Ekesode 12 - MUKANDA WA MYIDI MUKULU

Tshibilu tshia Dipita dia Maweja-Nangila

¹ Pavua Moshe ne Arone mu ditunga dia Ejipitu, Maweja-Nangila kubambila ne:

² “Ngondu ewu ikale wenu wa ntuadijilu wa tshidimu.

³ Nuambile bena Izrayele bonsu ne: Dituku dia dikumi dia ngondu ewu, nusungule muana wa mukoku nansha muana wa mbuji ku diku dionsu nansha ku nzubu yonsu.

⁴ Pikala bena mu diku bakese kabayi mua kudia munyinyi awu kujikija, badisange ne bena mutumba bilondeshile bungi bua bantu. Kadi nusungule muana wa mukoku nansha muana wa mbuji udi mukumbane bua muntu yonsu kupetaye munyinyi wonsu udiye mua kudia.

⁵ Muana wa mukoku nansha muana wa mbuji awu ikale wa tshidimu tshimue, kayi ne tshilema pambidi, kabidi anu mulume wa nyama.

⁶ Nulame tshimuna atshi too ne ku dituku dia dikumi ne dinayi dia ngondu ewu. Pashishe bena Izrayele bonsu nebashipe nyama wabu awu dilolu.

⁷ Ku nzubu yonsu kudibu badie munyinyi awu, nebalabe mashi ku dibaya didi kulu kua tshiibi ne ku mabaya adi ku nseke yatshi.

⁸ Butuku abu nebakange munyinyi awu. Nebaudie ne mampa adi kaayi mela buanga, kabidi ne biseki bia buanji.

⁹ Kadi bitupa bionsu bia nyama awu, nansha mutu, bibelu ne bia munda mene, kanuena mua kubidia bibishi nansha bilamba to, anu biosha muiku.

¹⁰ Kabidi munyinyi awu nudie ujike dituku dimue. Pikalawu mushale dinda nuwoshe.

¹¹ Nudie munyinyi awu mushindu ewu: nusuike mukaba mu tshimonu, dikombu ku bianza, bisabata ku makasa. Nudie anu lukasa lukasa, bualu ntshibilu tshia Dipita dia Maweja-Nangila.

¹² “Butuku abu, meme Maweja-Nangila nempitshile mu ditunga dia Ejipitu. Nenshipe bamuanabute bonsu ba bantu ne ba nyama. Kabidi nembutule mvidie idi bena Ejipitu batendelela.

¹³ Mashi adi ku muelelu wa biibi bia nzubu inudi nusomba awu, neikale tshimanyinu tshidi mua kunupandisha. Pambamona mashi awu, nempite mu njila tshiyi imubutula to. Nanku nembutule anu bena Ejipitu.

¹⁴ “Nuenu ne ndelanganyi yenu yonsu nuikale nuvuluka dituku edi. Nungenzele meme Maweja-Nangila tshibilu. Mukenji ewu ushale kashidi.”

Tshibilu tshia mampa kaayi mela buanga

¹⁵ Maweja-Nangila kuamba ne: “Matuku malondangane muanda mutekete, nudie anu mampa kaayi mela buanga. Dituku dia kumpala, numushe manga a mampa onsu adi mu nzubu yenu. Biangatshile ku dituku dia kumpala too ne ku dituku dia muanda mutekete, muntu yonsu udi udia mampa mela buanga, nebamumushe munkatshi mua bena Izrayele.

¹⁶ Dituku dia kumpala ne dituku dia muanda mutekete, ikale matuku a kuenza masangisha a tshijila. Matuku awu kanuenji midimu mikuabu to, anu ya kulamba biakudia.

¹⁷ “Misangu yonsu mwuluke tshibilu tshia kudia mampa kaayi mela buanga. Bualu tshidi tshinuvuluija dituku dimvua mupatule bantu benu mu Ejipitu. Mukenji ewu nuulame kashidi ku ndelanganyi ne ku ndelanganyi yenu yonsu.

¹⁸ Nanku matuku dikumi ne anayi a ngondu wa kumpala dilolu, too ne ku matuku makumi abidi ne dimue dilolu, nudie anu mampa kaayi mela buanga.

¹⁹ Matuku muanda mutekete malondangane awu, kanulami buanga bua mampa mu nzubu yenu to. Muntu yonsu udi udia mampa mela buanga, nansha yeye muenyi anyi muena ditunga, nebamumushe munkatshi mua bena Izrayele.

²⁰ Nunku kanuena mua kudia bintu biela buanga bua mampa to. Miaba yonsu inudi basombe, nudie anu mampa kaayi mela buanga.”

Bilongolola dia Didia dia Dipita dia Maweja-Nangila

²¹ Moshe kubikila bakulu bonsu ba bena Izrayele kubambila ne: — Muntu yonsu asungule muana wa mukoku nansha muana wa mbuji bua meku enu. Numushipe bua kuenza tshibilu tshia Dipita dia Maweja-Nangila.

