Ekesode 38 - MUKANDA WA MYIDI MUKULU

Tshilambuilu ne dilongu dia kuowa mayi

¹ Bua kulambula milambu, kuenzabu tshilambuilu tshia mitshi ya ndunga. Tshilambuilu atshi tshivua ne metre abidi ne desimetre itanu nseke yatshi yonsu. Butumbuke buvua metre umue ne desimetre itanu.

² Kadi matumba onsu anayi avua majuke kulu bu nsengu, milamakane pamue ne tshilambuilu. Kabidi tshilambuilu tshijima tshivua tshilamika tshiamu tshikunze.

³ Kuenzabu kabidi bintu bia mu tshilambuilu amu ne tshiamu tshikunze: bia kuboya natshi butu, bikasu, malongu a kumiamina nawu, mbabula ne nkala bua kusabula munyinyi.

⁴ Kulukabu kakanu ka tshiamu tshikunze kafuanangane ne munyingu. Kutekabu kakanu aku pankatshi pa tshilambuilu luseke lua kuinshi.

⁵ Kuenzabu nkanu inayi ya bijengu ya kuteka mu matumba anayi a munyingu wa tshiamu tshikunze awu, bua kuelamu mabaya.

⁶ Kuenzabu kabidi mabaya abidi a mutshi wa ndunga. Kualamikabu tshiamu tshikunze.

⁷ Kubuejabu mabaya awu mu nkanu ya bijengu ivua ku luseke lua tshilambuilu, bua kutshiambuilaku. Kadi tshilambuilu tshia mabaya etshi, katshi vua ne tshintu munda to.

⁸ Bavua benza dilongu dinene. Dilongu adi ne tshitaku tshiadi, bivua anu bia tshiamu tshikunze, tshivua tshifuma ku mienu ya tshiamu tshikunze ya kudi bakaji bavua benza mudimu ku tshibuelelu tshia ntenta wa kusambakena.

Lupangu lua nzubu wa tshijila

⁹ Kuenzabu lupangu luvua lunyungulula nzubu wa tshijila. Bavua babienza ne bilamba bia buanda bukole bua ndanda. Luseke lua kuinshi, luvua ne metre makumi atanu.

¹⁰ Bilamba abi bavua babilembeleja ne nkanu ne milonda ya tshiamu tshitoke tshia mushinga mukole ku makunji makumi abidi a tshiamu tshikunze. Makunji awu avua ne bitaku makumi abidi bia tshiamu tshikunze.

¹¹ Luseke lua ku mutu, lupangu luvua anu bule bumue. Bavua balembeleja bilamba amu mushindu awu.

¹² Kadi mu butshiama luseke ludi diba dibuelela, lupangu luvua ne metre makumi abidi ne atanu mu bule. Bavua balembeleja bilamba ku makunji dikumi, mikale ne bitaku dikumi.

¹³ Pashishe mu mushiku wa mbelu, luseke ludi diba dipatukila, lupangu luvua kabidi ne metre makumi abidi ne atanu mu butshiama.

¹⁴ Mu mushiku wa mbelu ku luseke ne ku luseke kuvua bilamba mutantshi wa metre muanda mutekete ne tshitupa.

¹⁵ Kuvua kabidi makunji asatu, ne bitaku bisatu.

¹⁶ Bilamba bionsu bivua binyungulula lupangu, bivua bia buanda bukole bua ndanda.

¹⁷ Bitaku bia makunji awu, bivua bia tshiamu tshikunze. Nkanu ne milonda bivua bia tshiamu tshitoke tshia mushinga mukole. Mitu ya makunji, ivua milamika tshiamu tshitoke tshia mushinga mukole. Makunji onsu avua masuikakaja ne milonda ya tshiamu tshitoke tshia mushinga mukole.

¹⁸ Tshilamba tshia mu mushiku wa mbelu wa lupangu, tshivua tshitela bimpe kudi batedi ne buanda bukole bua ndanda busambakaja ne bua miosa ya nyama bufikuluke, bukunzubile ne bukunze kunzuu. Tshilamba atshi, tshi vua ne metre dikumi mu bule, ne metre abidi ne tshitupa mu butumbuke, amu bu bilamba bia lupangu.

¹⁹ Bavua batshisuika ku makunji anayi. Makunji awu avua ne bitaku binayi bia tshiamu tshikunze. Nkanu, mitu ya makunji ne milonda, bivua bia tshiamu tshitoke tshia mushinga mukole.

²⁰ Milonda ya bitupa yonsu, ivua ku nzubu wa tshijila ne ku lupangu, ivua ya tshiamu tshikunze.

Biamu bivuabu bakuate nabi mudimu

²¹ Pashishe Moshe kutumina bena Izrayele diyi, bua babale bintu bionsu bivuabu benza nabi mudimu mu nzubu wa tshijila. Muaba awu, ke uvuabu bateka mushete wa ndondu uvua ne mabue a mikenji. Itamare, muana wa mutuangaji Arone, ke uvua ulombola bena Levi bavua babala bintu ebi.

²² Beshalele, muana wa Uri, uvua kabidi muikulu wa Ure, wa mu tshisamba tshia Yuda, kuenza mudimu wonsu uvua Maweja-Nangila muambile Moshe.

²³ Bavua bamuambuluisha kudi Okoliyabe, muana wa Akisamaka, wa mu tshisamba tshia Dane, uvua mumanye midimu mishilangane: ya kusonga mabue, ya kuzola, ya kulengeja bilamba bia miosa ya nyama bifikuluke, bikunzubile, bikunze kunzuu, kabidi ya kutela bilamba bia ndanda.

²⁴ Biamu bia mpawungi bionsu bivua bena Izrayele balambule bua kuasa muaba wa tshijila, bivua kilo 877 ne grame 300, bilondeshile tshipimu tshivuabu natshi muaba wa tshijila.

²⁵ Biamu bitoke bia mushinga mukole bivua bena Izrayele bavuabu babadike balambule, bivua kilo 3.017 ne grame 750, bilondeshile tshipimu tshivuabu natshi muaba wa tshijila.

²⁶ Nanku bantu balume bonsu 603.550 bavuabu babadike, bikale ne bidimu bituadijile ku makumi abidi too ne pa mutu, bavua balambule grame itanu ya tshiamu tshitoke tshia mushinga mukole ku muntu ku muntu.

²⁷ Bavua bengulule kilo 3.000 ya tshiamu tshitoke tshia mushinga mukole, bua kuenza bitaku lukama bia makunji a ku muaba wa tshijila, ne bia ku tshilamba tshivua tshilembeleja pankatshi pa muaba wa tshijila ne muaba wa tshijila menemene. Tshitaku tshionsu tshivua ne kilo 30.

²⁸ Kadi kilo 17 ne grame 750 ivua mishale, kuenzabu nayi nkanu ya ku makunji, mitu ya makunji ne milonda ya kulamakaja nayi makunji awu.

²⁹ Biamu bikunze bivua bena Izrayele balambule bivua kilo 2.124.

³⁰ Biamu abi bavua benza nabi bitaku bia makunji a mushiku wa mbelu wa ntenta wa kusambakena. Kuenzabu nabi kabidi tshilambuilu tshia tshiamu tshikunze, kakanu katshi ka munyingu ne bintu bionsu bia ku tshilambuilu.

³¹ Bavua benza nabi kabidi bitaku bia makunji a ku lupangu ne a ku tshibuelelu tshia lupangu, kabidi ne milonda ya bitupa ya ku nzubu wa tshijila ne ya ku lupangu.