Ekesode 40 - MUKANDA WA MYIDI MUKULU

Badi bimanyika ntenta, bamujidila

¹ Maweja-Nangila kuambila Moshe ne:

² — Dituku dia kumpala dia ngondu wa kumpala, wimanyike ntenta wa kusambakena, ne nzubu wa tshijila.

³ Batekemu mushete wa ndondu, baujika ne tshilamba tshilembeleja, bua kabaumonu kudi bantu to.

⁴ Mu ntenta amu, utekemu mesa a tshijila, mikale ne mampa a kundambula meme Mvidi Mukulu. Utekemu kabidi tshitekelu tshia miendu. Utemeshe miendu ayi.

⁵ Bateke tshilambuilu tshia tshiamu tshia mpawungi bua kuosha manananshi. Utshiteke kumpala kua mushete wa ndondu. Ulembeleje tshilamba mu mushiku wa mbelu wa nzubu wa tshijila.

⁶ Uteke tshilambuilu tshia milambu ya kuosha kumpala kua mushiku wa mbelu wa ntenta wa kusambakena.

⁷ Pankatshi pa ntenta wa kusambakena ne tshilambuilu bateke dilongu dinene dia kuowa mayi, dikale ne mayi tente.

⁸ Pashishe usuike bilamba bia kunyungulula nabi lupangu, ulembeleje tshilamba ku tshibuelelu tshia lupangu.

⁹ “Wangate mafuta, ulabe ku ntenta wa kusambakena, ne ku bionsu bidiku bua kubadila. Mpindiewu neashale muaba wa tshijila.

¹⁰ Ulabe kabidi mafuta awu ku tshilambuilu tshia milambu, ne ku bionsu bidiku. Utshijidile, bua tshishale tshia tshijila.

¹¹ Ulabe mafuta awu kabidi ku dilongu dinene ne ku tshitaku tshiadi bua kubindila.

¹² Pashishe, Arone ne bana bende ba balume, bimane mu mushiku wa mbelu wa ntenta wa kusambakena, bua uboweshe mayi a tshijila.

¹³ Uvuadike Arone bilamba biende bia tshijila. Umulabe mafuta, umujidile bua angenzele mudimu wa butuangaji.

¹⁴ Pashishe, ubikile kabidi bana ba Arone ba balume, ubavuadike mintumpu yabu.

¹⁵ Bana ba Arone abu, ubalabe mafuta mushindu uuvua mulabe tatuabu, ubajidile bua bangenzele mudimu wa butuangaji. Mafuta awu, ke adi ajadika ne: badi batuangaji kashidi, bobu ne ndelanganyi yabu yonsu.”

Moshe udi wasa muaba wa tshijila

¹⁶ Moshe kuitaba diyi dia Maweja-Nangila, kukumbaja bionsu bivuaye mumuambile:

¹⁷ Bena Izrayele bamane kupatuka mu Ejipitu tshidimu tshijima, tshidimu tshibidi, dituku dia kumpala dia ngondu wa kumpala, Moshe kuimanyika muaba wa tshijila.

¹⁸ Kuimanyikaye makunji mu bitaku biawu. Kutekaye kabidi mabaya ne mitshi.

¹⁹ Kuvungululaye ntenta pa mutu pa muaba wa tshijila. Pashishe, kubuikilaye mukuabu pa mutu pende, bua kumulama bimpe, bu muvua Maweja-Nangila mumuambile.

²⁰ Moshe kuteka mabue a mikenji dikumi mu mushete wa ndondu. Kubuejaye mitshi ku mushete, kumubuikilaye tshibuikidiji.

²¹ Moshe kuteka mushete awu muaba wa tshijila. Kulembeleja tshilamba pankatshi pa muaba wa tshijila ne muaba wa tshijila menemene, bua kujika mushete, bu muvua Maweja-Nangila muambile Moshe.

²² Kutekaye mesa a tshijila mu ntenta luseke lua ku mutu, kumpala kua tshilamba tshivua tshilembeleja.

²³ Moshe kuteka mampa a kulambula pa mesa apu, bu muvua Maweja-Nangila mumuambile.

²⁴ Kutekaye tshitekelu tshia miendu mu ntenta amu, luseke lua kuinshi, bitangilangane ne mesa.

²⁵ Pashishe Moshe kutemesha miendu ayi muaba uvua Maweja-Nangila, bu muvua Maweja-Nangila mumuambile.

²⁶ Kutekaye tshilambuilu tshia tshiamu tshia mpawungi mu ntenta amu. Tshilambuilu atshi tshivua kumpala kua tshilamba tshilembeleja.

²⁷ Moshe kuosha manananshi a tshijila pa tshilambuilu apu, bu muvua Maweja-Nangila mumuambile.

²⁸ Kulembelejaye tshilamba mu mushiku wa mbelu wa muaba wa tshijila.

²⁹ Kutekaye tshilambuilu pabuipi ne mushiku wa mbelu wa ntenta, bua kulambuilapu Maweja-Nangila milambu ya kuosha, ne ya bintu bia mu madimi, bu muvua Maweja-Nangila mmuambile.

³⁰ Moshe kuteka dilongu dinene, ne mayi tente, pankatshi pa ntenta wa kusambakena ne tshilambuilu.

³¹ Mayi awu, ke avuabu bowa ku bianza ne ku makasa kudi Moshe, kudi Arone ne kudi bana bende ba balume.

³² Misangu yonsu ivuabu babuele mu ntenta wa kusambakena, nansha bafike pabuipi ne tshilambuilu, bavua bowa mayi, bu muvua Maweja-Nangila muambile Moshe.

³³ Pashishe Moshe kuasa lupangu luvua lunyungulula ntenta wa kusambakena ne tshilambuilu. Kulembelejaye tshilamba mu mushiku wa mbelu wa lupangu alu. Mudimu uvua Moshe muenze kujikawu.

Butumbi bua Maweja-Nangila budi buwuja muaba wa tshijila

³⁴ Diba adi divuba divua dibuikila ntenta wa kusambakena. Butumbi bua Maweja-Nangila kuwulabu muaba wa tshijila.

³⁵ Moshe kavua kabidi ne mushindu wa kubuela mu ntenta wa kusambakena to.

³⁶ Bena Izrayele, bavua babanga luendu amu pavua divuba diumuka pa mutu pa muaba wa tshijila.

³⁷ Kadi, pavuadi kadiyi diumuka muaba wa tshijila, bena Izrayele kabavua baye to. Bavua anu bindile too ne dituku didi divuba dijuka.

³⁸ Nanku, mu munya, Maweja-Nangila uvua umuenekela bena Izrayele mu divuba divua dibuikila muaba wa tshijila. Butuku, uvua ubamuenekela mu kapia kavua kakenka muaba awu. Ke muvua luendu lujima lua bena Izrayele nanku.