Genese 44 - MUKANDA WA MYIDI MUKULU

Yozefe udi uteta bana babu

¹ Yozefe kuambila mulombodi wa bena mudimu bende ne: — Uwujila bantu aba biakudia bibombi tente, bujitu budi muntu yonsu mua kuambula. Upingaje kabidi ku mibangubangu ya tshibombi makuta avua muntu yonsu mutule.

² Mu tshibombi tshia muanamukala, kuena upingajamu amu makuta avuaye mutule to. Udi welamu kabidi dikopu dianyi dia tshiamu tshitoke tshia mushinga mukole. Mulombodi awu kuenza muvua Yozefe muambe.

³ Butshia dinda, bana ba Yakobe kuangata mpunde yabu, kupingana kuabu.

⁴ Amu bumuka mu tshimenga, kabayi banji kuenda mutantshi mule, Yozefe kuambila mulombodi wa bena mudimu bende ne: — Londakaja bantu abu lukasa, ubapete, ubakonke ne: “Tuetu banuenzele bimpe, nuenu nudi nutuenzela bibi bua tshinyi?

⁵ Bua tshinyi nudi bibe dikopu dia mfumuanyi didiye unuina, ujanduila kabidi ne malu atshi wavua. Nudi benze bibi!”

⁶ Mulombodi wa bena mudimu kupeta bana babu ne Yozefe, kubambila bionsu abi.

⁷ Bobu kuandamuna ne: — Mukalenga wetu, udi mua kutusonguela nunku munyi? Tuetu kashidi katuena mua kuenza bualu bua nanku to.

⁸ Patumuku kuetu ku Kenaane, tuvua bafike ne makuta avua mu bibombi, atuvua basangane matenteka pa biakudia. Kadi tudi mua kuiba tshiamu tshitoke tshia mushinga mukole, nansha mpawungi bidi mu nzubu mua mukalenga webe bua tshinyi?

⁹ Nanku yonsu wa kutudi, uvua-sangana muikale ne dikopu adi, asangane kufua anyie? Afue! Kabidi tuetu bonsu netushale bapika benu.

¹⁰ Mulombodi wa bena mudimu wa Yozefe kuandamuna ne: — Ndi mumvue munuambi amu, mbimpe. Kadi amu muntu wa kunudi utudi tusangana ne dikopu adi, neashale mupika wanyi. Bakuabu nebaye kudibu basue.

¹¹ Kutululabu bibombi biabu panshi lukasa. Muntu yonsu uvua usulula tshibombi tshiende.

¹² Mulombodi wa bena mudimu wa Yozefe kukalula mu bibombi bionsu, bituadije ku tshia muanabute too ne ku tshia muanamukala. Ke kusanganabu dikopu adi mu tshia Binyamine.

¹³ Bana babu ne Binyamine kumvua bowa, kudipanda bilamba. Yonsu wa kudibu kupingaja bibombi panyima pa mpunde. Kupinganabu mu tshimenga.

Yuda udi wakuila Binyamine

¹⁴ Yuda ne bana babu kufika ku mbelu kua Yozefe, kumusangana amu, muaba awu. Kudielabu panshi kumpala kuende.

¹⁵ Yozefe kubakonka ne: — Nuvua benze nanku bua tshinyi? Kanuena bamanye ne muntu bu mundi emu udi ne bumfumu bua kujandula malu onsu anyi?

¹⁶ Yuda kuandamuna ne: — Mukalenga wetu, tshitudi mua kuamba ntshinyi bua kukujadikila mutudi babinge. Mvidi Mukulu mmuleje patoke bubi buetu. Udi ne dikopu mu tshibombi tshiende ne tuetu bonsu tudi tushala bapika bebe.

¹⁷ Yozefe kuandamuna ne: — Tshiena mua kuenza nanku to. Ndi nkuata amu muntu uvua ne dikopu awu, neashale mupika. Kadi nuenu bonsu pinganayi ne ditalala kudi tatuenu.

¹⁸ Yuda kusemena pabuipi ne Yozefe, kumuambila ne: — Mukalenga, ndi musue kukuambila bualu. Kumfikidi munda to. Wewe udi mulongu umue ne mukalenga wa bena Ejipitu.

¹⁹ Uvua mutukonke musangu wa kumpala ne: “Nudi ne tatuenu, nansha muanenu wa balume mukuabu anyi?”

²⁰ Tuetu kuandamuna ne: “Tatu udipu. Ukadi mukulumpe. Tudi kabidi ne muakunyetu wa mukala, uvua tatu mulele ku bukulakaja buende. Mukuluende, uvuaye mulonde, ukadi mufue. Muana awu mmushale amu nkayende wa ku bana ba mukaji uvua tatu mupite kunanga. Ke mudi tatu mumunange ne yeye mene bikole.”

²¹ Uvua mutulombe bua tufike ne muanetu awu bua wewe kumumona.

²² Nanku tuetu kukuambila ne: Muana awu kena mua kushiyangana ne tatuende to. Yeye mumuke, tatuende udi mua kufua ne kanyinganyinga.

²³ Wewe kutuandamuna ne: Panuikala kanuyi bafike ne muakunyenu awu, kanufiki kabidi kunu to.

²⁴ Ke tuetu kupingana kuetu, kulondela tatu, muntu webe, malu onsu auvua muambe.

²⁵ Pavua tatu utupingaja kuneku mbua kusumba biakudia,

²⁶ tuetu kubenga, tumuambila ne: “Mulombodi wa bena Ejipitu kena mua kutusumbisha biakudia, patudi katuyi baye ne muakunyetu ewu.”

²⁷ Tatu kutuandamuna ne: “Muena kuanyi Rakele, uvua mundelele bana ba balume amu babidi.

²⁸ Umue ukadi mujimine. Misangu mikuabu mbamudie kudi nyama, bualu katshia waya, tshiena mumumone to.

²⁹ Nuenu nudi basue kabidi kuya ne muana udi mushale ewu. Yeye mupete diakabi, ndi mua kufua ne kanyinganyinga, bualu nkadi muntu mukulumpe.”

³⁰ Pashishe Yuda kuambila kabidi Yozefe ne: — Tshiena mua kupingana kudi tatu, tshiyi ne nsongalume ewu to. Muoyi wa tatu udi anu kudi muana ewu.

³¹ Nanku udi mua kufua padiye kayi umona muanende. Kabidi netuikale bena tshibawu padi tatu ufua ku bukunda, muikale ne kanyinganyinga.

³² Bualu bukuabu: meme ke udi tatu mueyekele tshilumbu tshia muanende ewu. Mvua mujadikile tatu ne: “Meme tshiyi mupingane ne muana ewu, nenshale muena tshilumbu kashidi kuudi.”

³³ Nanku ndi nkusengelela ne: unkuate meme lukole, nshale mupika webe. Ulekele muana, apingane ne bana babu kuetu.

³⁴ Meme tshiyi ne muana ewu, tshiena mua kupingana kudi tatu to. Tshiena mua kukengesha tatu bikole nanku to.