Luke 12 - MUKANDA WA MYIDI MUKULU

Yezu udi udimuja balongi bende

¹ Diba adi bantu bavua bunguile binunu ne binunu, badiatangana pa makasa. Ke Yezu kudianza kuambila balongi bende ne: — Dimukayi bua buanga bua mampa budi Baparushe nabu; momumue ne: bua budingidingi buabu.

² Bualu buonsu budi busokome, nebumueneke patoke. Bualu budi bantu kabayi bamanye, nebabumanye!

³ Nanku bionsu binuvua bambe mu miidima, nebabiakule mu munya patoke. Bualu bunuikala banungajangana ku ditshi mu nzubu, bakanga tshiibi, nebabuele mbila ku misonga ya nzubu.

Unudi ne bua kutshina

⁴ — Nuenu balunda banyi, ndi nnuambila ne: kanutshinyi bantu, bualu badi bashipa amu mubidi, kabayi mua kuenza bualu bukuabu.

⁵ Ndi nnuleja unudi ne bua kutshina: nutshine Mvidi Mukulu, bualu Yeye, kunyima kua lufu, udi ne bumfumu bua kukuela mu kandondu ka bafue. Ndi nnuambila ne: numutshine amu Yeye!

⁶ “Kabena basumbisha nyunyi ya mishamisha itanu ku makuta makese anyi? Kadi Mvidi Mukulu kena upua nansha umue wa ku yoyi muoyi to.

⁷ Nansha nsuki yenu yonsu mbayibadike. Nanku kanutshinyi! Nudi bapite tshisumbu tshia nyunyi ya mishamisha ku mushinga.”

Kuitaba ne kuyila Yezu

⁸ — Ndi nnuambila ne: muntu yonsu udi wambila bantu patoke ne: Ndi ngitaba Muana wa muntu, meme kabidi kumpala kua batumibue ba Mvidi Mukulu nengitabe ne: muntu ewu ngwanyi!

⁹ Kadi muntu yonsu udi unwila kumpala kua bantu, Muana wa muntu neamuvile kabidi kumpala kua batumibue ba Mvidi Mukulu.

¹⁰ “Muntu yonsu udi usendeka Muana wa muntu, nebamufuile luse. Kadi udi usendeka Mueyelu wa Tshijila, kabakumufuila luse to.

¹¹ “Panufilabu mu nzubu ya ditendelela ya bena Yuda, nansha kumpala kua balombodi ne bamfumu, bua banulumbuluishe, kanupampakanyi bua mushindu unudi mua kudilumbuluila, nansha bua binudi ne bua kuamba.

¹² Bualu diba adi Mueyelu wa Tshijila neanumanyishe tshinudi ne bua kuamba.”

Lusumuinu lua mubanji mupange meji

¹³ Muntu mukuabu munkatshi mua bantu kuambila Yezu ne: — Mulongeshi, ambila muanetu tuabanyangane biuma bivua tatu mutushile.

¹⁴ Ke Yezu kumuandamuna ne: — Muntu, udi munteke munukosedi wa nsambu, ne muabanyinyi wa biuma bienu nnganyi?

¹⁵ Pashishe Yezu kuambila bantu bonsu ne: — Nudimuke. Kanuteki muoyi ku biuma. Bualu muntu kena ne muoyi bualu bua biuma, nansha yeye nabi bivule!

¹⁶ Nanku Yezu kubelela lusumuinu elu ne: — Kuvua mubanji uvua munowe bintu bia bungi pa madimi ende.

¹⁷ Uvua udiebeja mundamunda ne: “Nengenze tshinyi? Bualu tshiena ne mayeba a kulamina bia mu madimi bianyi bionsu to.”

¹⁸ Kuambaye ne: “Ndi musue kuenza nenku: nengupule mayeba anyi a kale. Nengase makuabu mapite bunene. Nentekelemu ntete yanyi yonsu ya kuenza bukula, kabidi ne bintu bianyi bikuabu bionsu.

¹⁹ Nengambe ne: Disanka kaayi! Ndi ne bintu bivule bidi mua kungambuluisha bidimu ne bidimu. Mpindiewu ndi mua kuikisha, kudia, kunua, kuondoloka.”

