Genese 10 - MUKANDA WA MYIDI MUKULU

Ndelanganyi ya bana ba Nowa

¹ Bana ba balume ba Nowa: Sheme, Kame ne Yefete ke badi bavudija ndelanganyi, mayi a tshipupu mamane kukama.

² Bana ba balume ba Yefete badi: Ngomere, Magoge, Madayi, Yavane, Tubale, Mesheke ne Tirase.

³ Ngomere kulela bana ba balume aba: Ashekenaze, Rifate ne Togarma.

⁴ Yavane kulela bana ba balume aba: Elisha, Tarshishe, Kitime ne Rodanime.

⁵ Bisamba bionsu bidi bitangalaka mu bidila nansha ku mielelu ya mayi manene mbifume ku ndelanganyi ya bana aba. Ke muvua ndelanganyi ya Yefete nanku. Muntu yonsu uvua musombe mu ditunga diabu, mu tshisamba tshiabu, wakula muakulu wa ditunga diabu.

⁶ Bana ba balume ba Kame badi: Kushe, Misrayime, Pute ne Kenaane.

⁷ Kushe kulela bankambua ba bena Seba, Avila, Sabta, Ragma ne Sabteka. Ragma kulela bankambua ba bena Saba ne bena Dedane.

⁸ Kushe kulela kabidi Nimrode, tshilobu tshia kumpala tshivua tshidia bumfumu mu matunga a bende.

⁹ Uvua kabidi tshilembi tshia bushuwa, muikale ne bukole bua kudi Maweja-Nangila. Biakashala bu makumbu ne: “Maweja-Nangila akuambuluishe bua wikale tshilembi bu Nimrode.”

¹⁰ Bimenga binene bia kumpala bivua ku bumfumu buende bivua: Bahele, Ereke, Akade ne Kalne mu ditunga dia Babilone.

¹¹ Kumukaye mu ditunga adi, kuyaye mu Ashure. Kuasaye tshimenga tshia Ninive, tshia Reyobote-Ire, ne tshia Kela.

¹² Pankatshi pa Ninive ne tshimenga tshinene tshia Kela kuasaye kabidi Resene.

¹³ Misrayime kulela bisamba ebi: bena Lude, bena Aneme, bena Lehabe, bena Naftu,

¹⁴ bena Patrose, bena Kaslu ne bena Kaftore. Bobu ke bankambua ba bena Peleshete.

¹⁵ Kenaane kulela bana ba balume babidi: Sidone muanabute, ne muakunyende Ete.

¹⁶ Kulelaye kabidi bankambua ba bena Yebusa, bena Amore, bena Ngirgashi,

¹⁷ bena Ivi, bena Arki, bena Sini,

¹⁸ bena Arvadi, bena Semari ne bena Amati. Pashishe meku a bena Kenaane kutangalakawu.

¹⁹ Mukalu wa bena Kenaane uvua mutuadije ku Sidone too ne ku Ngerare pa buipi ne Ngaza. Mmutuadije kabidi ku Sodome ne Ngomore, too ne ku Adma ne Seboyime pabuipi ne Lesha.

²⁰ Ke muvua ndelanganyi ya bana ba Kame nanku. Muntu yonsu uvua musombe mu ditunga diabu, mu tshisamba tshiabu, wakula muakulu wa ditunga diabu.

²¹ Sheme, mukulu wa Yefete, kulela bana. Udi nkambua wa bena Ebere bonsu.

²² Bana ba balume ba Sheme badi: Elame, Ashure, Arpakshade, Lude ne Arame.

²³ Arame kulela bana ba balume aba: Use, Ule, Ngetere ne Masha.

²⁴ Arpakshade kulela Shela, Shela kulela Ebere.

²⁵ Ebere kulela bana ba balume babidi: muanabute dina diende Pelega, bualu mu matuku ende ke muvua ditapulukangana dituadija munkatshi mua bantu. Dina dia muana muibidi divua Yoktana.

²⁶ Yoktana kulela bankambua ba bena Almodade, bena Shelefe, bena Asharmavete, Yera,

²⁷ Adorame, Uzale, Dikla,

²⁸ Obale, Abimayele, Saba,

²⁹ Ofire, Avila ne Yobabe.

³⁰ Bavua basombe ku mikalu ya Mesha too ne ku Sefera, ne ku mikuna mile ya kudi diba dipatukila.

³¹ Ke muvua ndelanganyi ya Sheme nanku. Muntu yonsu uvua musombe mu ditunga diabu, mu tshisamba tshiabu, wakula muakulu wa ditunga diabu.

³² Ebi ke bisamba bionsu bidi bitumbisha Nowa biamba ne: Udi nkambua wetu, bilondeshile ku meku abu ne ku bisamba biabu. Bisamba bionsu bivua bimuangalaka pa buloba, mayi a tshipupu mamane kukama, mbifume anu kudi Nowa.