Kolose 2 - MUKANDA WA MYIDI MUKULU

¹ Ndi musue bua numanye mvita mikole indi nduangana bualu buenu, kabidi bua bena Lawodikiya, ne bua bantu bonsu badi kabayi banji kummanya.

² Ndi nduangana bua bikale ne muoyi wa bukitu, banangangane, benze tshintu tshimue, bamanye malu onsu mu bulelela, bashindame munda muawu. Ke mudibu mua kujingulula meji masokome a Mvidi Mukulu, momumue ne: Kristu nkayende.

³ Yeye ke nsapi idi ikangula, yunzulula bibutshilu bisokome bionsu bia meji ne lungenyi bia kudi Mvidi Mukulu.

⁴ Ndi nnuambila nanku, bua muntu nansha umue kanushimi ne miaku ya budimu.

⁵ Nansha meme tshiyi nenu pabuipi, kadi mu lungenyi ndi nenu. Ndi nsanka bua kumona munudi benze tshintu tshimue, bitabe Kristu ne muoyi mushindame.

Tudi tupeta muoyi mujima kudi Kristu

⁶ Nenku panudi bamane kuitaba Yezu Kristu bu Mfumu, nudisange nende.

⁷ Asayi miji munda muende, shindikayi mioyi yenu kudiye, shindamayi amu kushindama diba dionsu mu ditaba. Kanusesuki ku bivuabu banulongeshe. Nuele Mvidi Mukulu tuasakidila muenu muonsu.

⁸ Dimukayi bua muntu kanushimi ne malongesha a patupu a mu meji a bantu. Ke meji adi mafume ku malu adi bantu balongeshangana, ne kudi makole a mulu. Kadi kaena mafume kudi Kristu to.

⁹ Bualu Mvidi Mukulu udi mujima munda mua Kristu mu bumuntu buende.

¹⁰ Nuvua bapete bionsu menemene mu didisanga dienu nende. Kristu udi mfumu wa Diakalenga onsu, ne wa makole onsu a mulu.

¹¹ Panuvua badisange ne Kristu, Yeye uvua mumushe bukole bua bubi munda muenu. Ke muvuaye munuteke panshi; kadi ki mmushindu udi bantu batekangana panshi nansha.

¹² Bualu pavuabu banutue mu mayi, bavua banujike pamue ne Kristu. Kadi nuvua babiike kabidi pamue nende. Bualu panuvua bitabe, nuvua badifile kudi Mvidi Mukulu, muena bukole, uvua mubishe Kristu ku bafue.

¹³ Ku kale nuvua bafue, bualu kabavua banuteke panshi, momumue ne: nuvua badine mu bubi. Kadi mpindiewu Mvidi Mukulu mmunubishe pamue ne Kristu. mMutujimijile mibi yetu yonsu.

¹⁴ Uvua mushipe mukanda uvua uleja mutuvua bena tshibawu, utusonguela. Uvua mumbushe bukole buawu, bualu mmuupopele pa mutshi mutshiamakane.

¹⁵ Ku mutshi mutshiamakane ke kuvua Kristu mudipikule ku makalenga, ne ku makole a mulu. mMuafuishe bundu ku mesu a bantu bonsu, bualu mmuye nawu bu bena lukanu, mu luendu lua ditshimuna diende.

¹⁶ Kanuteleji badi banujana, bua binudi nudia nansha nunua, nansha bua bibilu, bua ngondu mupiamupia, nansha bua dituku dia Dikisha.

¹⁷ Bionsu abi bidi amu mundidimbi wa malu atshidi kumpala. Kadi bualu bulelela budi amu Kristu.

¹⁸ Kanuteleji muntu udi unudiwula, wamba ne: meme ndi ndipuekesha, ndi ntendelela batumibue; Mvidi Mukulu udi undeja malu. Muntu wa nanku udi uditambisha patupu, wela amu meji a bantu.

¹⁹ Kena ulamata Kristu, udi mutu. Kristu nkayende udi udisha mubidi mujima, ulamakaja manungu ne mijilu biawu, udiundisha mubidi mudi Mvidi Mukulu musue.

Kufua ne kuikala ne muoyi pamue ne Kristu

²⁰ Nudi bafue pamue ne Kristu. mBanupikule ku makole a mulu. Nanku nudi basombe bu bantu ba pa buloba bua tshinyi? Bua tshinyi nudi banyishe bua banuelele mikenji ya mushindu ewu:

²¹ “Kuangatshi etshi,” “Kulabudi tshiatshia,” “Kulengi eku to?”

²² Mikenji eyi idi bua bintu bidi bijimina, padi bantu bamane kukuata nabi mudimu. Amu bantu ke badi bayela, bayilongesha.

²³ Bushuwa mikenji eyi ya kutendelela batumibue, ya kudipuekesha, ya kukengehsa mubidi, idi imueneka bu ya meji. Kadi kayena ne mushinga nansha mukese, bualu idi isankisha amu bumuntu buetu.