Luke 13 - MUKANDA WA MYIDI MUKULU

Nudilengeje, tshianana nudi nufua

¹ Diba adi bamue bantu kufika kudi Yezu, bamuambila muvua Pilate mushipeshe bena Ngalileya, diba divuabu balambula Mvidi Mukulu milambu yabu. Mashi abu kubonkana ne mashi a nyama ya milambu.

² Yezu kubebeja ne: — Nudi nuela meji ne: bena Ngalileya aba bavua babashipe mushindu ewu, bualu bavua bantu babi bapite bena Ngalileya bakuabu bonsu ku bubi anyi?

³ Nansha kakese! Kadi ndi nnuambila ne: panudi kanuyi nudilengeja, nenufue bonsu momumue!

⁴ Bantu dikumi ne muanda mukulu, bavua kaleya ka Silowa kupukila, kashipa, nudi nuela meji ne: ke bavua babi bapite bantu bakuabu bonsu ba mu Yerushalayime ku bubi anyi?

⁵ Nansha kakese! Kadi ndi nnuambila ne: panuikala kanuyi nudilengeja, nenufue bonsu momumue!

Lusumuinu lua mutshi wa mfiku udi kauyi ukuama

⁶ Ke Yezu kubelela lusumuinu elu ne: — Muntu mukuabu uvua mukune mutshi wa mfiku mu budimi buende bua nwinyo. Kuyaye ku mutshi aku bua kupola bimuma. Kadi kavua mubisangane to.

⁷ Kuambilaye muena mudimu wa mu budimi abu ne: “Mona: kukadi bidimu bisatu bindi mfika anu ku mutshi eku bua kupola bimuma. Kadi tshiena mubipete to. Nanku upula mutshi ewu, bualu udi unyanga buloba tshianana.”

⁸ Kadi muena mudimu awu kumuandamuna ne: “Mfumu, bu wewe musue, mutshi wanji kushala kabidi tshidimu etshi. Nengumbule kuinshi kuawu nseke yonsu. Nenkuele bufuke.

⁹ Bumue udi mua kukuama bimuma tshidimu tshialonda. Pikalawu kauyi mukuame, diba adi neuukoseshe!”

Yezu udi ujikija disama dia mukaji dituku dia Dikisha

¹⁰ Dituku dikuabu dia Dikisha, Yezu uvua ulongesha mu nzubu kampanda wa kutendelela wa bena Yuda.

¹¹ Mu nzubu amu muvua mukaji usama. Mukishi mubi uvua mumukuate bidimu dikumi ne muanda mukulu. Mamu awu mua wenda mukobama, kayi mua kuololoka nansha kakese.

¹² Yezu umona mukaji awu, kumubikilaye, umuamba ne: — Mukaji, bulema buebe buakujika!

¹³ Yezu kumutenteka bianza. Diakamue mukaji kuololoka, kutuadija kutumbisha Mvidi Mukulu.

¹⁴ Kadi mfumu wa nzubu wa kutendelela kufika munda, bualu Yezu mua mujikije disama dia mamu awu dituku dia Dikisha. Ke kuambilaye bantu ne: — Kudi matuku asambombu anudi mua kukuata mudimu. Nufike bua kujikija masama a bantu matuku awu, kadi ki ndituku dia Dikisha nansha!

¹⁵ Yezu kumuandamuna ne: — Nudi bena mpala ibidi! Dituku dia Dikisha, nuenu bonsu kanutu nusulula nyama wa ngombe nansha mpunde bua kumufila ku mayi anyi?

¹⁶ Kadi mukaji ewu mmuntu wa ku ndelanganyi ya Abrahame, mua diabolu mukuate bidimu dikumi ne muanda mukulu. Nanku kabavua mua kumusulula mionji eyi dituku dia Dikisha anyi?

¹⁷ Pavua Yezu wamba nanku, baluishi bende bonsu kumvua bundu. Kadi bantu bakuabu bavua basanka bonsu bua malu mimpe onsu avua Yezu muenze aa.

