Ekesode 19 - MUKANDA WA MYIDI MUKULU

MVIDI MUKULU UDI UTUA NDONDU NE BENA IZRAYELE Mvidi Mukulu udi musue kutua ndondu ne bena Izrayele

^1-2 Bena Izrayele kumuka mu Refidime. Dituku dia kumpala dia ngondu muisatu kunyima kua dipatuka mu Ejipitu, kufikabu mu tshipela tshia Sinayi. Kuenzabu mitanda mu tshipela amu, pabuipi ne mukuna awu.

³ Moshe kubanda ku mukuna bua kumonangana ne Mvidi Mukulu. Maweja-Nangila muikale ku lusongu lua mukuna kubikila Moshe, umuambila ne: — Ndaku, wambile bena Izrayele, ndelanganyi ya Yakobe, ne:

⁴ “Nudi badimuene mundi muenzele bena Ejipitu. Meme kunuambula mudi nyunyi wa tshiminyi wambula bana bende pa mapuapua, kunufikisha kundi meme.

⁵ Mpindiewu, nuenu bitabe tshindi nnuambila, balame ndondu wanyi, nenuikale tshisamba tshianyi tshindi musungule munkatshi mua bisamba bionsu bidi pa buloba. Bualu buloba bujima mbuanyi meme.

⁶ Kadi tshisamba tshienu netshikale tshia batuangaji, bantu bajidila, badi bangenzela mudimu.” Wambile bena Izrayele bonsu malu andi nkuambila aa.

⁷ Moshe kutuluka ku mukuna, kupingana mu mitanda, kubikidisha bakulu ba bena Izrayele, kubambila bionsu bivua Maweja-Nangila mumuambile.

⁸ Bantu bonsu kuitaba ne: — Netuenze bionsu bidi Maweja-Nangila muambe. Moshe kufikisha bivua bantu bandamune kudi Maweja-Nangila.

⁹ Maweja-Nangila kuambila Moshe ne: — Ndi mpueka musokome mu divuba bua kuyukila nebe, bua, padi bantu bumvue mutudi tuyukila nebe, bakuitabe. Moshe kufikisha bivua bantu bandamune kudi Maweja-Nangila.

Mvidi Mukulu udi usambakena ne Moshe pa mukuna wa Sinayi

¹⁰ Maweja-Nangila kuambila Moshe ne: — Pingana kudi bantu, ubambile ne: “Lelu ne malaba numushe mikiya, nusukule kabidi bilamba bienu.”

¹¹ Bangindile, bualu dituku disatu meme nempueke ku mukuna wa Sinayi, bena Izrayele bonsu batangile.

¹² Kadi, ubaleje muaba udibu mua kuimanyina kuinshi kua mukuna. Ubakandike bua kababandi ku mukuna, kabaulengi nansha. Bualu muntu musemene pabuipi ne mukuna nebamushipe.

¹³ Muntu nansha nyama wasemena pabuipi ne mukuna, bua kumushipa, kabamulengi pambidi to, bamuase mabue nansha mikete. Amu pelabu mpungi, bamue bantu nebasemene ku mukuna.

¹⁴ Moshe kutuluka ku mukuna. Kuambilaye bena Izrayele malu onsu awu. Kusululabu bilamba biabu, kumushabu mikiya.

¹⁵ Moshe kubambila kabidi ne: — Munkatshi mua matuku asatu, kanubueledi bakaji mu nzubu to.

¹⁶ Nanku, dituku disatu dinda, makubakuba ne miele ya mvula kumvuika ku mukuna. Pashishe divuba dinene kumueneka ku mukuna. Bantu bonsu bavua mu mitanda, bumvue kabidi muadi mukole wa mpungi, kuzakala bikole.

¹⁷ Moshe kumuka ne bantu mu mitanda kusemena ku mukuna bua kumonangana ne Mvidi Mukulu. Kuimanyinabu pa bule kuinshi kua mukuna.

¹⁸ Mukuna wa Sinayi uvua mufikisha kudi muinshi, bualu Maweja-Nangila uvua mupueke pa mukuna munkatshi mua muinshi wa kapia. Muinshi uvua ubanda bu tshikutu tshia kapia. Mukuna mujima kunyunga bikole.

¹⁹ Miadi ya mpungi kuumvuika bikole ku mukuna. Moshe uvua uyukila ne Mvidi Mukulu, Mvidi Mukulu umuandamuna ne diyi bu dia dikubakuba dia mvula.

²⁰ Maweja-Nangila kutuluka ku lusongu lua mukuna wa Sinayi, kubikila Moshe. Awu pende kuitaba, kubanda pa mukuna.

²¹ Maweja-Nangila kumuambila ne: — Tuluka, ubele bantu ne: kabasemenyi pabuipi ne mukuna bua kummona. Bualu bobu benze nanku, bavule ba kudibu nebafue.

²² Batuangaji badi mua kufika pabuipi nanyi, kadi bumushe mikiya. Tshianana ndi mua kubashipa.

²³ Moshe kuandamuna Maweja-Nangila ne: — Bantu kabena mua kusemena pabuipi ne mukuna wa Sinayi to. Bualu wewe uvua mubadimuje bua bimanyine anu pa bule kuinshi kua mukuna.

²⁴ Nanku, Maweja-Nangila kuandamuna ne: — Tuluka, uye kukeba muanenu Arone mu mitanda. Nubande nende. Kadi batuangaji ne bantu bonsu kababandi ku mukuna kundi to. Tshianana ndi mua kubashipa.

²⁵ Moshe kutuluka, kuya kuvua bantu, kubalondelaye bionsu bivua Maweja-Nangila mumuambile abi.