²⁰ Kadi Mvidi Mukulu kumuambila ne: “Udi muntu mutshimbakane! Butuku ebu neufue! Kadi bintu biuvua mudilamine, nebishale bia nganyi?”

²¹ Ke Yezu kuamba kabidi ne: — Ke bidi bienzekela muntu udi uditekela biuma nkayende, kayi mubanji kumpala kua Mvidi Mukulu!

Kutekemena kudi Mvidi Mukulu

²² Pashishe Yezu kuambila balongi bende ne: — Ke pandi nnuambila ne: kanutatshi bua biakudia binudi nabi dijinga, nansha bua bivualu bidi mubidi wenu ukengela.

²³ Bualu nudi nupita biakudia ku mushinga, kabidi mubidi wenu mmupite bilamba ku mushinga.

²⁴ Tentekelayi nyunyi ya bikololu. Kayena ikuna maminu, kayena inowa. Kayena ne mayeba, nansha muaba mukuabu wa kulamina biakudia. Kadi Mvidi Mukulu udi uyidisha. Nuenu nudi bapite nyunyi ku mushinga bikole!

²⁵ Nganyi wa kunudi, nansha yeye mutate bishi, udi mua kusakidila nansha dituku dimue ku matuku ende a panu?

²⁶ Nanku panuikala kanuyi mua kukumbaja kalu kakese ka mushindu ewu, munudi nutata bua malu makuabu mbishi?

²⁷ Monayi mudi bilongu bitoloka mu madimi. Kabiena bikuata mudimu. Kabiena bikuma bilamba. Kadi ndi nnuambila ne: nansha Shelomu ne bubanji buende buonsu, kabavua bamuvuadika ne bilenga bia mushindu umue ne bia tshimue tshia mu bilongu ebi.

²⁸ Kadi pikala Mvidi Mukulu uvuadika nanku bisosa bidi lelu mu mpata, butshia babiosha, mudiye kayi mua kunuvuadika mmunyi? Nudi ne ditaba dikese be!

²⁹ Kanupampakanyi. Kanutatshi amu bua biakudia, nansha bua biakunua.

³⁰ Bualu bantu badi kabayi bamanye Mvidi Mukulu bimpe, ke badi bapite kukeba bia nanku. Kadi nuenu, nudi ne Tatu wenu udi mumanye munudi nubijinga.

³¹ Kebayi nangananga Bukalenga bua Mvidi Mukulu. Nanku Yeye neanupeshe bikuabu abi.

Bubanji bua mu diulu

³² — Nudi amu kasumbu kakese. Kadi kanutshinyi nansha! Bualu Tatu wenu mmusue kunupa Bukalenga.

³³ Nupane bintu bienu, nupeshe bapele makuta anuapeta. Kebayi mua kupeta bibuta bidi kabiyi binyanguka. Kungujayi bubanji mu diulu, mudibu kabuyi bujimina. Muamua bivi kabena mua kubuangata. Misanda kayena mua kubunyanga.

³⁴ Bualu misangu yonsu muoyi wenu udi muaba unudi nuteka bubanji buenu.

Tabalayi

³⁵ — Shalayi balongame. Nudisuike mikaba mu tshimonu. Ambulayi miendu yenu mitemesha.

³⁶ Nuikale bafuanangane ne bena mudimu badi bindila mfumuabu, diba didiye ufuma ku didia dia dibaka. Padiye ukokola, badi bamunzuluila tshiibi diakamue.

³⁷ Bena mudimu aba badi ne diakalenga, padi mfumu ubasangana batabale. Ndi nnujadikila bulelela ne: Mfumu neavuale tshilamba tshia mudimu. Neabasombeshe ku mesa, bua kubabanyina biakudia ku muntu ku muntu.

³⁸ Nansha yeye mufike mundankulu mua butuku, nansha patshiatshia, badi ne diakalenga, pikalaye ubasangana batabale nanku.

³⁹ Manyayi ne: bu mfumu wa nzubu mumanye diba didi muivi mua kufika, kena mua kuitaba bua apande nzubu.

