Ekesode 39 - MUKANDA WA MYIDI MUKULU

Bilamba bia batuangaji: efode

¹ Batedi ba bilamba kutela bilamba bia lumu bia kuenza nabi mudimu muaba wa tshijila. Kutelelabu kabidi Arone bilamba bia kuenza nabi mudimu wa butuangaji, bu muvua Maweja-Nangila muambile Moshe.

² Kadi tshilamba tshia efode tshia mutuangaji munene, tshivua tshitela ne buanda bukole bua ndanda, busambakaja ne buanda bua miosa ya nyama bufikuluke, bukunzubile, bukunze kunzuu, kabidi ne buanda buenza ne tshiamu tshia mpawungi.

³ Kuengululabu tshiamu tshia mpawungi, kuenzabu natshi bitata. Kukosololabu bitata abi mu bitupa bikese bua kupeta buanda. Batedi kubusambakaja ne buanda bua miosa ya nyama bufikuluke, bukunzubile ne bukunze kunzuu, kabidi ne bua ndanda.

⁴ Mutuangaji uvua muvuale efode ne mampinda abidi masuika ku ndekelu kua tshilamba atshi.

⁵ Kutelabu kabidi tukaba tua kusuika tshilamba tshia efode tshia mutuangaji munene. Tukaba atu tuvua tutela ne buanda bua mushindu umue, tulamakane ne tshilamba atshi, bu muvua Maweja-Nangila muambile Moshe.

⁶ Kusongabu mabue abidi a onikse, a kubueja mu masosu a tshiamu tshia mpawungi. Kufundabu pa mabue apu mena a bana ba Yakobe bu tshitampi.

⁷ Pashishe, kutekabu mabue awu pa mutu pa mampinda abidi avua ku tshilamba tshia efode tshia mutuangaji munene, bua Maweja-Nangila ikale uvuluka bisamba dikumi ne bibidi bia bena Izrayele, bu muvuaye muambile Moshe.

Tshilamba tshia pa tshiadi

⁸ Batedi ba bilamba, kutela tshilamba tshia kuvuala pa tshiadi. Tshilamba etshi, bavua batshitela ne buanda bukole bua ndanda, busambakaja ne bua miosa ya nyama bufikuluke, bukunzubile ne bukunze kunzuu, kabidi ne buanda bua tshiamu tshia mpawungi, bu muvua efode.

⁹ Tshilamba atshi tshivua tshibombu tshia santimetre makumi abidi ne itanu nseke yonsu.

¹⁰ Pa tshilamba atshi, bavua bateka milongu ya mabue a mushinga mukole inayi: mulongu wa kumpala uvua ne dibue dia rubise, dia topaze ne dia emerode.

¹¹ Mulongu muibidi uvua ne dibue dia grenate, dia safire ne dia mbongu.

¹² Mulongu muisatu uvua ne dibue dia yasinte, dia agate ne dia ametiste.

¹³ Mulongu muinayi uvua ne dibue dia krisolite, dia onikse ne dia yaspe. Kubuejabu dibue dionsu mu disosu dia tshiamu tshia mpawungi.

¹⁴ Mabue awu, avua dikumi ne abidi, bungi bua bisamba bia bena Izrayele. Dina dia tshisamba tshionsu bavua badifunda pa dibue bu tshitampi.

¹⁵ Bua tshilamba tshia pa tshiadi, kuenzabu tukanu tubidi tua tshiamu tshia mpawungi menemene, tuluka bu mionji.

¹⁶ Kuenzabu masosu abidi a tshiamu tshia mpawungi, kabidi nkanu ya bijengu ibidi ya tshiamu tshia mpawungi. Kusuikabu nkanu ayi ku mutu kua tshilamba tshia pa tshiadi ku luseke ne ku luseke.

¹⁷ Kusuikabu kakanu konsu ku lukanu lua tshijengu lua ku tshilamba tshia pa tshiadi.

¹⁸ Kusuikakajabu nsongu yayi ibidi, ku masosu abidi a tshiamu tshia mpawungi avua ku mampinda a tshilamba tshia efode. Nanku tshilamba tshia pa tshiadi tshivua pa mutu pa tshia efode.

¹⁹ Kuenzabu nkanu mikuabu ya bijengu ibidi ya tshiamu tshia mpawungi. Kuyisuikabu kuinshi kua tshilamba tshia pa tshiadi ku luseke ne ku luseke, bituangane ne tshilamba tshia efode tshia mutuangaji munene.

²⁰ Kuenzabu nkanu mikuabu ya bijengu ibidi ya tshiamu tshia mpawungi. Kuyisuikabu kuinshi kua mampinda a tshilamba tshia efode pa mutu pawu. Nanku bavua bateka nkanu ya bijengu ayi pa mutu pa tukaba tuvua tulamakaja ku tshilamba tshia efode.

