Lewitiki 2 - MUKANDA WA MYIDI MUKULU

Mulambu wa bintu bia mu madimi

¹ “Padi muena Izrayele ulambula Maweja-Nangila mulambu wa bintu bia mu madimi, angate bukula, elepu mafuta, atentekepu ne musenga wa kamonya.

² Aye nabi kudi batuangaji, bana ba Arone. Mutuangaji ambule dianza dia bukula budi ne mafuta, ambule kabidi musenga wa kamonya onsu. Abioshe bionsu pa tshilambuilu. Bualu bidi mulambu wa tshivulukilu, udi ne dipembu dimpe didi disankisha Maweja-Nangila.

³ Bukula bua mulambu budi bushale babuangate anu kudi Arone ne bana bende ba balume, bualu ntshitupa tshia tshijila menemene, tshia ku mulambu uvuabu balambula Maweja-Nangila.

⁴ “Padi muena Izrayele ulambula Maweja-Nangila mulambu wa bintu biosha muiku, wikale amu wa mikata misopakaja ne mafuta, nansha wa tuampa tukese tulaba mafuta, kabiyi biela buanga bua mampa to.

⁵ “Kadi padiye ulambula mulambu wa diampa dikanga pa dilata, diampa adi dikale dienza ne bukula busopakaja ne mafuta, kabuyi buela buanga bua mampa to.

⁶ Diampa adi badikose mu bitupa, bela kabidi mafuta pa bitupa abi, bualu mmulambu wa bintu bia mu budimi.

⁷ “Kadi pikala mulambu awu wa bintu bilamba mu luesu, udi ne bua kuikala bukula busambakaja ne mafuta.

⁸ “Baye nawu muaba wa tshijila, baufile kudi mutuangaji bua yeye aye nawu ku tshilambuilu.

⁹ Ambule dianza dia bukula, aboshe pa tshilambuilu, bualu mmulambu wa tshivulukilu wa kuosha udi ne dipembu dimpe didi disankisha Maweja-Nangila.

¹⁰ Bukula bua ku mulambu budi bushale, babuangate anu kudi Arone ne bana bende ba balume. Bualu ntshitupa tshia tshijila menemene, bualu ntshia ku mulambu uvuabu balambula Maweja-Nangila.

¹¹ “Kadi, kanuena mua kuela buanga bua mampa mu mulambu nansha umue unudi nulambula Maweja-Nangila to. Panudi nulongolola mulambu wa kuoshila Maweja-Nangila, kashidi kenu kanuena mua kuelamu buitshi, nansha buanga bua mampa to.

¹² Kadi panudi nulambula Maweja-Nangila bintu bia tshianyi bia mu madimi enu, nudi mua kuelamu buanga bua mampa ne buitshi, kanuyi nubiosha pa tshilambuilu, bu munudi nuenza ne mulambu udi ne dipembu dimpe didi disankisha Maweja-Nangila.

¹³ “Nudi mua kuela luepu mu milambu yonsu ya bintu bia pa madimi. Bualu luepu ntshimanyinu tshia ndondu udi pankatshi penu ne Mvidi Mukulu. Nanku nuikale nuela luepu mu milambu yonsu.

¹⁴ “Padi muena Izrayele ulambula Maweja-Nangila bintu bia tshianyi bia mu budimi buende, abikange, abitue mu tshinu, bangabanga ne kubilambula.

¹⁵ Elemu mafuta, atekepu ne musenga wa kamonya, bualu mmulambu wa bintu bia mu madimi.

¹⁶ Mutuangaji ambule dianza dia bukula budi ne mafuta, ambule kabidi musenga wa kamonya onsu, abioshe pa tshilambuilu, bualu mmulambu wa tshivulukilu udi moshile Maweja-Nangila.