele ne wewe kabidi. Tshitshiena mukumbane bua untangile bu muanebe.”

²² Kadi tatu kuambila bena mudimu bende ne: “Ambulujayi, tualayi tshilamba tshimpe; numuvuadiketshi. Numuele kakanu ku munu. Numutuadile bisabata, numuelebi.

²³ Nufike ne muana wa ngombe utudi badiundishe, numushipe, bua tudie didia dinene dia disanka.

²⁴ Bualu muananyi ewu ukavua mufue, mmubiike ku lufu. Ukavua mujimine, mbamumonyi.” Kutuadijabu kusanka.

²⁵ Diba adi muanabute utshivua ku budimi. Pavuaye upingana ku nzubu, ufika pabuipi, kumvuaye bimba bisanji, baja maja.

²⁶ Kubikilaye muena mudimu mukuabu, kumukonka ne: “Tshidi aku ntshinyi?”

²⁷ Muena mudimu kumuandamuna ne: “Muanenu wa balume mmupingane. Tatuebe mmushipeshe muana wa ngombe utuvua badiundishe, bualu muanende mmupingane ne bukole bua mubidi.”

²⁸ Nanku muanabute kufika munda, kubenga kubuela mu nzubu. Tatuende kupatuka, kumusengelela.

²⁹ Kadi muana mukulu kuambila tatuende ne: “Teleja, meme ndi mukuenzele mudimu bidimu bipite bungi. Tshiena muanji kubenga mukenji webe nansha umue to. Kadi katshia kuena muanji kumpesha nansha kana ka mbuji bua meme kusanka ne balunda banyi.

³⁰ Kadi muanebe wawa upingana, yeye uvua mutule biuma biebe bionsu ku bakaji bena tshiendenda, wewe kumushipela muana wa ngombe utuvua badiundishe!”

³¹ Tatu kumuandamuna ne: “Muananyi, tudi nebe matuku onsu. Bionsu bindi nabi mbintu biebe wewe.

³² Kadi tuvua ne bua kuenza tshibilu etshi, kusanka, bualu muanenu ewu ukavua mufue, mmubiike ku lufu; ukavua mujimine, mbamumonyi.”