Lewitiki 4 - MUKANDA WA MYIDI MUKULU

Mulambu wa kudikobolola nawu a. Mulambu wa mutuangaji munene

¹ Maweja-Nangila kuambila Moshe

² bua amanyishe bena Izrayele ne: “Padi muntu muenze bualu bubi mu mpukapuka, kayi mulonde mikenji ya Maweja-Nangila, numukobolole nunku:

³ “Padi mutuangaji munene muenze bualu bubi, budi butampakena bena Izrayele bonsu, udi ne bua kudikobolola. Alambule Maweja-Nangila ngombe mulume, udi kayi ne bulema, bua Maweja-Nangila amufuile luse.

⁴ Aye ne ngombe awu muaba wa tshijila, mu mushiku wa mbelu wa ntenta wa kusambakena. Amuteke tshianza pa mutu, amukosele muminu muaba awu kumpala kua Maweja-Nangila.

⁵ Angata mashi makese a ngombe awu, abuele nawu mu ntenta.

⁶ Atue munu mu mashi awu, amiamine mashi misangu muanda mutekete ku luseke ludi lumueneka lua tshilamba tshidi tshilembeleja muaba wa tshijila udi Maweja-Nangila.

⁷ Alabe kabidi mashi awu ku matumba adi matalame ku tshilambuilu tshia kuoshila manananshi, tshidi muaba wa tshijila. Pashishe mashi onsu adi ashala, mutuangaji ayitshikije kuinshi kua tshilambuilu tshia milambu ya kuosha tshidi ku mushiku wa mbelu wa ntenta.

⁸ Mutuangaji alamune mafuta onsu a ngombe awu: bu mudi mafuta adi malamate ku bia munda,

⁹ tuonyi tubidi ne mafuta onsu adi malamateku, mafuta adi malamate ku mulemba, ne lutandatanda ludi ku mutshima, ludibu balamuna pamue ne tuonyi.

¹⁰ — Munyinyi wa mafuta onsu awu, ke udi mutuangaji umusha kabidi padiye ulambula milambu ya bobumue. — Mutuangaji munene oshe munyinyi onsu ewu pa tshilambuilu tshia milambu ya kuosha.

¹¹ Pashishe bintu bionsu bia ngombe bidi bishale, bu tshiseba, munyinyi, mutu, bikonu, bia munda ne bunyawu bonsu budimu,

¹² mutuangaji umuke nabi ku mitanda, aye kubioshila pa nkunyi ya kapia, muaba musunguluke udibu bimansha butu bua ku tshilambuilu.

b. Mulambu wa benu Izrayele bonsu

¹³ “Padi bena Izrayele bonsu benza bualu bubi mu mpukapuka, budi bubengangana ne mikenji ya Maweja-Nangila, badi amu bena tshibawu, nansha bobu kabayi bamanye tshilema tshidibu benza.

¹⁴ Diakamue padibu bamanye bualu bubi buvuabu benza abu, badi ne bua kudikobolola, balambula Maweja-Nangila ngombe mulume, bua Maweja-Nangila abafuile luse. Badi baya nende kumpala kua ntenta wa kusambakena.

¹⁵ Balombodi ba bena Izrayele bateke bianza pa mutu wa ngombe awu. Mulombodi umue amukosele muminu pa muaba awu kumpala kua Maweja-Nangila.

¹⁶ Mutuangaji munene angate mashi makese, abuele nawu mu ntenta.

¹⁷ Atue munu mu mashi awu, aamiamine misangu muanda mutekete ku luseke ludi lumueneka lua tshilamba tshidi tshilembeleja muaba wa tshijila udi Maweja-Nangila.

¹⁸ Alabe kabidi mashi awu ku matumba adi matalame ku tshilambuilu tshia kuoshila manananshi tshidi muaba wa tshijila. Pashishe mashi onsu adi mashale, mutuangaji ayitshikije kuinshi kua tshilambuilu tshia milambu ya kuosha, tshidi ku mushiku wa mbelu wa ntenta.

¹⁹ Kadi mutuangaji umushe mafuta onsu a ngombe awu, awoshe pa tshilambuilu.

