Lewitiki 9 - MUKANDA WA MYIDI MUKULU

Arone ne bana bende ba balume badi batuadija mudimu

¹ Dituku divua dilonda matuku muanda mutekete avuabu bajidile Arone ne bana bende ba balume, Moshe kubabikila pamue ne bakulu ba bena Izrayele.

² Kuambilaye Arone ne: — Angata muana wa ngombe mulume udi kayi ne bulema, umulambule Maweja-Nangila bu mulambu wa kukobolola nawu bantu. Wangate kabidi mukoku wa tshimpanga udi kauyi ne bulema, uulambule Maweja-Nangila bu mulambu wa kuosha. Wimane nabi kumpala kua Maweja-Nangila.

³ Pashishe wambile bena Izrayele, bafile pabu mbuji wa mpumbu kudi Maweja-Nangila bu mulambu wa kukobolola nawu bantu. Bafile kabidi muana wa ngombe mulume, kabidi ne muana wa mukoku wa tshidimu tshimue, kayi ne bulema, bua kubilambula Maweja-Nangila bu mulambu wa kuosha.

⁴ Bangate kabidi ngombe mulume, mukoku wa tshimpanga bua mulambu wa bobumue. Nenusakidile ku nyama mulambu wa bukula busampakaja ne mafuta. Bualu Maweja-Nangila neanumuenekele lelu.

⁵ Nanku bionsu bivua Moshe muambe, kubifidilabu mu mushiku wa ntenta wa kusambakena. Pashishe bena Izrayele bonsu kuya kuimana muaba awu bua kutendelela Maweja-Nangila.

⁶ Moshe kubambila ne: — Panudi nukumbaja bionsu bivua Maweja-Nangila munuambile bua kuenza, yeye neadileje kunudi ne butumbi buende.

⁷ Pashishe kuambilaye Arone ne: — Semena ku tshilambuilu, ulambule mulambu wa kudikobolola nawu, ne mulambu wa kuosha. Wenze bionsu bidi bikengela bua wewe kudikobolola, kukobolola ne bena Izrayele bonsu. Pashishe ulambule milambu ya bena Izrayele. Wenze kabidi ne bionsu bidi bikengela bua kukobolola bantu, bu muvua Maweja-Nangila muambe.

⁸ Arone kusemena pabuipi ne tshilambuilu, kukosa muana wa ngombe muminu bua kudikobolola.

⁹ Nanku, bana bende ba balume kumuambuilabu mashi. Arone kutua munu wende mu mashi awu, kualaba ku matumba matalame avua ku tshilambuilu. Pashishe kuitshikijaye mashi avua mashale kuinshi kua tshilambuilu.

¹⁰ Kuoshilaye Maweja-Nangila mafuta onsu, ne tuonyi tubidi, ne lutandatanda lua ku mutshima, bu muvua Maweja-Nangila muambile Moshe.

¹¹ Kadi munyinyi ne tshiseba, Arone kumuka nabi ku mitanda, kuya kubiosha.

¹² Pashishe Arone kukosa nyama wende wa tshimpanga wa mulambu wa kuosha awu muminu. Bana bende ba balume kumuambuila mashi. Arone kumiamina mashi awu ku nseke yonsu ya tshilambuilu.

¹³ Kumupeshabu kabidi mutu wa nyama awu, ne munyinyi mumane kukosolola mabulu, bua kubioshila Maweja-Nangila pa tshilambuilu.

¹⁴ Kusukulaye kabidi bia munda ne bikonu, kubitenteka pa milambu mikuabu ya kuosha ivua pa tshilambuilu.

¹⁵ Pashishe Arone kuleja Maweja-Nangila milambu ivua bantu bafile. Kuangataye mbuji wa mpumbu wa mulambu wa kukobolola nawu bantu, kumukosa muminu. Pashishe kumulambulaye Maweja-Nangila, amu bu muvuaye mulambule ngombe wende.

¹⁶ Kuambulaye nyama ya milambu ya kuosha ibidi ayi anu bilondeshile mikenji.

¹⁷ Pashishe kulejaye Maweja-Nangila milambu ya bintu bia mu madimi. Kuambulaye dianza dia bukula, kuboshila Mvidi Mukulu pa tshilambuilu. Nanku, dinda dionsu bavua basakidila bintu abi ku mulambu wa kuosha.

¹⁸ Arone kukosa muminu wa ngombe, ne wa mukoku wa tshimpanga, bivua bantu bafile bua mulambu wa bobumue. Pashishe bana bende ba balume kumuambuila mashi a nyama ayi. Arone kuamiamina ku nseke inayi ya tshilambuilu.

¹⁹ Kumupeshabu munyinyi wa mafuta a ngombe, kabidi ne mukila, mafuta onsu adi malamate ku bia munda, tuonyi ne lutandatanda lua ku mutshima bia mukoku wa tshimpanga.

²⁰ Nanku Arone kutentekaja munyinyi wa mafuta awu pa biadi bia nyama ibidi ayi. Ke kuoshaye mafuta awu pa tshilambuilu.

²¹ Pashishe Arone kuambula biadi bia nyama ne tshibelu tshia ku dia balume dia nyama, kubiela mulu, ubinyukula kumpala kua Mvidi Mukulu, bu muvua Maweja-Nangila muambile Moshe.

²² Arone ujikija kulambula milambu ya kukobolola bantu, milambu ya kuosha, milambu ya bobumue, kuelaye bianza mulu, wela bena Izrayele lupemba. Pashishe kumukaye ku tshilambuilu.

²³ Nanku Moshe ne Arone kubuela mu ntenta wa kusambakena. Bobu bamane kupatukamu, kuelabu bantu lupemba. Nanku Maweja-Nangila kudileja kudi bena Izrayele ne butumbi buende.

²⁴ Diakamue kapia kufuma kudi Maweja-Nangila, kutema, kuosha milambu ya kuosha yonsu, ne mafuta a ku milambu mikuabu bivua pa tshilambuilu. Bantu bonsu bamone nanku, kuelabu tunkunduluila. Pashishe kudielabu mpala panshi.