Ekesode 25 - MUKANDA WA MYIDI MUKULU

NZUBU WA MVIDI MUKULU Milambu ya bena Izrayele

¹ Maweja-Nangila kuambila Moshe ne:

² — Ambila bena Izrayele bikale bandambula milambu, bayifila amu kudi bantu ba muoyi muimpe.

³ Milambu ayi ikale ya mushindu ewu: ya tshiamu tshia mpawungi, ya tshiamu tshitoke tshia mushinga mukole ne ya tshiamu tshikunze,

⁴ bilamba bifikuluke, bikunzubile, bikunze kunzuu, bilamba bia ndanda ne bia boya bua mbuji,

⁵ biseba bia mikoku ya bimpanga bilaba kakula, biseba bia nyama ya nkonga wa mu mayi, mutshi wa ndunga ne

⁶ mafuta a kuela mu muendu, manananshi a kusambakaja ne mafuta a kulaba, manananshi makuabu a kuosha,

⁷ mabue a mushinga mukole a kuteka mu tshilamba tshia efode tshidi mutuangaji munene uvuala, ne tshilamba tshidiye uteka pa tshiadi.

⁸ Nanku, bena Izrayele bandongoluele muaba wa tshijila, bua ngikale munkatshi muabu.

⁹ Nzubu awu, ne bintu bia kutekamu, bikale anu mushindu undi nkuleja.

Mushete wa ndondu

¹⁰ “Bena Izrayele bangenzele mushete wa mitshi ya ndunga, bule buawu buikale bua metre umue ne santimetre makumi abidi ne itanu, butshiama buawu buikale santimetre makumi muanda mutekete ne itanu, butumbuke buawu buikale kabidi santimetre makumi muanda mutekete ne itanu.

¹¹ Kadi, ulamike tshiamu tshia mpawungi munda mua mushete, panyima pawu ne ku mibangu.

¹² Pashishe, wenza nkanu inayi ya tshiamu tshia mpawungi ya kulamika ku matumba anayi a mushete, ibidi ku luseke, ibidi ku luseke lukuabu.

¹³ Ukose kabidi mitshi ya ndunga ibidi, uyilamike tshiamu tshia mpawungi ku nseke yonsu.

¹⁴ Ubueje mitshi ayi mu nkanu idi ku nseke yonsu ibidi bua kuambuilaku mushete.

¹⁵ Mitshi eyi ishale mu nkanu ya mushete kashidi.

¹⁶ Mu mushete amu utekemu mabue, adi ne mikenji ingakupesha, idi ijadika ndondu.

¹⁷ “Pashishe, wenze tshibuikidiji tshia mushete tshia tshiamu tshia mpawungi. Bule buatshi buikale metre umue ne santimetre makumi abidi ne itanu. Butshiama buikale bua santimetre makumi muanda mutekete ne itanu.

¹⁸ Kadi, pa tshibuikidiji tshia mushete apu, ku nseke ibidi ya mu bule buawu, wenzapu mpingu ibidi ya tshiamu tshia mpawungi, ileja Bakerubine.

¹⁹ Bimfuanyi bia Bakerubine bibidi abi, bikale bilamakane ne tshibuikidiji tshia mushete, etshi ku ndekelu, tshikuabu ku ndekelu.

²⁰ Bimfuanyi abi, bikale bitangilangane, binangile pa tshibuikidiji tshia mushete, biolola mapuapua mulu bua kubuikila mushete awu.

²¹ Mu mushete awu, utekemu mabue andi nkupesha adi ajadika ndondu. Pashishe, ubuikile tshibuikidiji ku mushete aku.

²² Netumonangane nebe anu pa tshibuikidiji tshia mushete awu. Pankatshi pa Bakerubine abu, ke pandi nkupela mikenji idi itangila bena Izrayele.

Mesa a kulambuila Mvidi Mukulu mampa

²³ “Pashishe, wenze mesa a mutshi wa ndunga. Bule buawu buikale bua metre umue. Butshiama buawu buikale bua santimetre makumi atanu, ne butumbuke buawu buikale bua santimetre makumi muanda mutekete ne itanu.

²⁴ Mesa awu, ulamikaku tshiamu tshia mpawungi ku nseke ne ku mibangu yawu kabidi.

²⁵ Wenzaku mabaya malamika tshiamu tshia mpawungi. Butshiama buawu buikale santimetre muanda mukulu. Mabaya adi manyunguluila mesa awu, ikale malamika tshiamu tshia mpawungi.

²⁶ Wenza nkanu inayi ya tshiamu tshia mpawungi. Uyilamike mu matumba anayi pa buipi ne mikolu yonsu inayi ya mesa.

²⁷ Usuike nkanu ayi ku mabaya bua kubuejamu mitshi ya kuambuila mesa.

²⁸ Usonge kabidi mitshi ya ndunga ibidi, uyilamike tshiamu tshia mpawungi ku nseke. Wela mitshi ayi mu nkanu bua kuambula nayi mesa.

²⁹ Wenza bintu ebi ne tshiamu tshia mpawungi: malongu masalame, makopu, ngesu ne mabungu a kulambuila maluvu.

³⁰ Mampa a tshijila anudi nundambula, ashale anu pa mesa apu kashidi.

Tshitekelu tshia muendu

³¹ “Wenza kabidi tshitekelu tshia muendu anu tshia tshiamu tshia mpawungi nkayatshi. Tshikale tshikuatakane: mikolu, matamba, makopu, tulongu tukese, mapu a bilongu bienza anu tshintu tshimue.

³² Tshitekelu tshia muendu atshi, tshikale ne matamba asambombu. Asatu ku luseke, asatu ku luseke lukuabu.

³³ Ku ditamba dionsu kuikale makopu asatu mafuanangane ne bilongu bia mutshi wa amande, kabidi ne bilongu ne mapu a bilongu biawu.

³⁴ Ku tshitekelu tshia muendu aku, wenzaku kabidi makopu anayi mafuanangane ne bilongu bia mutshi wa amande, kabidi ne bilongu ne mapu a bilongu biawu.

³⁵ Matamba asambombu adi malamakaja abidi abidi ku tshitekelu, mikale ne dipu muinshi muawu.

³⁶ Kadi, matamba onsu ne mapu, bikale anu bilamakane, kabidi bienza ne tshiamu tshia mpawungi nkayatshi.

³⁷ Wenze miendu muanda mutekete. Uyiteke ku tshitekelu bua itokeshe muaba awu.

³⁸ Nanku, nkala ne tulongu tukese bikale anu bia tshiamu tshia mpawungi nkayatshi.

³⁹ Bua kuenza tshitekelu tshia muendu ne bintu bionsu bidiku, ubienza ne kilo makumi asatu ya tshiamu tshia mpawungi nkayatshi.

⁴⁰ Wewe Moshe, wenzeje bintu bionsu abi anu mushindu umvua mukuambile ku mukuna eku.