⁴⁰ Shalayi balongame nuenu kabidi, bualu Muana wa muntu neafike pa diba dinudi kanuyi bela meji.

Muena mudimu muimpe ne muena mudimu mubi

⁴¹ Ke Petro kuebeja Yezu ne: — Mfumu, lusumuinu elu udi mutuelele tuetu nkayetu anyi bantu bonsu?

⁴² Mfumu kumuandamuna ne: — Muena mudimu muimpe wa meji nnganyi? Se mmuntu udi mfumuende uteka ku mudimu wa kulama nzubu, ne wa kupesha bena mudimu biakudia diba diakane.

⁴³ Muena mudimu wa nanku udi ne diakalenga, padi mfumu ufika, umusangana ukuata mudimu.

⁴⁴ Ndi nnujadikila bulelela ne: mfumu neamupeshe bulami bua bintu biende bionsu.

⁴⁵ Kadi pikala muena mudimu awu wamba mundamunda muende ne: “Mfumuanyi kakupingana lukasa to,” utuadija kutuuta bena mudimu nende balume ne bakaji, udia, unua ukuatshika,

⁴⁶ mfumuende neafike dituku didi muena mudimu awu kayi muelaku meji, ne diba didiye kayi mumanye. Nanku mfumuende neamunyoke bikole, neamuteke muaba wa baluishi ba Mvidi Mukulu.

⁴⁷ Muena mudimu udi mumanye bidi mfumuende musue, kadi ubenga kudilongolola bua kubikumbaja, nebamutuute bikole.

⁴⁸ Kadi muena mudimu udi wenza malu makanyina dinyoka, kayi mumanye tshidi mfumuende musue, nebamutuute kakese. Muntu muabu bapeshe bia bungi, nebamulombe bia bungi. Uvuabu bambike bia bungi, nebamulombe bipite.

Bupole anyi mvita

⁴⁹ — Ndi mufike pa buloba ne kapia. Ndi musue kateme amu mpindiewu.

⁵⁰ Badi ne bua kuntua mu mayi. Nenkenge bikole, too ne ku diba diakumbana bualu ebu.

⁵¹ Nudi nuela meji ne: ndi mufike bua kufila bupole pa buloba anyi? Too! ndi nnuambila ne: ndi mufike bua kupandulula bantu.

⁵² Kutuadijila ku mpindiewu, padi bantu batanu basomba mu diku dimue nebatapulukangane, basatu babenga babidi, babidi babenga basatu.

⁵³ Tatu neabenge muanende wa balume, muana neabenge tatu. Mamu neabenge muanende wa bakaji, muana neabenge mamuende. Mamuenu neabenge mukaji wa muanende, mukaji wa muana neabenge mamuenende.

Kujingulula bidi bienzeka lelu

⁵⁴ Yezu uvua wambila bantu kabidi ne: — Diba dinudi numona divuba dibanda ku luseke ludi diba dibuelela, nudi nuamba diakamue ne: “Mvula nealoke.” Ke mudibi bienzeka nanku.

⁵⁵ Diba dinudi numvua lupepele lutuuta lufuma kuinshi kua ditunga, nudi nuamba ne: “Munya newikale mukole.” Ke mudibi bienzeka.

⁵⁶ Kadi nudi bena mpala ibidi! Nudi mua kujingulula bidi bienzeka pa buloba ne mulu. Kadi munudi kanuyi nujingulula bidi bienzeka lelu mbishi?

Nulengejangane ne unudi nende lukuna

⁵⁷ — Munudi kanuyi mua kujingulula nkayenu binudi ne bua kuenza mmunyi?

⁵⁸ Padi muntu ukufunda ku tshilumbu, nuya nende pamue ku tshilumbuluilu, enza muebe muonsu bua numvuangane nende, panutshidi mu njila. Kuyi wenza nanku, muena lukuna nebe neakufikishe kudi mukoshi wa nsambu. Awu pende neakufile kudi mufutshishi wa bibawu, bua akueleshe mu nzubu wa lukanu.

⁵⁹ Ndi nkujadikila ne: kuakupatukamu, amu wewe mufute dibanza dionsu.