Ekesode 2 - MUKANDA WA MYIDI MUKULU

Diledibua dia Moshe

¹ Muntu wa mu tshisamba tshia bena Levi, kusela mukaji wa mu tshisamba tshiabu tshia bena Levi.

² Mukaji awu kuimita difu, kulela muana wa balume. Uvua mumone muvua muana ne mubidi muimpe. Kumusokokaye ngondu isatu.

³ Mukaji umona ne tshiena ne mushindu wa kusokoka muana kabidi musangu mule, kumutekaye mu tshisaka tshiluka ne ntupu, tshilaba budimbu. Kutshisokokaye mu malenga avua ku muelelu wa musulu wa Nile.

⁴ Yayende wa muana awu, uvua muimanyine pa bule, bua kumona tshivua ne bua kuenzekela muana.

⁵ Ke muana wa bakaji wa mukalenga wa bena Ejipitu kupueka bua kuowa mayi. Bena mudimu bende bakaji bavua bendakana ku muelelu wa mayi aku. Diakamue muana wa bakaji wa mukalenga kumona tshisaka mu malenga, kubikila nsongakaji muena mudimu wende, bua kumuambuilaye tshisaka atshi mu mayi.

⁶ Muana wa mukalenga ubulula tshisaka, kumonaye muana wa balume udila. Luse kumuenza. Kuambaye ne: — Muana ewu ngua bena Ebrewu!

⁷ Yayende wa muana kukonka muana wa mukalenga ne: — Udi musue nkubikidile mukaji wa bena Ebrewu udi mua kukuamushila muana ewu dibela anyi?

⁸ Muana wa mukalenga kuitaba ne: — Eyowa, ndaku. Nsongakaji kuya kubikila mamuende mene wa muana.

⁹ Muana wa mukalenga kuambila mamu awu ne: — Angata muana ewu, umunkoleshile. Meme nenkufute. Mukaji kuangata muana bua kumuamusha.

¹⁰ Muana mumane kukola, mamuende kumupingaja kudi muana wa mukalenga. Awu kumuangata bu muanende, kumuinyika dina ne: — Diende mMoshe, bualu ndi mumupatule mu mayi.

Moshe udi unyemena ku Madiyane

¹¹ Moshe mumane kukola, kuyaye bua kumonangana ne bana babu. Kusanganaye bakengesha bana babu ne midimu mipite bukole. Diakamue kumonaye muena Ejipitu utuuta muanabu wa bena Ebrewu.

¹² Moshe kuimana, kukenzakana nseke yonsu. Kena mumone muntu mukuabu to. Nanku kushipaye muena Ejipitu, kumujibikila mu lusenga.

¹³ Butshia dinda, Moshe kumona kabidi bena Ebrewu baluangana. Kukonkaye uvua muenze bibi ne: — Udi utuuta mukuebe nanku bua tshinyi?

¹⁴ Awu kuandamuna Moshe ne: — Nganyi udi mukuteke bua kutubela ne kutulumbuluisha? Udi musue kunshipa bu muuvua mushipe muena Ejipitu anyi? Moshe kumvua buowa, kudiambila ne: “Bualu ebu bakadi babumanye!”

¹⁵ Mukalenga wa bena Ejipitu umvua bualu abu, kukebaye mua kushipa Moshe. Kadi Moshe kunyema, kuya mu ditunga dia Madiyane. Kuikishaye pabuipi ne tshiina tshia mayi.

¹⁶ Mu Madiyane muvua mutuangaji Yetro ne bana bende ba bakaji muanda mutekete. Dituku adi bana ba bakaji abu kupueka bua kusuna mayi a kuela mu luvu bua kunuisha bimuna bia tatuabu.

¹⁷ Kadi balami ba mikoku kufika, kuipata bana ba bakaji abu. Kadi Moshe kuakuila bansongakaji aba, kubasunyina mayi, kunuisha bimuna biabu.

¹⁸ Bansongakaji kupingana pambelu. Tatuabu Yetro kubakonka ne: — Lelu munudi bapingane lukasa nanku mmunyi?

¹⁹ Bobu kuandamuna tatuabu ne: — Muena Ejipitu mukuabu mmutusungidile kudi balami ba mikoku, kabidi mmutusunyine mayi, munuishe bimuna bietu.

²⁰ Yetro kuebeja bana bende ba bakaji ne: — Kadi muntu awu wepi? Nuamushiyi bua tshinyi? Mubikilayi bua tudie nende.

²¹ Moshe kuitaba bua kusomba kua muntu awu. Yetro kuselesha muanende wa bakaji Sefora kudi Moshe.

²² Sefora kulela muana wa balume. Moshe kuamba ne: — Dina diende didi Ngershone, bualu ndi muena tshimuangi, musombe mu ditunga dia bende.

Mvidi Mukulu udi usungula Moshe bua kupikula bena Izrayele

²³ Kupita matuku a bungi, mukalenga wa bena Ejipitu kufua. Bena Izrayele ba-tshivua badila muadi, bela mbila, bua dikenga divuabu nadi. Kadi miadi yabu ya mu bupika buabu kufika kudi Mvidi Mukulu.

²⁴ Mvidi Mukulu kumvua mikemu yabu, kuvuluka ndondu uvuaye mutue ne Abrahame, Izake ne Yakobe.

²⁵ Kumonaye bena Izrayele, kujadikaye dikenga divuabu nadi.