Ekesode 29 - MUKANDA WA MYIDI MUKULU

Dijidila dia batuangaji

¹ “Ujidile Arone ne bana bende ba balume ku mudimu wa butuangaji nenku: “Usungule muana wa mukoku mulume umue ne bimpanga bibidi kabiyi kalema pambidi.

² Wangate bukula bua ntete, wenze mampa adi kaayi mela buanga ne mikata mikanga ne mafuta, kayiyi miela buanga. Wangate kabidi tukata tubidi tupepele tukanga ne mafuta, kadi katuyi tuela buanga.

³ Ubiteke mu tshisaka tshimue, ubindambule meme Maweja-Nangila pamue ne ngombe mulume ne mikoku ya bimpanga ibidi.

⁴ “Uye ne Arone ne bana bende ba balume ku mushiku wa mbelu wa ntenta wa kusambakena, uboweshe mayi.

⁵ Pashishe, ujadike Arone bilamba biende bia tshijila: muntumpu, tshilamba tshia muinshi, tshilamba tshia efode tshia mutuangaji munene ne tshilamba tshia pa tshiadi. Pashishe, usuikakaje tukaba tudi ku tshilamba tshia efode.

⁶ Wase Arone tshifulu ku mutu. Kadi, ku tshifulu aku, kuikale tshitata tshia tshijila.

⁷ Umuele mafuta a tshijila pa mutu bua kumujidila.

⁸ Ubikile bana ba balume ba Arone, ubavuadike mintumpu yabu.

⁹ Ubasuike mikaba, ubase kabidi ne bifulu ku mutu. Ke muudi ne bua kubajiidila nanku, bua Arone ne ndelanganyi yende bashale batuangaji kashidi. “Bua Arone ne bana bende kutuadija mudimu wa butuangaji, wenze nenku:

¹⁰ “Uye ne ngombe mulume, kumpala kua mushiku wa mbelu wa ntenta wa kusambakena. Arone ne bana bende ba balume bamutenteke bianza pa mutu.

¹¹ Pashishe, ushipe ngombe awu kumpala kuanyi meme Maweja-Nangila, pabuipi ne mushiku wa mbelu wa ntenta wa kusambakena.

¹² Utue munu mu mashi a ngombe awu, ulabe mu matumba onsu a tshilambuilu. Mashi adi ashala, witshikije panshi kuinshi kua tshilambuilu.

¹³ Wangate mafuta onsu adi ku mala, tuonyi ne mafuta atu, ne lutandatanda lua ku mutshima, ubioshe pa tshilambuilu.

¹⁴ Ewu ke mulambu wa kukobolola nawu batuangaji. Kadi, tshiseba tshia ngombe awu, munyinyi ne mala bidi bishale, uye kubiosha anu mutantshi mule ne mitanda.

¹⁵ “Wangate kabidi mukoku wa tshimpanga, Arone ne bana bende ba balume J batentekapu bianza,

¹⁶ wewe uukose mutu, usashile mashi ku nseke yonsu ya tshilambuilu.

¹⁷ Usaye mukoku wa tshimpanga awu, usukule bia munda ne mikonu. Ubiteke pa tshilambuilu pa mutu pa munyinyi ne mutu.

¹⁸ Woshe bintu bionsu abi, bua bikale mulambu wa kuosha wa dipembu dimpe udi unsankisha meme Maweja-Nangila.

¹⁹ “Wangate mukoku wa tshimpanga muibidi, Arone ne bana bende ba balume batenteka bianza pa mutu pawu kabidi.

²⁰ Wewe Moshe, ukose mukoku wa tshimpanga awu mutu, wangate mashi, ulabe Arone ne bana bende ba balume ku lusongu lua ditshi dia lua balume dia mutu yonsu, ku tshiala tshia tshianza tshia balume ne ku muana nkasa munene wa dikasa dia balume dia muntu yonsu. Kadi, mashi adi mashale, witshikije ku nseke yonsu inayi ya tshilambuilu.

²¹ Pashishe, wangate mashi makese adi pa tshilambuilu, ne mafuta a tshijila, umiamine Arone ne ku bilamba biende. Umiamine kabidi ne bana bende ba balume ne ku bilamba biabu bionsu, nebikale bia tshijila.

²² Mulambu wa mukoku muibidi ewu ke mbangilu wa mudimu wa butuangaji. Pashishe, ku munyinyi wa mukoku wa tshimpanga awu, umushe bintu bia mafuta: mukila, mafuta, lutandatanda lua ku mutshima, tshibelu tshia luseke lua balume, tuonyi tubidi ne mafuta adi malamataku ne adi malamata ku mala.

²³ Kadi ku mampa adi mu tshisaka kumpala kua tshilambuilu, kaayi mela buanga, upeshe Arone ne bana bende ba balume dibulunge dimue, mukata umue mukanga ne mafuta ne kakata kamue kakese kapepele.

