Ekesode 14 - MUKANDA WA MYIDI MUKULU

Mukalenga wa bena Ejipitu udi ulondakaja bena Izrayele

¹ Maweja-Nangila kuambila Moshe ne:

² — Manyisha bena Izrayele bapingane, base mitanda yabu kumpala kua Pi-Hahirote, pankatshi pa Migdole ne mayi manene, pabuipi ne Baale-Sefone.

³ Mukalenga wa bena Ejipitu neele meji ne: bena Izrayele mbapambuke mu njila, bajimine mu tshipela.

⁴ Pashishe, meme Maweja-Nangila nempeshe mukalenga wa bena Ejipitu muoyi wa tshitunu, bua anulonde. Nanku, nendeje butumbi buanyi, nembabutule, yeye mukalenga ne biluilu biende bionsu. Bena Ejipitu nebajadike ne: meme ndi Maweja-Nangila. Bena Izrayele kuenza bionsu bivuabu babambile abi.

⁵ Mukalenga wa bena Ejipitu ne bena mu bukalenga buende kumvua ne: bena Izrayele mbamane kunyema. Nanku kuambabu ne: “Tudi benze bibi. Katuvua mua kuanyisha bua bapika betu bena Izrayele bumuke to.”

⁶ Mukalenga wa bena Ejipitu kulongolola ditempu diende dia mvita lukasa, kubalondakaja ne tshiluilu tshiende.

⁷ Kuangataye matempu onsu a mu Ejipitu, kadi nangananga matempu mimpe nkama isambombu. Ditempu dionsu divua ne muendeshi ne bena mvita kabidi.

⁸ Maweja-Nangila kupesha mukalenga wa bena Ejipitu muoyi wa tshitunu. Awu kulonda bena Izrayele, bualu bena Izrayele bavua bapatuke mu Ejipitu bu bantu bakadi mua kudienzela malu.

⁹ Bena Ejipitu kuangata matempu abu a mvita, tubalu ne bena mvita, kulonda bena Izrayele. Kubasanganabu basombe ku muelelu wa mayi manene makunze, pabuipi ne Pi-Hahirote, batangilangane ne Baale-Sefone.

¹⁰ Bena Izrayele bamone muvua bena Ejipitu babalonda ne mvita, kabidi muvua mukalenga wabu ufika, kutshinabu bikole. Kuelabu Maweja-Nangila mbila mikole bua abambuluishe.

¹¹ Kukonkabu Moshe ne: — Uvua mutupatule mu Ejipitu bua tuetu kuluila mu tshipela bua tshinyi? Mu Ejipitu kamuvua nkita anyi? Tshiuvua mutupatuile mu Ejipitu ntshinyi?

¹² Tuvua bamane kukuambila ne: “Utulekele, tuikale bapika ba bena Ejipitu. Bualu mbimpe kuenzela bena Ejipitu mudimu pa mutu pa kufuila mu tshipela!”

¹³ Moshe kuandamuna bena Izrayele ne: — Nukoleshe muoyi. Kanutshinyi to! Nenumone mudi Maweja-Nangila unupandisha lelu. Bena Ejipitu banudi bamona aba, katshia kanuakubamona kabidi to.

¹⁴ Lekelayi kupampakana, bualu Maweja-Nangila nealuangane mvita eyi pa mutu penu.

Mvidi Mukulu udi wenza njila munkatshi mua mayi manene

¹⁵ Maweja-Nangila kuambila Moshe ne: — Lekela kungela mbila bua imuambuluishe. Ambila amu bantu ne: nutungunuke ne luendu.

¹⁶ Kadi, wewe olola dikombu diebe pa mayi, apanduluke. Bena Izrayele basabuke ku makasa kuma.

¹⁷ Nempeshe bena Ejipitu muoyi mukole wa tshitunu bua banulonde. Pashishe meme nendeje butumbi buanyi. Nembutule mukalenga wa bena Ejipitu ne tshiluilu tshiende tshijima, matempu ne badi babanda pa tubalu.

¹⁸ Pambaleja butumbi buanyi nanku, bena Ejipitu nebajadike ne: meme ndi Maweja-Nangila.

¹⁹ Mutumibue wa Mvidi Mukulu kuya kuimana kunyima kua mitanda ya bena Izrayele. Divuba kabidi, divua kumpala kuabu, kupingana kunyima kuabu.

²⁰ Nanku divuba divua dimane pankatshi pa mitanda ya bena Izrayele ne mitanda ya bena Ejipitu, ditokeshila bena Izrayele, difila midima kudi bena Ejipitu. Nanku butuku bujima baluishi kabavua mua kupetangana.

²¹ Butuku abu, Moshe kuolola tshianza pa mayi manene. Butuku bujima Maweja-Nangila kutuma tshipepela tshikole, tshifumina luseke ludi diba dipatukila. Tshipepela atshi kupandulula mayi manene, buloba buma kumueneka.

²² Mayi awu, kupanduluka bu tshimana ku dia balume, tshikuabu ku dia bakaji. Bena Izrayele kusabuka ku makasa kume.

²³ Bena Ejipitu kubalondakaja ne tubalu tua mukalenga wabu, matempu, ne bavua babanda pa tubalu. Kulondabu bena Izrayele too ne mu mayi manene.

²⁴ Patshiatshia, Maweja-Nangila, uvua mu divuba ne mu tshimunyi tshia kapia, kumona tshiluilu tshia mvita tshia bena Ejipitu. Kutshiompakajaye tshiluilu atshi.

²⁵ Kunyangaye nkata ya matempu abu a mvita. Kupangabu mua kutungunuka ne luendu. Ke bena Ejipitu kuela mbila ne: — Tunyemayi bena Izrayele, bualu Maweja-Nangila udi ubaluila mvita bua kututshimuna.

²⁶ Maweja-Nangila kuambila Moshe ne: — Olola tshianza pa mayi manene, bua mayi apingane, abutule bena Ejipitu ne tshiluilu tshiabu.

²⁷ Moshe kuolola tshianza pa mayi. Patshiatshia mayi kupingana muawu mua kale. Bena Ejipitu kunyema. Kadi Maweja-Nangila kubabutula bonsu munkatshi mua mayi.

²⁸ Mayi awu kubutula matempu ne bavua babanda pa tubalu bia tshiluilu tshijima tshia mukalenga wa bena Ejipitu, tshivuabu balonda natshi bena Izrayele mu mayi. Muntu nansha umue wa bena Ejipitu kena mupande to.

²⁹ Kadi bena Izrayele bavua bapita munkatshi mua mayi manene ku makasa kume, mayi mimane bu tshimana ku dia balume, tshikuabu ku dia bakaji.

³⁰ Dituku adi ke divua Maweja-Nangila musungidile bena Izrayele ku bianza bia bena Ejipitu. Bena Izrayele kumona bitalu bia bena Ejipitu ku muelelu wa mayi.

³¹ Kujadikabu ne: Maweja-Nangila mmubasungidile mu bianza bia bena Ejipitu ku bukole buende. Bantu bonsu kutshina Maweja-Nangila, kumutekemena. Kutekemena kabidi kudi muntu wende Moshe.