Ekesode 18 - MUKANDA WA MYIDI MUKULU

Yetro udi umonangana ne Moshe

¹ Yetro, mutuangaji wa mu Madiyane, tatuende muenu wa Moshe, kumvua-ye lumu lua bionsu bivua Maweja-Nangila Mvidi Mukulu muenzele Moshe ne bena Izrayele pawaye mubapatule mu Ejipitu.

² Nanku Yetro kuangata Sefora, mukaji wa Moshe, uvua Moshe mutume kuabu.

³ Kuangataye kabidi bana ba balume babidi ba Sefora: ke Ngershone uvua Moshe muinyike nanku, bualu uvua muambe ne: “Ndi muenyi mu ditunga dia bende.”

⁴ Muana muibidi ke Eliyezere, mmumue ne: “Mvidi Mukulu wa bankambua banyi mmuntabalele lelu, mumpandishe ku lufu lua kudi mukalenga wa bena Ejipitu.”

⁵ Nanku Yetro, tatuende muenu wa Moshe, ne mukaji wa Moshe, pamue ne bana ba Moshe babidi abu, kufika mu tshipela ku mukuna wa Mvidi Mukulu, muaba uvua Moshe mutudile.

⁶ Yetro kutumina Moshe muntu ne mukenji ne: “Ndi tatuebe muenu. Ndi ne mukajebe ne bana bebe kabidi.”

⁷ Moshe kuya kuakidila tatuende muenu, kutua binu panshi kumupukila. Kuelanganabu muoyi bakoleshangana. Pashishe Moshe kubabueja mu ntenta.

⁸ Moshe kulondela tatuende muenu muvua Maweja-Nangila mukengeshe bena Ejipitu ne mukalenga wabu mu tshimuangi tshia bena Izrayele. Kumulondelaye kabidi muvua Maweja-Nangila mubapandishe mu makenga onsu avuabu nawu mu njila.

⁹ Yetro kusanka bikole bua bilenga bionsu bivua Maweja-Nangila muenzele bena Izrayele bua kubapatula mu bupika bua bena Ejipitu.

¹⁰ Kuambaye ne: — Maweja-Nangila atumbe, bualu uvua mukuambuluishe, mukupatule mu tshinyangu tshia bena Ejipitu ne tshia mukalenga wabu.

¹¹ Mpindiewu ndi njadika ne: Maweja-Nangila mmupite mvidie yonsu idi bantu batendelela. Mmudileje nanku diba divua bena Ejipitu bakengeshe bena Izrayele bikole.

¹² Pashishe Yetro, tatuende muenu wa Moshe, kuoshila Maweja-Nangila nyama ya milambu. Kumulambulaye kabidi milambu ya ditua ndondu. Arone ne bakulu bonsu ba bena Izrayele, pamue ne Yetro, kudia biakudia bia tshijila abi.

Moshe udi usungula bakulu bakoshi ba nsambu

¹³ Butshia dinda, Moshe kusomba bua kumvua bilumbu bia bantu. Bantu bavua amu bimane kumpala kuende too ne ku dilolu.

¹⁴ Tatuende muenu umona bionsu bivua Moshe wenzela bantu, kukonkaye Moshe ne: — Udi wenza mudimu anu nkayebe bua tshinyi? Udi muimanyike bantu ku dinda too ne ku dilolu bua tshinyi?

¹⁵ Moshe kumuandamuna ne: — Bantu aba mbafike kundi bua kuebeja mudi Mvidi Mukulu mua kukosa bilumbu biabu.

¹⁶ Padibu ne tshilumbu, badi bafika kundi. Ndi njikija matandu abu. Pashishe ndi mbamanyisha meyi ne mikandu bia Mvidi Mukulu.

¹⁷ Tatuende muenu wa Moshe kumuambila ne: — Mushindu uudi wenza mudimu kawena mukumbane to.

¹⁸ Wewe ne bantu bonsu badi bimane aba nenupungile. Bualu mudimu ewu udi mupite bukole. Kuena mua kuwenza amu nkayebe to.

¹⁹ Mbimpe witabe tshindi nkuambila. Mvidi Mukulu akuambuluishe. Wewe ushale anu Muakuidi wa bantu kudi Mvidi Mukulu. Wikale ufikishe bilumbu bia bantu kudi Mvidi Mukulu.

²⁰ Ulongeshe bantu meyi ne mikenji bia Mvidi Mukulu, bua babilame, bakumbaje bidiye musue.

²¹ Pashishe, usungule bantu ba nsongu badi batshina Mvidi Mukulu munkatshi mua bena Izrayele. Bantu badi bamba malu malelela, babenga mabuejila ubateke bakulu badi ku mutu kua bantu tshinunu, lukama, makumi atanu too ne kua bantu dikumi.

²² Bakulu abu, nebalumbuluishe bantu matuku onsu bua kukuambuluisha. Nebakutuadile wewe anu bilumbu binene. Kadi bobu nebajikije tulumbu tukese. Nanku, mudimu webe neukepele.

²³ Wewe muenze mundi nkuambila amu, — Mvidi Mukulu mukutume kabidi bua kuenza nanku — kuena upungila to. Kabidi bantu bonsu nebapingane ku nzubu yabu anu bimpe, bumvuangane.

²⁴ Moshe kuitaba bionsu bivua tatuende muenu mumuambile. Kubikumbajaye.

²⁵ Kusungulaye bantu bashindame munkatshi mua bena Izrayele. Kubatekaye bakulu badi ku mutu kua bantu tshinunu, lukama, makumi atanu too ne ku kua bantu dikumi.

²⁶ Bakulu abu, bavua balumbuluisha bilumbu bikese matuku onsu. Kadi bilumbu binene bavua baye nabi kudi Moshe.

²⁷ Moshe kulayangana ne tatuende muenu. Awu kupingana kuende.