Ekesode 16 - MUKANDA WA MYIDI MUKULU

Mana ne nyunyi ya tulumbu

¹ Bena Izrayele kumuka bonsu mu Elime. Mu matuku dikumi ne atanu a ngondu muibidi, kunyima kua dipatuka diabu mu Ejipitu, kufikabu mu tshipela tshia Sine, tshidi pankatshi pa Elime ne mukuna wa Sinayi.

² Mu tshipela amu, bena Izrayele kujana Moshe ne Arone,

³ bamba ne: — Maweja-Nangila uvua mua kutubutuila nansha mu Ejipitu, mutuvua tudia minyinyi ngesu tente ne mampa tuukuta, basombele panshi. Kadi nudi batufikisha mu tshipela emu bua kutubutula ne nzala!

⁴ Maweja Nangila kuambila Moshe ne: — Ndi musue kukutumina biakudia bia mu diulu. Dituku dionsu, bena Izrayele nebaboye biakudia bikumbane, kadi anu bua dituku adi. Ke mundi nnuteta, bua meme kujadika ne: bena Izrayele nebitabe mikenji yanyi anyi?

⁵ Muladilu wa Dituku dia Dikisha, pikala bena Izrayele balamba biakudia bivuabu baboya bua kudia dituku dimue, nebituntumuke bienze bia matuku abidi.

⁶ Moshe ne Arone kuambila bena Izrayele bonsu ne: — Dilolu edi, nenujadike ne: Maweja-Nangila ke uvua mutupatule mu Ejipitu.

⁷ Kadi dinda nenumone butumbi buende, bualu mmumane kumvua munudi numujana. Tuetu katuena bakumbane nansha bua nutujane.

⁸ Moshe kuambila bena Izrayele ne: — Maweja-Nangila dilolu edi neanupeshe munyinyi, dinda neanupeshe mampa, nudie nuukute, bualu mmumvue bijanu bienu. Yeye ke unudi nujana. Kanuena nutujana tuetu to. Tuetu tudi tshinyi?

⁹ Moshe kuambila Arone ne: — Bikila bena Izrayele bonsu, basemene kudi Maweja-Nangila, bualu mmumane kumvua bijanu biabu.

¹⁰ Patshivua Arone wambila bena Izrayele malu awu, bena Izrayele batangila ku tshipela, kumonabu butumbi bua Maweja-Nangila mu divuba.

¹¹ Maweja-Nangila kuambila Moshe ne:

¹² — Ndi mumane kumvua bijanu bia bena Izrayele. Kadi ubambile ne: “Dilolu edi, nenudie munyinyi: dinda nenudie mampa nuukute, bua nujadike ne: meme ndi Maweja-Nangila Mvidi Mukulu wenu!”

¹³ Dilolu adi, nyunyi ya tulumbu kuikila muaba uvua bena Izrayele batudile. Butshia dinda, lume kutalaja miaba yonsu ivua pabuipi ne mitanda yabu.

¹⁴ Miaba yonsu ayi kushalamu bintu bikese bikuatakane bu mudi mabue a mvula.

¹⁵ Kadi, bu muvua bena Izrayele kabayi bamanye bintu abi, kukonkanganabu ne: — Etshi ntshinyi? Moshe kubambila ne: — Bintu ebi mmampa adi Maweja-Nangila munutumine bua nuenu kudia.

¹⁶ Maweja-Nangila mmuambe bua nuenu kuboya biakudia bikumbane bua muntu yonsu kudia kuukuta. “Nanku muntu yonsu aboye anu litre inayi ku muntu ku muntu, bilondeshile bungi bua bena diende.”

¹⁷ Bena Izrayele kuambula biakudia abi. Bamue kuambula bia bungi, bakuabu kuambula bikese.

¹⁸ Kupimabu biakudia bionsu abi. Muntu uvua muambule bia bungi, kavua nabi bipite, uvua muambule bikese, uvua anu nabi bikumbane. Muntu yonsu uvua nabi bungi buvuaye nabu dikenga.

