Ekesode 5 - MUKANDA WA MYIDI MUKULU

Moshe ne Arone badi bamonangana ne mukalenga wa bena Ejipitu

¹ Malu onsu aa mamane kupita, Moshe ne Arone kuambila mukalenga wa bena Ejipitu ne: — Maweja-Nangila Mvidi Mukulu wa bena Izrayele udi wamba ne: “Ulekele bantu banyi, baye kuenza tshibilu mu tshipela bua kuntendelela.”

² Mukalenga wa bena Ejipitu kubandamuna ne: — Maweja-Nangila nnganyi? Meme tshiena mumanye Maweja-Nangila bua meme kuitaba diyi diende. Tshiena ndekela bena Izrayele baye to!

³ Moshe ne Arone kuandamuna mukalenga ne: — Mvidi Mukulu wa bena Ebrewu mmutumuenekele. Tudi tukulomba ne: wanyishe bua tuye mu tshipela, tuende luendu lua matuku asatu bua kulambula Maweja-Nangila Mvidi Mukulu wetu milambu. Bualu patudi katuyi tuenza nanku, udi mua kututumina disama dia tshiambu tshikole, nansha kutushipa ku muele wa mvita.

⁴ Mukalenga wa bena Ejipitu kuandamuna ne: — Wewe Moshe ne Arone, lekelayi kupumbisha bantu bua kuenzabu mudimu. Pinganayi ku midimu yenu.

⁵ Bena Izrayele mbapite bungi. Munudi nubapumbisha mua kuenzabu midimu yabu mbishi?

Mukalenga wa ditunga udi ukengesha bena Izrayele ne midimu mivule

⁶ Anu dituku adi, Mukalenga wa bena Ejipitu kukandika bena Ejipitu ne bena Izrayele, bavua ne kulombola mudimu wa bantu ne:

⁷ — Kanuena mua kukebela kabidi bena Izrayele bisosa bia kuenza nabi madiotu, bu munuvua nubapesha kuonsu eku to. Batukebele bisosa bobu nkayabu.

⁸ Kadi kanukepeshi mudimu wabu. Benze madiotu anu bungi bua tshibidilu, bualu mbena lulengu. Ke padibu bandomba bua kuya kulambula Mvidi Mukulu wabu milambu.

⁹ Nubenzeje mudimu mukole, bua bapange mua kuteleja meyi a bena dishima.

¹⁰ Nanku bena Ejipitu ne bena Izrayele bavua ne bua kulombola mudimu wa bantu, kupatukabu ku nzubu wa bukalenga, kuambilabu bena Izrayele ne: — Ke bidi mukalenga wa bena Ejipitu wamba ebi ne: Tshiena nnupesha kabidi bisosa to.

¹¹ Nudikebele bisosa nkayenu kuonsu kunudi basue. Nuenze madiotu anu bungi bua tshibidilu. Kabakepeshi mudimu wenu to.

¹² Bena Izrayele kumuangalaka mu Ejipitu, benda badikebela bisosa.

¹³ Batangidi ba mudimu awu, kubambika bena Izrayele bua benze madiotu anu bungi bua tshibidilu, muvuabu benza matuku onsu pavuabu babapesha bisosa.

¹⁴ Bena mudimu ba mukalenga wa bena Ejipitu kutuuta bena Izrayele bavua benzeja bantu mudimu, babambila ne: “Bua tshinyi kanuena benze madiotu bungi bua tshibidilu bu munuvua nuenza matuku onsu?”

¹⁵ Bena Izrayele bavua benzeja bantu mudimu kuyabu kudidila mukalenga wa bena Ejipitu, bamba ne: — Mukalenga, tuetu tudi bena mudimu bebe. Udi unkengesha nunku bua tshinyi?

¹⁶ Bantu bebe mbenze tshilema. Badi batukuma, batuamba bua kuenza madiotu. Kadi kabena batupa bisosa bia kuenza nabi mudimu wa madiotu to.

¹⁷ Mukalenga wa bena Ejipitu kubandamuna ne: — Nuenu, nudi bena lulengu ba kalandamusenga. Ke panudi nundomba bua kuya kulambula Maweja-Nangila milambu.

¹⁸ Nanku pinganayi ku midimu yenu. Kabena banupesha bisosa to. Nuenze madiotu anu bungi bua tshibidilu.

¹⁹ Nanku bena Izrayele bavua ne mudimu wa kutangila bantu, pakumvuabu ne: “Nuenze madiotu anu bungi bua tshibidilu, bu munuvua nuenza matuku onsu patuvua tunupa bisosa, kupangabu tshia kuenza.”

²⁰ Bashiyangane ne mukalenga wa bena Ejipitu, kumonanganabu ne Moshe ne Arone bavua babindile.

²¹ Kuambilabu Moshe ne Arone ne: — Maweja-Nangila mmumone bionsu ebi. Neanunyoke, bualu tuetu katuena kabidi ne mushinga kudi mukalenga wa bena Ejipitu ne kudi bantu bende. Nudi batukebele dikenga ne lulu.

²² Moshe kupingana kudi Maweja-Nangila, umuebeja ne: — Maweja-Nangila wanyi, udi mukengeshe bantu aba bua tshinyi? Wakututuma kudibu bua tshinyi?

²³ Katshia mfika kudi mukalenga wa bena Ejipitu bua kumuambila malu mu dina diebe, udi amu ukengesha bena Izrayele bikole. Wewe udi anu mupuwe, kuyi ubasungila!