Ekesode 17 - MUKANDA WA MYIDI MUKULU

Mayi a Massa ne a Meriba

¹ Bu muvua Maweja-Nangila mubambile, bena Izrayele kumuka bonsu pamue mu tshipela tshia Sine, benda bimana mu njila bua kuya mu Refidime. Kuasabu mitanda. Kadi muaba awu kauvua mayi a kunua to.

² Kutandishabu Moshe, bambe ne: — Tupeshayi mayi a kunua! Moshe kubakonka ne: — Nudi nuntandisha bua tshinyi? Nudi nuteta Maweja-Nangila bualu kaayi?

³ Kadi bu muvua bantu bonsu bapungila ne nyota, bavua anu banungana, bamba ne: — Udi mutupatule mu Ejipitu bua tuetu kufua nyota ne bana betu ne bimuna bietu bua tshinyi?

⁴ Moshe kuebeja Maweja-Nangila ne: — Bantu aba badi bakeba kungasa mabue bua kunshipa, mbenzele tshinyi?

⁵ Maweja-Nangila kuambila Moshe ne: — Pita kumpala kua bantu ne bamue bakulu ba bena Izrayele. Angata dikombu diuvua mupandulule nadi musulu wa Nile adi.

⁶ Meme nengimane kumpala kuenu pa lubuebue ludi pa mukuna wa Sinayi. Utuute dikombu pa lubuebue, mayi apatuke bua bena Izrayele banue. Moshe kutuuta dikombu pa lubuebue, bakulu ba bena Izrayele bonsu batangile.

⁷ Bantu kuinyika muaba awu dina ne: Massa (mmumue ne: Diteta) ne Meriba (mmumue ne: Matandu), bualu bena Izrayele bavua batandisha Moshe. Kabidi bavua bateta Maweja-Nangila, badikonka ne: “Maweja-Nangila udi munkatshi muetu anyi kenamu?”

Bena Amaleke badi babunda bena Izrayele

⁸ Bena Amaleke kufika mu Refidime bua kuluisha bena Izrayele.

⁹ Moshe kuambila Yoshuwa ne: — Sungula bantu ba bukole. Nuye kuluangana ne bena Amaleke. Kadi meme malaba nengimane pa katongobela ka mukuna, mukuate dikombu dia Mvidi Mukulu mu bianza.

¹⁰ Yoshuwa kuya kuluangana ne bena Amaleke, bu muvua Moshe mumuambile. Moshe, Arone ne Ure kubanda pa katongobela ka mukuna.

¹¹ Pavua Moshe wela tshianza mulu, bena Izrayele bavua bapita bena Amaleke bukole. Pavuaye upuekesha tshianza, bena Amaleke bavua batshimuna bena Izrayele.

¹² Bu muvua maboku a Moshe ashikila, Arone ne Ure kuteka dibue bua Moshe kusomba. Pashishe Arone ne Ure kumukuata ku maboku, ewu eku, mukuabu eku, babandishe maboku too ne ku dilolu.

¹³ Ke muvua Yoshuwa mushipe bena Amaleke bonsu, mubabutule nanku.

¹⁴ Maweja-Nangila kuambila Moshe ne: — Funda bualu ebu mu mukanda, bua bantu babuvuluke. Umanyishe Yoshuwa ne: meme nembutule bena Amaleke bonsu. Muntu nansha umue kakubavuluka kabidi to.

¹⁵ Ke Moshe kuashila Maweja-Nangila tshilambuilu, kutshinyika dina ne: “Maweja-Nangila ke dibendela dianyi.”

¹⁶ Moshe kuamba ne: — Bu mudi bena Amaleke babunda nkuasa wa butumbi wa Maweja-Nangila, Maweja-Nangila neabaluishe matuku onsu.