Genese 32 - MUKANDA WA MYIDI MUKULU

¹ Butshia Labane ubika ne dinda dionsu, kulayanganaye ne bana bende pamue ne bikulu bende bonsu. Kubajingila dikasa dimpe. Kupinganaye kuende.

Yakobe udi udilongolola bua kumonangana ne Esawu

² Yakobe kutungunuka ne luendu, kusambakenaye ne batumibue ba Mvidi Mukulu.

³ Yakobe ubamona, kuelaye diyi dikole wamba ne: — Muaba ewu mmitanda ya Mvidi Mukulu. Kuinyikaye muaba awu ne: Mahanayime.

⁴ Ke Yakobe kudianjila kutuma bantu bende ne mukenji, bua kumonangana ne mukuluende Esawu, uvua mu mpata ya Edome mu ditunga dia Seyire.

⁵ Yakobe kuelela bantu bavuaye mutume abu mukenji ne: — Numanyishe Esawu ne: “Muena mudimu webe Yakobe udi ukuambila ne: meme mvua kua Labane matuku onsu awu. Mpindiewu ndi musue kupingana.

⁶ Ndi ne ngombe, mpunde, mikoku, mbuji ne bapika balume ne bakaji. Ndi ntuma bantu banyi ne mukenji kuudi wewe mukuluanyi, mukalenga wanyi, bua ungakidile bimpe.”

⁷ Bantu bavua Yakobe mutume ne mukenji bua kumonangana ne Esawu, kupinganabu, bambila Yakobe ne: — Tuamonanganyi ne mukuluebe Esawu. Udi ulonda ne bantu nkama inayi bua kusambakena nebe.

⁸ Yakobe kupampakana bikole, bowa kumuenzabu. Kutekaye bantu bavuaye nabu, mikoku, mbuji, ngombe ne tumelu mu bisumbu bibidi bibidi.

⁹ Kuelaye meji ne: “Pikala Esawu mua kubunda tshisumbu tshimue mvita, tshikuabu netshimunyeme.”

¹⁰ Yakobe kutendelela Mvidi Mukulu, wamba ne: — Mvidi Mukulu wa kaku wanyi Abrahame, ne wa tatu wanyi Izake, unteleje! Uvua mungambile ne: “Upingane kuenu mu ditunga dienu. Meme nenkulame, neupete dikasa dimpe.”

¹¹ Maweja-Nangila, tshiena mukumbanyine dikasa dimpe diwudi muntutshishe meme, muena mudimu webe, kuyi upungila. Bualu mvua musabuke musulu wa Yardene ewu anu ne dikombu. Kadi mpindiewu nkadi ne bintu bisumbu bibidi ebi.

¹² Nanku ndi nkutendakena ne: unsungidile kudi mukuluanyi Esawu. Ndi ne bowa, bualu udi mua kumbutula ne bakaji ne bana.

¹³ Wewe uvua mundaye ne: “Nenkulame, neupete dikasa dimpe. Nemvudije ndelanganyi yebe bu lusenga lua ku muelelu wa mayi manene, ludi muntu kayi mua kubala.”

¹⁴ Yakobe kulala muaba awu. Kusungulaye bimuna biende bikuabu bua kupesha mukuluende Esawu:

¹⁵ ke mashina a mbuji nkama ibidi ne mpumbu makumi abidi; mikoku ya mashina nkama ibidi ne ya bimpanga makumi abidi;

¹⁶ tumelu tukaji makumi asatu, ne bana batu batshidi bamua mabele; ngombe mikaji makumi anayi, ne ngombe milume dikumi; mpunde mikaji makumi abidi, ne mpunde milume dikumi.

¹⁷ Yakobe kuabanyina bena mudimu bende bimuna abi. Muena mudimu yonsu uvua ne tshiende tshisumbu. Kubambilaye ne: — Dianjilayi kumpala. Nuikale bashilangane mutantshi ku tshisumbu ne ku tshisumbu.

¹⁸ Pashishe kuambilaye muena mudimu uvua ne tshisumbu tshia kumpala ne: — Wewe musambakene ne mukuluanyi Esawu, yeye mukuebeje ne: “Udi muena mudimu wa nganyi? Udi uya penyi? Bimuna bionsu ebi mbia nganyi?”

¹⁹ Umuandamune ne: “Mbia muena mudimu webe Yakobe. Bintu ebi ke mulambu udiye ukutumina wewe, mfumuende Esawu. Yakobe muine udi utulonda panyima apa.”

²⁰ Balami ba tshisumbu tshibidi, ba tshisatu ne bonsu bavua balonda panyima, Yakobe uvua mubambile anu meyi a mushindu umue, usakidila kabidi ne: — Panuasambakena ne mukuluanyi Esawu,

²¹ numuambile ne: “Muena mudimu webe Yakobe udi ulonda panyima apa.” Yakobe uvua udiabakena ne: “Bintu bindi mutume ebi, mbua kutuyisha tshiji tshia mukuluanyi Esawu. Nanku patuikala mua kumonangana nende, misangu mikuabu udi mua kungakidila ne disanka.”

²² Yakobe mumane kutumina Esawu milambu, kushalaye mulale muaba awu butuku abu.

Yakobe udi uluangana ne Mvidi Mukulu

²³ Butuku abu, Yakobe ubika, kuangataye bakaji bende babidi, ne bana bende dikumi ne umue. Kubasabulaye musulu wa Yaboke ku dilobu.

²⁴ Kusabulaye ne bintu bionsu bivuaye nabi.

²⁵ Yakobe kushala nkayende dishiya. Muntu kampande kuluangana nende mvita too ne muatshi butuku.

²⁶ Muluishi awu umo na ne: Yakobe mmumpite bukole, kutuutaye Yakobe ku tshikundukundu, kutshikoyobola.

²⁷ Pashishe muntu kampande awu kuambila Yakobe ne: — Ndekela nya, bualu butuku mbumane kutshia. Yakobe kuandamuna ne: — Bua meme kukulekela amu wewe mungele lupemba.

²⁸ Yeye awu kukonka Yakobe ne: — Dina diebe nnganyi? Yakobe kumuandamuna ne: — Ndi Yakobe.

²⁹ Yeye awu kuambila Yakobe ne: — Kabakukubikila kabidi ne: Yakobe to. Nebakubikile ne: Izrayele. Bualu udi muluangane mvita ne Mvidi Mukulu, muluangane kabidi ne bantu, wewe kubatshimuna.

³⁰ Yakobe kumuebeja ne: — Kadi wewe mene, dina diebe nnganyi? Kampande awu kumuandamuna ne: — Udi musue kumanya dina dianyi bua tshinyi? Pashishe kuelaye Yakobe lupemba.

³¹ Yakobe kuamba ne: — Ndi nginyika muaba ewu dina ne: Penuyele, mpala wa Mvidi Mukulu, bualu ndi mumonangane ne Mvidi Mukulu mpala ne mpala, meme kushala ne muoyi.

³² Diba dipatuka, Yakobe kumuka ku dilobu dia Penuyele, wenda utebuka, bualu tshikundukundu tshivua tshikoyoboke.

³³ Ke padi bena Izrayele kabayi badia munyinyi wa mu tshikundukundu tshia nyama too ne ku lelu, bualu bavua bakoyobole Yakobe tshikundukundu.