Mikenji mishilangane idi itangila mana

¹⁹ Moshe kubambila kabidi ne: — Biakudia ebi, nubidie bijika anu dituku dimue.

²⁰ Bena Izrayele bakuabu kubenga diyi dia Moshe, kushiya biakudia bikuabu bua kudia dinda. Kadi biakudia abi kubola bionsu, kunyanguka ne bikusu. Moshe kubafikila munda.

²¹ Biangatshile ku dituku adi, bena Izrayele kuboya dinda dionsu biakudia bikumbane, bua muntu yonsu kudia kuukuta. Kadi pavua munya ukola, biakudia bivua bishale panshi bivua bienguluka.

²² Muladilu wa Dituku dia Dikisha, muena Izrayele yonsu uvua wambula litre ya biakudia muanda mukulu pa mutu pa inayi iwaye wambula ku dituku. Bamfumu ba bena Izrayele kuya kumanyisha Moshe bualu abu.

²³ Moshe kubandamuna ne: — Maweja-Nangila mmumane kuamba ne: malaba ndituku dia kuikisha, dia tshijila dia Maweja-Nangila. Nanku nulambe biakudia munudi basue. Pikalabi bishale, nubilame bua kudia malaba.

²⁴ Bena Izrayele kulama biakudia abi too ne dinda, bu muvua Moshe mubambile. Kadi biakudia kabivua binyanguke bibuele bikusu to.

²⁵ Moshe kuambila bena Izrayele ne: — Nudie biakudia ebi lelu. Kanuakupeta bikuabu pa mbelu to. Bualu lelu ndituku dia Dikisha dia Maweja-Nangila.

²⁶ Nenuikale nupeta biakudia matuku asambombu malondangane. Kadi dituku dia muanda mutekete kanuakubipeta to, bualu ndituku dia kuikisha.

²⁷ Dituku dia muanda mutekete bena Izrayele bakuabu kumuka mu mitanda bua kukeba biakudia. Kadi kabena babisangana to.

²⁸ Maweja-Nangila kukonka Moshe ne: — Bena Izrayele nebabenge kuitaba meyi anyi ne mikenji yanyi too ne ku diba kaayi?

²⁹ Nuvuluke ne: ndi munupeshe dituku dia muanda mutekete bua dikale dia dikisha. Ke pandi munupeshe muladilu wa dituku adi, biakudia bikumbane bua nuenu kudia matuku abidi. Nanku, lekelayi kuendakana dituku dia muanda mutekete. Muntu yonsu asombe ku mbelu kuende.

³⁰ Nanku bantu bonsu kuikisha dituku dia muanda mutekete.

³¹ Bena Izrayele kuinyika biakudia abi ne: mmana. Bivua bitoke bifuanangane ne ntete ya koriandre. Kabidi bivua bisheme bu mikata mienza ne buitshi.

³² Moshe kubamanyisha kabidi ne: — Maweja-Nangila udi wamba ne: nulame mana makuabu bua kualeja ndelanganyi yenu, imona biakudia bivua Maweja-Nangila unudisha mu tshipela mu dipatuka dienu mu Ejipitu.

³³ Moshe kuambila Arone ne: — Angata litre ya mana inayi, wela mu dibungu. Uteke dibungu adi kumpala kua Maweja-Nangila bua kulamina ndelanganyi yenu.

³⁴ Arone kuteka dibungu adi kumpala kua mushete wa ndondu, bua kudilama bu muvua Maweja-Nangila muambile Moshe.

³⁵ Bena Izrayele kudia mana awu bidimu makumi anayi, too ne ku difika diabu mu ditunga divua bantu base, nanku too ne papitabu ku mikalu ya ditunga dia Kenaane.

³⁶ (Mana avua muntu yonsu upeta, avua bu litre inayi. Mmumue ne: tshia dikumi tshimue tshia tshipimu tshia tshibidilu.)