²⁴ Ubiteke bana bende mu bianza, babiele mulu, babinyukule bua kundambula meme Maweja-Nangila.

²⁵ Pashishe, wangate kabidi bintu abi, ubiteke pa tshilambuilu pa mutu pa mulambu wa kuosha, bua bikale mulambu wa dipembu udi unnunkila meme Maweja-Nangila.

²⁶ Tshiadi tshia mukoku wa tshimpanga muibidi awu, wewe Moshe utshiele mulu, utshinyukule kumpala kuanyi meme Maweja-Nangila, kadi utshiangate tshishale tshiebe.

²⁷ “Pashishe, wambile bena Izrayele ne: tshiadi tshia mukoku wa tshimpanga ne tshibelu tshiudi muele mulu munyukule mbia tshijila.

²⁸ Nanku, padi bena Izrayele bandambula mulambu wa ditua ndondu, Arone ne ndelanganyi yende nebikale bangata tshiadi ne tshibelu.

²⁹ “Pikala Arone mumane kufua, bilamba biende bia tshijila nebabiangate anu kudi ndelanganyi yende. Kadi, nebavuale bilamba abi, anu dituku dia kubajidila ne dia kutuadija mudimu.

³⁰ Muana wa Arone wasungulabu bua kuenza mudimu wa butuangaji munene pa muaba wa tatuende, neavuale bilamba bia tshijila abi, matuku malondangane muanda mutekete, diba dionsu didiye ubuela mu ntenta wa kusambakena bua kuenza mudimu.

³¹ “Munyinyi wa mukoku wa tshimpanga tshibidi wakubanjija nawu batuangaji, uulambila pa muaba wa tshijila.

³² Munyinyi awu ne mampa bidi mu tshisaka, Arone ne bana bende ba balume nebabidile mu mushiku wa mbelu a ntenta wa kusambakena.

³³ Batuangaji nkayabu ke badi mua kudia bintu abi, bualu bivua bibajidila nabi, kabidi bibabanjija nabi bua kubakobolola. Nanku, muntu mukuabu kena mua kudia biakudia abi to, bualu mbia tshijila.

³⁴ Pikala mampa awu ne munyinyi bishale too ne ku dinda, kanuena mua kubidia kabidi to, nubioshe, bualu mbintu bia tshijila.

³⁵ “Wewe Moshe, wenzele Arone ne bana bende ba balume, bionsu bindi mukuambile ebi. Ubajidile matuku muanda mutekete.

³⁶ “Dituku dionsu, wikale wosha ngombe mulume bua kukobolola bantu. Wewe ujidila tshilambuilu, utshimiamina manyi.

³⁷ Ujidile tshilambuilu matuku muanda mutekete bua kujimija mibi yonsu idiku. Ku tshilambuilu mmuaba wa tshijila menemene, muntu yonsu watshilenga, nansha tshintu tshilengaku nebipete dinyoka.

Milambu ya kuosha ku dituku dionsu

³⁸ “Milambu ya kuosha pa tshilambuilu matuku onsu ikale ya mushindu ewu:

³⁹ woshe bana ba mikoku babidi ba tshidimu tshimue, umue dinda, mukuabu dilolu.

⁴⁰ Kadi, muana wa mukoku uudi udianjila kulambula dinda, ulambule pamue ne bintu ebi: kilo isatu ya bukula busambakaja ne litre umue ne tshitupa wa mafuta a olive, welemu kabidi maluvu a mvinyo litre umue ne tshitupa.

⁴¹ Kadi muana wa mukoku uudi ulambula dilolu, umulambule kabidi pamue ne bukula, mafuta ne maluvu bu muuvua muenze dinda. Bualu mmulambu wa dipembu dimpe wa kungoshila meme Maweja-Nangila.

⁴² Nuikale nundambula mulambu wa mushindu ewu kashidi ne ndelanganyi yenu yonsu. Bandambule anu mu mushiku wa mbelu wa ntenta wa kusambakena muaba utuikala tumonangana nebe.

⁴³ “Nanku, nembuikile muaba ewu ne butumbi buanyi. Bualu ke muaba undi mmonangana ne bena Izrayele.

⁴⁴ Nenjidile kabidi ntenta wa kusambakena ne muaba wa tshilambuilu. Bu mundi njidila Arone ne bana bende ba balume bua bangenzele mudimu wa butuangaji.

⁴⁵ Meme nengikale Mvidi Mukulu wa bena Izrayele musombe munkatshi muabu.

⁴⁶ Bena Izrayele nebajadike ne meme ndi Maweja-Nangila Mvidi Mukulu udi mubapatule mu ditunga dia Ejipitu bua meme kusomba munkatshi muabu. “Ndi Maweja-Nangila Mvidi Mukulu wabu.