Genese 7 - MUKANDA WA MYIDI MUKULU

Nowa udi ubuela mu buatu

¹ Maweja-Nangila kuambila Nowa ne: “Buela mu buatu ne diku diebe dionsu, bualu anu wewe ke muntu muakane munkatshi mua bantu ba tshikondu etshi.

² Ubuele ne nyama milume muanda mutekete ne mikaji muanda mutekete idi kayiyi ne mikiya. Kadi bua nyama idi ne mikiya ubuele anu ne mulume umue ne mukaji umue.

³ Ubuele kabidi ne nyunyi milume muanda mutekete ne nyunyi mikaji muanda mutekete, bua diminu dia nyunyi dishale kashidi pa buloba.

⁴ Bualu papita matuku muanda mutekete, nendokeshe mvula pa buloba matuku makumi anayi a munya ne a butuku. Nembutule bintu bionsu bidi ne muoyi, bindi mufuke pa buloba.”

⁵ Nowa kuenza bionsu bivua Maweja-Nangila mumuambile.

Mayi a tshipupu

⁶ Musangu uvua mayi a tshipupu uwuja buloba, Nowa uvua ne bidimu nkama isambombu.

⁷ Nowa kubuela mu buatu ne mukajende, bana bende ba balume ne bakaji babu, bua kudipandisha ku mayi a tshipupu.

⁸ Nyama idi ne mikiya ne idi kayiyi ne mikiya, nyunyi, kabidi ne nyama idi ilandala,

⁹ kubuela mu buatu ne Nowa, mulume ne mukaji, bu muvua Mvidi Mukulu mumuambile.

¹⁰ Matuku muanda mutekete mamane kupita, mayi a tshipupu kuwuja buloba.

¹¹ Matuku dikumi ne muanda mutekete a ngondu muibidi, Nowa mumane kukumbaja bidimu nkama isambombu, mayi onsu avua muinshi mua buloba kupatukawu ne bukole miaba mishilangane, bibi bionsu bia mulu ku-nzulukabi.

¹² Mvula kuloka pa buloba matuku makumi anayi a munya ne a butuku.

¹³ Anu dituku adi, Nowa kubuela mu buatu ne mukajende ne bana bende: Sheme, Kame ne Yefete, ne bakaji babu basatu.

¹⁴ Kubuelabu kabidi ne nyama ya muitu ya mishindu yonsu, bimuna bia mishindu yonsu binene ne bikese, nyunyi ne bishi.

¹⁵ Nyama kubuela mu buatu pamue ne Nowa, mulume umue ne mukaji umue ku nyama yonsu.

¹⁶ Nowa mumane kubuela, ne mulume umue kabidi ne mukaji umue wa ku nyama yonsu, bu muvua Mvidi Mukulu mumuambile, Maweja-Nangila kuinjila tshibi tshia buatu.

¹⁷ Mayi kuwuja buloba mu matuku makumi anayi. Mayi kuvulangana, kubandisha buatu kulu. Kushalabu bulelema pa mayi.

¹⁸ Mayi kupita bungi pa buloba, buatu pabu buvua amu bushale bulelema pa mayi.

¹⁹ Mayi mamane kuvulangana pa buloba, kubuikilawu mikuna yonsu nansha ne ivua mitumbuke.

²⁰ Mayi kubanda, kupita mikuna mile bule bua metre muanda mutekete.

²¹ Nanku bionsu bivua ne muoyi pa buloba kufuabi: nyunyi, bimuna, nyama ya muitu, bilandadi ne bantu kabidi.

²² Nyama ne bantu bionsu bivua ne muoyi kufua pa buloba bujima.

²³ Ke muvua Maweja-Nangila mubutule bionsu bivua ne muoyi pa buloba, kutuadija ku bantu ne ku bimuna, ku nyama minene ne mikese, ne ku nyunyi idi ibuka mulu. Bionsu kubutukabi. Anu Nowa ne bantu bavuaye nabu mu buatu kushala ne muoyi.

Nowa udi upatuka mu buatu

²⁴ Mayi kushala matengabela pa buloba matuku lukama ne makumi atanu.