Ekesode 22 - MUKANDA WA MYIDI MUKULU

¹ “Pikalabu bakuate muivi mu nzubu butuku, bamushipe, mumushipi kena ne tshilumbu to.

² Kadi pikalabu bakuate muivi mu munya, mumushipi udi ne tshilumbu. Pikala muivi katshiyi ne bintu bivuaye muibe abi, nebamupane, ashale mupika bua buivi buende.

³ “Kadi bobu bamusangane ne bimuna bivuaye muibe abi bitshikale ne muoyi: ngombe, mpunde, mukoku nansha mbuji, bua tshimuna tshimue neafute bimuna bibidi.

Teka tshianza pa kebe

⁴ “Pikala muntu mulekela bimuna biende binyange budimi bua bende, nansha mionji yende ya mvinyo, muena bimuna neapingajile muena budimi bimuma bilenga bia mu madimi ende.

⁵ “Pikala muntu osha budimi buende, kapia aku kalambuke, kosha bikunyibua bia mu madimi a bende bitshidi ku miepu, nansha bidibu bamane kunowa babiteka mu bisumbu mu madimi, muntu uvua mutemeshe kapia neafute muena budimi.

⁶ “Pikala muntu mutekesha makuta ende nansha bintu bikuabu bia mushinga ku nzubu kua muntu mukuabu, bintu abi bijimine, bobu bakuate muivi, bua tshintu tshimue neafute bintu bibidi.

⁷ Kadi pikalabu kabayi bakuate muivi, muena nzubu awu neaye kuditshipa kudi Mvidi Mukulu bua kujadika mudiye kayi muangate bintu abi.

⁸ Pikala bantu batandangane bua bintu bijimine: ngombe, mpunde, mikoku, mbuji, bilamba nansha bintu bikuabu, nebaye kuditshipa bonsu babidi kudi Mvidi Mukulu. Wikale Mvidi Mukulu muambe ne: ke udi muibe awu, bua tshintu tshimue neafute bintu bibidi.

⁹ “Pikala muntu mutekeshe mpunde, ngombe, mukoku nansha tshimuna tshikuabu ku nzubu kua mukuende bua kumulamima, tshimuna atshi tshifue, tshitapike mputa nansha tshibe kabayi bajadike udi muibe,

¹⁰ mulami awu neaditshipe kumpala kua Maweja-Nangila bua kujadika mudiye kayi muangate bintu abi. Nanku muena bintu bidi bijimine, neitabe dijadika dia Maweja-Nangila adi. Kabakumufuta to.

¹¹ Kadi pikalabu bamuibe bimuna abi ku nzubu kuende, mulami neafute muena bintu.

¹² Pikala tshimuna tshikuata kudi nyama wa lonji, muena lubanza nealeje munyinyi wikala mushale bua kujadika. Nanku kakufuta to.

¹³ “Pikala muntu musombe tshimuna tshia mukuende, tshimuna atshi tshitapike mputa, nansha tshifue, muenatshi kayipu, uvua musombe neafute.

¹⁴ Kadi pikala muena tshimuna mudimuene bionsu bivua bienzeka abi, kabena mua kumufuta to. Anu mushinga uvuabu bafile bua kusomba tshimuna awu neujikije bualu.

Mikenji ya ditendelela ne ya nsombelu mulenga wa bantu

¹⁵ “Pikala muntu mutombole nsongakaji udibu kabayi banji kusela, afile biuma bua kusela mukaji awu.

¹⁶ Kadi pikala tatuende wa mukaji ubenga mulume awu, mulume neafute biuma bionsu bidibu bafidila nsongakaji utshidi kamama.

¹⁷ “Mukaji muena mupongu, numushipe.

¹⁸ “Muntu yonsu udi ulala ne nyama, numushipe.

¹⁹ “Muntu yonsu udi utendelela mvidie ya bisamba bikuabu, uyilambula milambu, kayi ulambula amu Maweja-Nangila, numushipe.

²⁰ “Kanutatshishi muenyi, kanumukengeshi. Bualu nuenu nuvua benyi mu ditunga dia Ejipitu.

²¹ Kanukengeshi bakaji bakamba nansha bana ba nshiya.

²² Bualu bobu badile, bambikile, nembateleje.

²³ Nemfike munda, nnushipe ne muela. Nanku bakaji benu nebashale bakamba, bana benu nebashale bana ba nshiya.

²⁴ “Pikala muntu mupela wa mu tshisamba tshianyi ukenga, wewe mumusombeshe makuta, kumulombi tshia kasombela to.

²⁵ “Tshilamba tshidi mukuebe udibuikila, wewe mutshikuate lukola, umupingajilatshi anu dituku dimue.

²⁶ Bualu ke tshiende tshidiye natshi bua kudibuikila. Kadi pawakandamana natshi, yeye neadibuikile tshinyi? Nanku, yeye mudile, mumbikile, nemmuteleje, bualu meme ndi muena luse.

²⁷ “Kanumpendi meme Mvidi Mukulu wenu. Kanuedi mulombodi wa tshisamba tshienu tshia bena Izrayele milawu.

²⁸ “Panudi nupola bintu bia tshianyi bia mu madimi enu, nubindambule lukasa, nansha bimuma bia maluvu. “Nundambule kabidi muanenu wa balume muanabute.

²⁹ “Nundambule muanabute wa ngombe yenu, mikoku yenu, mbuji yenu. Muana wa balume wa bimuna abi, neashale kudi mamuende anu matuku muanda mutekete. Dituku dia muanda mukulu numundambule.

³⁰ “Nuenu nenuikale bantu banyi ba tshijila, kanuena mua kudia munyinyi wa nyama wa tshisuku uvua nyama ya lonji mishipe. Munyinyi awu nuwelele mbwa.