Ekesode 7 - MUKANDA WA MYIDI MUKULU

¹ Maweja-Nangila kuambila Moshe ne: — Wewe newikale bu Mvidi Mukulu ku mesu kua mukalenga wa bena Ejipitu. Muanenu Arone neakuenzele mudimu wa buambi.

² Newambile Arone malu onsu andi mukuambile, bua aye kumanyisha mukalenga wa bena Ejipitu, bua anyishe bena Izrayele bumuke mu ditunga diende.

³ Kadi meme nempeshe mukalenga wa bena Ejipitu muoyi wa tshitunu. Nengenze malu a dikema mavule mu ditunga diende.

⁴ Kadi kakuitaba to. Nanku nemmuenzeje malu ku bukole. Nemmunyoke, bua mmone mua kupatula tshisamba tshianyi tshia bena Izrayele balondangane bimpe mu bisamba biabu mu ditunga diende.

⁵ Bena Ejipitu nebajadike ne: Meme ndi Maweja-Nangila, bualu nembenzeje ku bukole bua balekele bena Izrayele baye.

⁶ Moshe ne Arone kukumbaja bionsu bivua Maweja-Nangila mubambile.

⁷ Pavua Moshe ne Arone baya kuyukila ne mukalenga wa bena Ejipitu, Moshe uvua ne bidimu makumi muanda mukulu, Arone ne bidimu makumi muanda mukulu ne bisatu.

Mukalenga wa bena Ejipitu kena uteleja Moshe ne Arone

⁸ Maweja-Nangila kuambila Moshe ne Arone ne:

⁹ — Pikala mukalenga wa bena Ejipitu ujinga bua numuenzele bishima, wewe Moshe wambile Arone ne: ela dikombu diebe panshi. Nanku nediandamuke nyoka, mukalenga awu mumone.

¹⁰ Moshe ne Arone kuya kudi mukalenga wa bena Ejipitu, kuenza muvua Maweja-Nangila muambe. Arone kuela dikombu panshi, mukalenga ne bantu batangile. Dikombu kuandamuka nyoka.

¹¹ Mukalenga wa bena Ejipitu kubikila bena meji ne benji ba bilengulengu ne majimbu ba mu Ejipitu. Kuenzabu pabu tshishima atshi.

¹² Muntu yonsu kuela dikombu diende panshi. Kuandamukadi nyoka. Kadi dikombu dia Arone kumina makombu abu onsu.

¹³ Kadi mukalenga wa bena Ejipitu uvua anu ne tshitunu. Kubengaye diyi dia Moshe ne dia Arone, bu muvua Maweja-Nangila mumane kuamba.

Dikenga dia kumpala dia bena Ejipitu: mayi adi andamuka mashi

¹⁴ Maweja-Nangila kuambila Moshe ne: — Mukalenga wa bena Ejipitu udi ne tshitunu. Kena musue kulekela bena Izrayele bumuke ku bupika to.

¹⁵ Angata dikombu diebe divua diandamuka nyoka adi, uye nadi dinda dionsu ku muelelu wa musulu wa Nile, diba didi mukalenga upuekelamu. Uye kuimana kumpala kuende.

¹⁶ Umuambile ne: “Maweja-Nangila, Mvidi Mukulu wa bena Ebrewu, mmuntume kuudi bua wanyishe bena Izrayele baye mu tshipela bua kuntendelela. Kadi katshia nkumanyisha bualu ebu too ne mpindiewu kuena musue kuitaba.

¹⁷ Nanku Maweja-Nangila udi wamba ne: Mpindiewu neujadike bukole buanyi! Ndi ntuuta dikombu edi pa musulu wa Nile, bua mayi onsu andamuke mashi.

¹⁸ Minyinyi yonsu ya mu mayi neifue. Mayi neanunke mupuya mubi. Bena Ejipitu kabakunua kabidi mayi awu to.”

¹⁹ Maweja-Nangila kuambila Moshe ne: — Ambila Arone ne: angata dikombu diebe, olola tshianza ku mutu kua mayi onsu a mu Ejipitu, adi mu misulu, adi mu tusulu tukese ne adi mu majiba. Mayi onsu andamuke mashi. Mashi neikale mu ditunga dijima dia Ejipitu too ne mu nguvu ne mu mabungu.

²⁰ Moshe ne Arone kuenza muvua Maweja-Nangila muambe. Arone kutuuta dikombu pa musulu wa Nile. Mayi onsu kuandamuka mashi, mukalenga wa bena Ejipitu ne bantu bende bamone.

²¹ Minyinyi ya mu mayi yonsu kulua. Mayi a mu musulu wa Nile kununka mupuya mubi, bena Ejipitu kabayi mua kunua mayi awu kabidi to. Mashi avua mu ditunga dionsu dia Ejipitu.

²² Benji ba bilengulengu kuenza pabu tshishima atshi ku majimbu abu. Nanku mukalenga wa bena Ejipitu uvua anu ne tshitunu. Kubengaye diyi dia Moshe ne Arone bu mu-vua Maweja-Nangila mudianjile kuamba.

²³ Mukalenga wa bena Ejipitu kubela nyima, upingana kuende. Kulengululaye bualu abu.

²⁴ Bu muvua bena Ejipitu bonsu kabayi mua kunua mayi a mu musulu wa Nile, kumbulabu biina ku muelelu wa musulu awu bua kupeta mayi a kunua.

²⁵ Maweja-Nangila mumane kunyanga musulu wa Nile, matuku muanda mutekete kupita nanku.

Dikenga dibidi: ndimba

²⁶ Ke Maweja-Nangila kutuma Moshe kudi mukalenga wa bena Ejipitu bua kumuambila ne: — Maweja-Nangila udi wamba ne: “Anyishe bena Izrayele baye kutendelela.

²⁷ Wewe mubenge, neanyoke ditunga diebe, neatume ndimba miaba yonsu.

²⁸ Mu musulu wa Nile nemuikale ndimba mipite bungi. Neyibuele mu nzubu muebe, nansha mu nzubu webe wa bulalu too ne pa bulalu buebe. Neyibuele kabidi mu nzubu ya bena mudimu bebe ne ya bantu bebe bonsu. Ndimba neikale ne mu miaba idibu balambila, too ne mu binu bia kutuila.

²⁹ Neyikubande pambidi kabidi ne pambidi pa bena mudimu bebe ne pa bantu bebe bonsu.”