Genese 11 - MUKANDA WA MYIDI MUKULU

Kaleya ka Bahele

¹ Mu tshikondu atshi bantu bonsu ba pa buloba bavua bakula anu muakulu umuepele.

² Kadi bumuke ku luseke ludi diba dipatukila, kusanganabu mpata munene mu ditunga dia Babilone. Kuasabu muaba awu.

³ Kuambilanganabu ne: “Tuenzayi tushole, tuoshe!” Bavua basa nzubu ne tushole, bibake pamue ne kabudimbu.

⁴ Kuambilanganabu kabidi ne: “Tuasayi tshimenga tshikale ne kaleya katumbuke mulu bua tupete lumu lunene. Nanku katuakumuangalaka pa buloba bujima to.”

⁵ Maweja-Nangila kupueka bua kubandila tshimenga ne kaleya bivua bantu abu base.

⁶ Ke Maweja-Nangila kukema, wamba ne: “Bu mudi bantu aba bikale tshisamba tshimue, bakula muakulu umuepele, ke padibu batuadije kudienzela malu. Bidi bimueka ne: kakuena tshidi mua kubakolela kabidi.

⁷ Nanku tuyayi kubondakaja muakulu wabu, bua bapange mua kumyuangana munkatshi muabu.”

⁸ Maweja-Nangila kubamuangalaja pa buloba bujima. Kulekelabu diasa dia tshimenga.

⁹ Badi babikila tshimenga atshi ne: Babele, bualu Maweja-Nangila uvua mubondakajilamu miakulu ya bisamba bionsu. Kabidi uvua mumuangalajilamu bantu pa buloba bujima.

Ndelanganyi ya Sheme

¹⁰ Ndelanganyi ya Sheme idi nunku: mayi a tshipupu mamane kukama, kupita bidimu bibidi, Sheme kukumbaja bidimu lukama, kulela Arpakshade.

¹¹ Sheme mumane kulela Arpakshade, kushalaye kabidi ne muoyi bidimu nkama itanu. Kulelaye balume ne bakaji.

¹² Arpakshade mumane kukumbaja bidimu makumi asatu ne bitanu, kulelaye Shela.

¹³ Kushalaye kabidi ne muoyi bidimu nkama inayi ne bisatu. Kulelaye balume ne bakaji.

¹⁴ Shela mumane kukumbaja bidimu makumi asatu, kulelaye Ebere.

¹⁵ Kushalaye kabidi ne muoyi bidimu nkama inayi ne bisatu. Kulelaye balume ne bakaji.

¹⁶ Ebere mumane kukumbaja bidimu makumi asatu ne binayi, kulelaye Pelega.

¹⁷ Kushalaye kabidi ne muoyi bidimu nkama inayi ne makumi asatu. Kulelaye balume ne bakaji.

¹⁸ Pelega mumane kukumbaja bidimu makumi asatu, kulelaye Reyu.

¹⁹ Kushalaye kabidi ne muoyi bidimu nkama ibidi ne tshitema. Kulelaye balume ne bakaji.

²⁰ Reyu mumane kukumbaja bidimu makumi asatu ne bibidi, kulelaye Seruga.

²¹ Kushalaye kabidi ne muoyi bidimu nkama ibidi ne muanda mutekete. Kulelaye balume ne bakaji.

²² Seruga mumane kukumbaja bidimu makumi asatu, kulelaye Nahore.

²³ Kushalaye kabidi ne muoyi bidimu nkama ibidi. Kulelaye balume ne bakaji.

²⁴ Nahore mumane kukumbaja bidimu makumi abidi ne tshitema, kulelaye Tera.

²⁵ Kushalaye kabidi ne muoyi bidimu lukama dikumi ne tshitema. Kulelaye balume ne bakaji.

²⁶ Tera mumane kukumbaja bidimu makumi muanda mutekete, kulelaye Abrame, Nahore ne Arane.

²⁷ Ndelanganyi ya Tera, tatuende wa Abrame, wa Nahore ne wa Arane idi nunku: Arane kulela Lote.

²⁸ Kadi, patshivua Tera ne muoyi, Arane kutuila mu Ure wa bena Babilone, ditunga dia bankambua babu.

²⁹ Abrame ne Nahore kusela bakaji: dina dia mukaji wa Abrame divua Sarayi, dia mukaji wa Nahore divua Milka. Milka ne Iska bavua bana ba Arane.

³⁰ Kadi Sarayi uvua nkumba.

³¹ Tera kuangata muanende Abrame, Lote muana wa muanende Arane ne Sarayi mukaji wa Abrame. Kumuangalaye nabu mu ditunga dia Ure wa bena Babilone, kuya kuasa mu ditunga dia Kenaane. Kusombabu mu tshimenga tshia Arane.

³² Tera kushala ne muoyi bidimu nkama ibidi ne bitanu, kufuila mu Arane.