²⁰ Alambule Maweja-Nangila mulambu awu, anu mushindu uvuaye ulambula ngombe mulume bua kudikobolola. Nanku mutuangaji akobolole bena Izrayele anu mushindu ewu, bua Mvidi Mukulu abafuile luse.

²¹ Pashishe bintu bionsu bidi bishale, mutuangaji umuke nabi mu mitanda, aye kubiosha bu mudibu bosha bintu bidi bishale bia ngombe mulume, padibu bakobolola mutuangaji munene. Mulambu ewu mbua kukobolola nawu bena Izrayele, bua Mvidi Mukulu abafuile luse.

c. Mulambu udi mfumu ulambula

²² “Padi mfumu wa bena Izrayele muenze bualu bubi mu mpukapuka budi bubengangana ne mikenji ya Mvidi Mukulu, udi muena tshibawu.

²³ Padiye umanya bualu bubi buvuaye muenze abu, adikobolole, alambule Maweja-Nangila mbuji wa mpumbu udi kayi bulema.

²⁴ Ateke tshianza pa mutu wa mbuji awu, amukosele muminu kumpala kua Maweja-Nangila, muaba udibu bashipela nyama ya milambu ya kuosha. Mulambu awu mbua kukobolola mfumu wa bena Izrayele bua Mvidi Mukulu amufuile luse.

²⁵ Mutuangaji atue munu mu mashi awu, aalabe ku matumba matalame adi ku tshilambuilu tshia milambu ya kuosha. Pashishe mashi adi mashale, ayitshikije kuinshi kua tshilambuilu atshi.

²⁶ Munyinyi wa mafuta onsu udi mushale, mutuangaji awoshe pa tshilambuilu, bu mudibu benza bua mulambu wa bobumue. Nanku mutuangaji akobolole mfumu wa bena Izrayele anu mushindu ewu bua Mvidi Mukulu amufuile luse.

d. Mulambu udi muntu yonsu ulambula

²⁷ “Kadi padi muena musoku muenze bualu bubi mu mpukapuka, budi bubengangana ne mikenji ya Maweja-Nangila, udi amu muena tshibawu.

²⁸ Padiye umanya bualu bubi buvuaye muenze, udi ne bua kudikobolola. Alambule Maweja-Nangila mbuji wa dishina, kayi ne bulema.

²⁹ Ateke tshianza pa mutu pa mbuji awu, amukosele muminu muaba udibu bashipela nyama ya milambu ya kuosha.

³⁰ Mutuangaji atue munu mu mashi a mbuji awu, aalabe ku matumba matalame adi ku tshilambuilu tshia milambu ya kuosha. Pashishe mashi adi mashale, mutuangaji ayitshikije kuinshi kua tshilambuilu atshi.

³¹ Bumushe munyinyi wa mafuta onsu, bu mudibu benza bua mulambu wa bobumue. Mutuangaji awoshe pa tshilambuilu, bualu mmulambu wa dipembu dimpe didi disankisha Maweja-Nangila. Mutuangaji akobolole muena Izrayele awu anu mushindu ewu bua Mvidi Mukulu amufuile luse.

³² “Padi muena tshibawu awu musue kulambula Maweja-Nangila mukoku, asungule amu mukoku mukaji udi kauyi ne bulema, bua Mvidi Mukulu amufuile luse.

³³ Ateke tshianza pa mutu wa mukoku awu, aukosele muminu pa muaba udibu bashipela nyama ya milambu ya kuosha.

³⁴ Mutuangaji atue munu mu mashi awu, aalabe ku matumba matalame adi ku tshilambuilu tshia milambu ya kuosha. Pashishe mashi onsu adi mashale, mutuangaji ayitshikije kuinshi kua tshilambuilu atshi.

³⁵ Bumushe munyinyi wa mafuta onsu, bu mudibu benza bua mukoku wa mulambu wa bobumue. Mutuangaji awoshe pa tshilambuilu pamue ne milambu mikuabu idibu boshila Maweja-Nangila. Mutuangaji akobolole muena tshibawu awu mushindu ewu bua Mvidi Mukulu amufuile luse.