Lusumuinu lua lutete lua mutshi wa lusanga

¹⁸ Yezu kuamba ne: — Bukalenga bua Mvidi Mukulu mbufuanangane ne tshinyi? Ndi mua kubufuanyikija ne tshinyi?

¹⁹ mBufuanangane ne lutete lua mutshi wa lusanga, luvua muntu mukune mu budimu buende. Lolu kutoloka, mutshi kukola. Nyunyi kuibakila masua ayi mu matamba amu.

Lusumuinu lua buanga bua mampa

²⁰ Yezu kuamba kabidi ne: — Ndi mua kufuanyikija Bukalenga bua Mvidi Mukulu ne tshinyi?

²¹ mBufuanangane ne buanga bua mampa budi mukaji usambakaja ne bukula bua kilo makumi abidi ne itanu, too ne patuntumuka ditapi dionsu.

Tshiibi tshibulakane

²² Mu luendu luende lua kuya ku Yerushalayime, Yezu uvua upitshila mu bimenga ne mu misoku, wenda ulongesha bantu.

²³ Muntu kampanda kumuebeja ne: — Mfumu, bantu badi mua kupanda, mbakese anyi? Yezu kumuandamuna ne:

²⁴ Enzayi muenu muonsu bua nubuele ku tshiibi tshibulakane. Bualu ndi nnujadikila ne: bantu ba bungi nebakebe kubuela, kadi kabakubuela to.

²⁵ “Padi mfumu wa nzubu ujuka bua kukanga tshiibi, nuenu nenuikale pambelu, nukokola ku tshiibi, nuamba ne: ‘Mfumu, utunzuluile!’ Kadi mfumu neanuandamune ne: ‘Tshiena mumanye kunudi nufuma to!’

²⁶ Kadi nuenu nenumuambile ne: ‘Tuvua badie, banue nebe. Uvua mulongeshe mu misesu ya mu tshimenga tshietu.’

²⁷ Kadi mfumu neanuambile ne: ‘Tshiena mumanye kunudi nufuma to. Umbukayi apa, nuenu bonsu benji ba malu mabi!

²⁸ Pinapu nenudile miadi, nusumakaja menu, panuamona Abrahame, Izake, Yakobe, ne bambi bonsu, mu Bukalenga bua Mvidi Mukulu. Kadi nuenu, nebanusakidile pambelu!

²⁹ Bantu nebafume ku nseke yonsu inayi ya buloba. Nebasombe ku mesa mu Bukalenga bua Mvidi Mukulu.

³⁰ Diba adi bantu badi ba ndekelu mpindiewu, nebikale ba kumpala. Badi ba kumpala mpindiewu, nebikale ba ndekelu!”

Muadi bua Yerushalayime

³¹ Diba adi bamue Baparushe kusemena kudi Yezu, bamuambila ne: — Umbuka munu. Uye muaba mukuabu, bualu Erode udi ukeba kukushipesha.

³² Yezu kubandamuna ne: — Nuye, nuambile nyama wa kabundi awu ne: “Ndi ngipata mikishi mibi, njikija masama lelu ne maloba. Dituku disatu nenjikije mudimu wanyi.”

³³ Kadi ntshidi ne bua kutungunuka ne luendu luanyi lelu, maloba, ne dituku dialonda. Bualu ki mbimpe bua bashipele muambi muaba mukuabu, amu mu Yerushalayime.

³⁴ “Yerushalayime we, Yerushalayime we, wewe udi ushipa bambi. Bantu badi Mvidi Mukulu ukutumina, udi ubasa mabue. Misangu bungi munyi imvua musue kukongoloja bantu bebe, mudi nzolu ukunguja tuana tuende mu mapuapua. Kadi kuvua musue nansha.

³⁵ Nanku Mvidi Mukulu neumuke mu nzubu wende. Ndi nnujadikila ne: kanuakummona kabidi, too ne pakumbana diba dinuela mbila ne: ‘Udi ufika mu dina dia Maweja-Nangila, Mvidi Mukulu amuele lupemba!’ ”