²¹ Kusuikakajabu nkanu ya bijengu ivua ku tshilamba tshia pa tshiadi, ne ivua ku tshilamba tshia efode ne monji mufikuluke. Tshilamba tshia pa tshiadi kushalatshi pa mutu pa tukaba tuvua ku tshilamba tshia efode, bua tshilamba tshia pa tshiadi katshilamuku ku tshia efode, bu muvua Maweja-Nangila muambile Moshe.

Bilamba bikuabu bia tshijila

²² Muntumpu uvua Arone muvuale bavua bautela amu ne buanda bua miosa ya nyama bufikuluke.

²³ Kadi muntumpu awu uvua ne nshingu mutela bikole, bua kapandiki to.

²⁴ Kuinshi kuonsu kua muntumpu awu, bavua bazola bimuma bia grenade ne buanda bua miosa ya nyama bufikuluke, bukunzubile ne bukunze kunzuu, kabidi ne buanda bukole bua ndanda.

²⁵ Kuinshi kuonsu aku, kuvua kulembeleja kabidi ndibu ya tshiamu tshia mpawungi menemene, pankatshi pa bimuma bia grenade.

²⁶ Nanku misangu yonsu kuinshi kua muntumpu kuvua tshimuma tshia grenade ne ludibu bishintulukangana, bu muvua Maweja-Nangila muambile Moshe.

²⁷ Kutelelabu kabidi Arone ne bana bende ba balume bilamba bia muinshi bia ndanda,

²⁸ bifulu, mikaba ya kusuika ku bifulu, ne tuputula tua muinshi. Bionsu bivua anu bia buanda.

²⁹ Kubatekabu kabidi mikaba milengeja ne buanda bukole bua ndanda, busambakaja ne bua miosa ya nyama bufikuluke, bukunzubile ne bukunze kunzuu, bu muvua Maweja-Nangila muambile Moshe.

³⁰ Pashishe kuenzabu tshitata tshia tshijila tshia tshiamu tshia mpawungi menemene, tshifuanangane ne tshilongu. Kufundabu pa tshitata atshi ne: “Wa tshijila wa Maweja-Nangila,” amu bu bitua tshitampi.

³¹ Kusuikabu tshitata atshi kumutu kua tshifulu ne mukaba mukunzubile kulu kuatshi, bu muvua Maweja-Nangila muambile Moshe.

Badi bamanyisha Moshe ne: mudimu wajiki

³² Bena mudimu kujikija mudimu onsu wa ntenta wa kusambakena ne wa nzubu wa tshijila. Bavua benza midimu ayi menemene anu bu muvua Maweja-Nangila muambile Moshe.

³³ Bena Izrayele kuleja Moshe bintu bionsu bivuabu benza bua nzubu wa tshijila: — ntenta wa kusambakena ne bintu bionsu bivuaku: nkanu, mabaya, mitshi, makunji ne bitaku biawu;

³⁴ — bilamba bia kubuikila pa mutu pa ntenta bia biseba bia mikoku ya bimpanga bilaba kakula, bia biseba bia nyama wa nkonga wa mu mayi, kabidi ne tshilamba tshia kulembeleja pankatshi pa muaba wa tshijila ne muaba wa tshijila menemene;

³⁵ — mushete wa ndondu udi ne mabue a mikenji, pamue ne mitshi yawu, ne tshibuikidiji tshiawu;

³⁶ — mesa a tshijila ne bintu bionsu bivuaku, too ne mampa malambula Mvidi Mukulu;

³⁷ — tshitekelu tshia miendu tshia tshiamu tshia mpawungi menemene, miendu yonsu, ne bintu bikuabu bivuaku, too ne mafuta a kutemesha nawu miendu;

³⁸ — tshilambuilu tshia tshiamu tshia mpawungi, mafuta a kulaba nawu, manananshi a kuosha; — tshilamba tshia mu mushiku wa mbelu wa ntenta;

³⁹ — tshilambuilu tshia tshiamu tshikunze, munyingu watshi wa tshiamu tshikunze, mitshi yatshi ne bintu bionsu bivuaku; — dilongu dinene dia kuowa mayi, ne tshitaku tshiadi;

⁴⁰ — bilamba bia ku lupangu, makunji abi ne bitaku biawu, kabidi ne tshilamba tshia mu mushiku wa mbelu wa lupangu, mionji ne milonda ya bitupa yatshi; — bintu bionsu bivuabu ne bua kuenza nabi mudimu mu ntenta wa kusambakena, kabidi ne mu nzubu wa tshijila;

⁴¹ — bilamba bia lumu bia kuvuala diba dia mudimu wa mu muaba wa tshijila; — bilamba bia tshijila bivua Arone ne bana bende ba balume ne bua kuvuala bua kuenza mudimu wa butuangaji.

⁴² Bena Izrayele bavua benza midimu ayi anu bu muvua Maweja-Nangila muambile Moshe.

⁴³ Moshe kubandila mudimu uvua bena Izrayele benza. Kumonaye ne bavua bawenze anu bu muvua Maweja-Nangila muambe. Nanku, kubelaye lupemba.