Genese 40 - MUKANDA WA MYIDI MUKULU

¹ Malu onsu mamane kujika, dituku dikuabu bantu babidi bavua ne muanzu mu bukalenga bua Ejipitu, kuenzela mukalenga tshilema tshinene. Umue uvua mutangidi wa bantu bavua balongolola maluvu a mukalenga, mukuabu mutangidi wa bantu bavua balambila mukalenga biakudia.

² Mukalenga kubafikila munda bikole.

³ Kubeleshaye mu nzubu wa lukanu, kua Potifare, mu nzubu muvuabu balamine Yozefe.

⁴ Mulombodi wa bena lukanu, kupesha Yozefe bantu babidi abu bua kubalama. Bavua bashala mu lukanu mataku makumbane.

Yozefe udi ujingulula bena lukanu babidi bilota

⁵ Bena lukanu babidi abu, kulota bilota bishilangane dituku dimue.

⁶ Butshia dinda, Yozefe ufika bua kubatangila, kubasangana babungame.

⁷ Yozefe kubakonka ne: — Lelu nudi babungame nenku bua tshinyi?

⁸ Kumuandamunabu ne: — Tudi balote bilota, kadi tudi bapange muaba ewu muntu udi mua kutujinguluilabi. Yozefe kubambila ne: — Mvidi Mukulu nkayende ke udi mumanye mua kujingulula bilota. Kadi ndondelayi munudi balote.

⁹ Mutangidi wa bantu bavua balongolola maluvu a mukalenga, kuawila Yozefe tshilota tshiende, umuambila ne: — Ndi mulote: mmone mutshi wa maluvu a mvinyo kumpala kuanyi,

¹⁰ muikale ne matamba asatu. Matamba awu kusampila, kuela bilongu, kukuama tumuma tumane kuboba.

¹¹ Mvua kabidi ne dikopu dia mukalenga ku bianza. Mvua mpola tumuma atu, nkamina mayi mu dikopu adi bua kudipesha mukalenga.

¹² Yozefe kumuambila ne: — Dijingulula dia tshilota tshiebe didi nunku: matamba asatu adi aleja matuku asatu.

¹³ Papita matuku asatu, mukalenga neakufuile luse, neakuenzele bimpe bipite. Neampingaje ku mudimu webe. Neumupe maluvu bu muuvua wenza kale.

¹⁴ Pawapingana ku mudimu webe, umvuluke, ungakuile kudi mukalenga wa bena Ejipitu, bua ampatule mu nzubu wa lukanu emu.

¹⁵ Mbangumushishe ku bukole kuetu ku bena Ebrewu. Mbamfikishe kunu, bangela mu nzubu wa lukanu, tshiyi ne bualu bundi muenze.

¹⁶ Mutangidi wa balambi ba biakudia bia mukalenga umvua ne: Yozefe mmujingulule tshilota atshi bimpe bitambe, kuambilaye Yozefe ne: — Meme kabidi mvua mulote tshianyi tshilota. Mu tshilota tshianyi, mvua muambule mu mutu bisaka bisatu bia mampa.

¹⁷ Mu tshisaka tshivua pa mutu pa bionsu, muvua mikata tente ivua mukalenga munange. Kadi nyunyi ya mulu kulua kuzokola mikata ayi mu tshisaka pavuatshi pa mutu wanyi.

¹⁸ Yozefe kumuambila ne: — Dijingulula dia tshilota tshiebe didi nunku: bisaka bisatu bidi bileja matuku asatu.

¹⁹ Papita matuku asatu, mukalenga neabandishe mutu webe, akulembeleje ku mutshi mule. Nyunyi neyizokole munyinyi webe.

²⁰ Matuku asatu akumbana, mukalenga kuenza tshibilu tshia diledibua diende. Kulambishilaye balombodi ba mu bukalenga buende bonsu biakudia. Mukalenga kubandisha bena lukanu babidi abu milongu, bantu bonsu aba batangile: ke mutangidi wa balongolodi ba maluvu a mukalenga, ne mutangidi wa balambi ba biakudia bia mukalenga.

²¹ Mukalenga kupingaja mutangidi wa balongolodi ba maluvu ku mudimu wende, bua amupe tshiakabidi dikopu mu bianza.

²² Kadi kuowaye mutangidi wa balambi ba biakudia bia mukalenga. Bionsu kuenzeka amu muvua Yozefe muambe.

²³ Kadi mutangidi wa balongolodi ba maluvu a mukalenga, uvua mupue Yozefe muoyi kashidi.