Genese 19 - MUKANDA WA MYIDI MUKULU

Lote udi upanduka ku kabutu ka Sodome ne Ngomore

¹ Batumibue babidi kufikamu Sodome dilolu. Kusanganabu Lote musombe ku tshibuelelu tshia tshimenga. Lote ubamona, kujukaye bua kubakidila. Kuinyikaye mutu panshi, wamba ne:

² — Bakalenga banyi, bu nuenu basue, kanupitshi to. Tuyayi ku mbelu. Nowa mayi ku makasa, nulale. Patshiabu dinda nenutungunuke ne luendu luenu. Bobu kuandamuna ne: — Tudi tulala anu pambelu muaba utudi ewu.

³ Kadi Lote kubasengelela bikole. Nanku bobu kuanyisha bua kuya ku nzubu kuende. Lote kubalambila biakudia, kuboshila mikata, kudiabu.

⁴ Bantu kabayi banji kulala, bantu balume bonsu ba mu musoku, bakulumpe ne bansongalume kunyungulula nzubu wa Lote.

⁵ Bavua bela mbila bamukonka ne: — Bantu balume bavua bafika kuebe dilolu edi badi penyi? Bapatula bualu tudi basue bikale bakaji betu.

⁶ Lote kupatuka mu nzubu, kuinjila tshiibi,

⁷ kubambila ne: — Bana betu, ndi nnusengelela ne: kanuenzedi bantu aba bibi nanku to.

⁸ Angatayi nansha nsongakaji yanyi ibidi eyi. Kayena mianji kumanyangana ne balume to. Nenyipatule pambelu, nuenze nayi bu munudi basue. Kadi bantu balume aba mbenyi banyi, bandi ne bua kulama bimpe. Kanubenzedi bibi to.

⁹ Kadi bena ditunga kukanyina Lote, bamba ne: — Umuke apa. Wewe kabidi udi anu muenyi mu ditunga dietu. Muukadi ututumina diyi mbishi? Umanye ne: netukuenzele bibi bipite bia bantu aba. Kusakilabu Lote bikole, kusemenabu pabuipi ne nzubu bua kutula tshiibi.

¹⁰ Kadi batumibue babidi kukoka Lote, kumubueja mu nzubu, kukanga tshiibi.

¹¹ Pashishe kufofomijabu mesu a bonsu bavua ku tshiibi, bansongalume ne bantu bakole, bua bapange kumona tshiibi.

¹² Batumibue babidi abu kuambila Lote ne: — Pawikala ne bena diku diebe bakuabu muaba ewu, nansha ne baku bebe, bana bebe ba balume ne ba bakaji, umuke nabu mu tshimenga etshi.

¹³ Bualu Maweja-Nangila mmumane kumvua lumu lua buenzayi bua bena tshimenga etshi, mututume bua kutshibutula.

¹⁴ Lote kuya kuambila baku bende, bavua babangile bana bende ba bakaji, ne: — Jukayi lukasa, numuke mu tshimenga etshi, bualu Maweja-Nangila mmusue kutshibutula. Kadi baku bende kuela meji ne: udi wamba bilele.

¹⁵ Pa kabundubundu batumibue abu kusamina Lote, bamba ne: — Jukayi lukasa, angata mukajebe ne bana bebe ba bakaji babidi. Tuyayi bua kanuvu kubutuka pamue ne tshimenga etshi.

¹⁶ Kadi Lote uvua anu ujingakana. Bantu abu kumukuata ku tshianza, kukuata kabidi ne mukajende, ne bana bende ba bakaji babidi kubapatula mu tshimenga. Bualu Maweja-Nangila uvua musue kusungidila Lote.

¹⁷ Bobu bamane kupatuka mu ditunga, mutumibue wa Mvidi Mukulu mukuabu kuambila Lote ne: — Nyema, kolesha bua kudipandisha. Kutangidi panyima, kuimanyi pa muaba. Uye kusokoma ku mukuna bua kuvu kubutuka.

¹⁸ Lote kumusengelela ne: — Mukalenga, kabienzeki nanku to!

¹⁹ Ukadi mumane kumfuila luse, nangananga paudi mumpatule mu tshimenga etshi bua kumpandisha. Kadi meme tshiena mua kufika ku mukuna, diakabi adi kadiyi dianji kunkuata, bualu kuaka nkupite bule. Ndi mua kufuila mu njila.

²⁰ Kadi anyisha bua meme kunyemena mu kasoku kaudi umona pabuipi apa, bualu nkakese. Nanku nempande pamue ne bena kasoku aka.

²¹ Mutumibue wa Mvidi Mukulu kuitaba ne: — Mbimpe, ndi nganyisha kabidi biudi wamba. Tshiena mbutula kasoku aka to.

²² Kadi nyema, kolesha ubutame mu kasoku aka. Tshiena mua kuenza bualu, wewe kuyi muanji kufikamu. (Ke padibu binyika kasoku aka ne: Soware.)

²³ Butshia, Lote kufika mu Soware.

²⁴ Diba adi Maweja-Nangila kulokesha mu Sodome ne Ngomore mvula wa kapia kakole ka mfundanga, kela ndimi.

²⁵ Mvula awu kubutula bimenga bionsu bibidi, kushipa bantu, kunyanga ditunga ne madimi mene kashidi.

²⁶ Mukaji wa Lote kutangila panyima. Kuandamukaye lupingu lua luepu.

²⁷ Butshia pa kabundubundu Abrahame kuya muaba uvuabu bimane ne Maweja-Nangila.

²⁸ Utangila ditunga dijima dia Sodome ne Ngomore, kumonaye muinshi ubanda mulu bu wa tshikutu tshia kapia.

²⁹ Pavua Mvidi Mukulu ubutula Sodome ne Ngomore, uvua anu muvuluke Abrahame. Ke nuwuaye mupandishe Lote.

Lote ne bana bende ba bakaji

³⁰ Lote uvua ne buowa bua kushala mu Soware. Ke nuwuaye mumuke ne bana bende ba bakaji babidi bua kuya kusokoma nabu mu lubuebue pa mikuna.

³¹ Dimue dituku, muanende wa bakaji muanabute, kuambila muakunyi ne: — Tatu ukadi mununu. Mu ditunga dijima edi kamuena muntu udi mua kutusela, tuetu kubuela mu dibaka mudi bantu bonsu benza.

³² Nanku tunuishe tatu wetu maluvu. Pakuatshikaye, tuangatangane nende bua tumulelele bana.

³³ Butuku abu kumushabu tatuabu maluvu. Muanabute kusomba nende. Tatuabu kavua mumanye bionsu bivua bienzeka abi to.

³⁴ Butshia muanabute kuambila muakunyende ne: — Ngaladi ne tatu butuku ebu. Tumunuishe kabidi maluvu lelu. Pakuatshikaye, umanyangane pebe nende bua tumulelele bana.

³⁵ Butuku abu kumushabu tatuabu maluvu tshiakabidi. Muana muakunyi kulala nende. Kadi tatuabu kavua mumanye bionsu bivua bienzeka abi to.

³⁶ Bana ba bakaji babidi ba Lote kuimita mafu a kudi tatuabu.

³⁷ Muanabute kulela muana wa balume, kumuinyika dina ne: Mowabe. Yeye ke nkambua wa bena Mowabe batudi nabu lelu.

³⁸ Muana muakunyi pende kulela muana wa balume, kumuinyika dina ne: Bene-Ammi. Yeye ke nkambua wa bena Amone batudi nabu lelu.