²² Nuangate mabeji a mutshi wa isope. Nuatue mu mashi adi mu dilongu. Nulabe mashi awu ku dibaya didi kulu kua tshiibi ne ku mabaya adi ku nseke yatshi. Kabidi nushale anu ku nzubu yenu too ne muatshia butuku. Muntu kapatuki to.

²³ Papita Maweja-Nangila bua kushipa bena Ejipitu, neamone mashi adi kulu kua tshiibi ne ku mabaya adi ku nseke yatshi. Nanku Maweja-Nangila kakuitaba bua mushipianganyi udiye mutume abuele mu nzubu yenu bua kunushipa to.

²⁴ Nuenu ne ndelanganyi yenu yonsu nuikale nuenza bualu ebu kashidi.

²⁵ Panuafika mu ditunga divua Maweja-Nangila munulaye, nuikale nuenza tshibilu etshi.

²⁶ Pikala bana benu banukonka ne: nudi nuenza tshibilu etshi bua tshinyi?

²⁷ Nubandamune ne: “Mmulambu wa tshivulukilu tshia Dipita dia Maweja-Nangila. Pavua bena Izrayele mu Ejipitu, Maweja-Nangila uvua mushipe bena Ejipitu. Kadi uvua mupitshile patupu ku nzubu ya bana betu, kayi muimane bua kubashipa. Uvua mutufuile luse ne bena meku etu bonsu.” Ke bena Izrayele kudiela panshi bua kukuila Maweja-Nangila.

²⁸ Kuyabu kuenza bionsu bivua Maweja-Nangila muambile Moshe ne Arone.

Dikenga dia ndekelu: lufu lua bamuanabute

²⁹ Mundankulu, Maweja-Nangila kushipa bamuanabute bonsu ba mu ditunga dia Ejipitu, biangatshile ku muanabute wa mukalenga wa ditunga, too ne ku muanabute wa muntu tshianana uvua mu nzubu wa lukanu. Kushipaye kabidi ne bamuanabute ba bimuna.

³⁰ Butuku abu mukalenga wa bena Ejipitu, balombodi ba mu bukalenga buende ne bena Ejipitu bakuabu babike ku tulu, kudilabu miadi bikole. Bualu muanabute wa ku nzubu kua muntu yonsu uvua mufue.

³¹ Anu butuku abu mukalenga wa bena Ejipitu kubikila Moshe ne Arone kubambila ne: — Umukayi ne bena Izrayele mu ditunga dianyi, nuye kutendelela Maweja-Nangila bu munuvua bandombe.

³² Angatayi bimuna bienu, nuye nabi. Kadi nundombele kudi Mvidi Mukulu wenu, angele lupemba.

³³ Bena Ejipitu kuipata bena Izrayele mu ditunga diabu bamba ne: “Umukayi lukasa, bualu tudi mua kubutuka.”

³⁴ Ke muvua bena Izrayele ne bua kuambula bukula bua mampa buvuabu bamane kusopa, buanga kabuyi buanji kubandisha ditapi. Kuambulabu kabidi ne tushete tuvuabu boshile mampa. Kubisuikabu mu bilamba, kubiambula pa makaya.

³⁵ Bena Izrayele kulomba bena Ejipitu bilamba ne bintu bienza ne tshiamu tshia mpawungi nansha ne tshiamu tshitoke tshia mushinga mukole bu muvua Moshe mumane kubambila.

³⁶ Maweja-Nangila kuambuluisha bena Izrayele. Kubanemekabu kudi bena Ejipitu, kupetabu bintu bivuabu balomba bena Ejipitu. Ke muvua bena Izrayele bapawule bintu bionsu bivua bena Ejipitu nabi.

³⁷ Pashishe bena Izrayele kumuka mu Ramsese bua kuya ku Sukote. Bavua bantu balume binunu nkama isambombu, katuyi babale bakaji, bana ne bantu bakulakaje.

³⁸ Bantu bakuabu musumba munene, ba bisamba bishilangane, bavua ne bena Izrayele mu njila amu, kabidi ne bimuna bipite bungi: mikoku, mbuji ne ngombe.

³⁹ Nanku bena Izrayele kuenza mikata ne ditapi dia bukula buvuabu basopa kabuyi buanji kubanda, buvuabu bumuka nabu mu Ejipitu. Kabavua ne diba dia kulamba biakudia, nansha dia kuangata bintu bia luendu. Bualu bena Ejipitu bavua benda babipatshila.

⁴⁰ Bena Izrayele bavuabashale mu Ejipitu bidimu nkama inayi ne makumi asatu.

⁴¹ Bidimu abi nkama inayi ne makumi asatu bikumbana, dituku dia tshivulukilu, bisamba bionsu bia bena Izrayele kupatuka mu Ejipitu balondangane bimpe mu milongu.

⁴² Bu muvua Maweja-Nangila mutshishe butuku abu bua kupatula bantu bende mu Ejipitu, ke mudi bena Izrayele pabu, ku ndelanganyi ne ndelanganyi, mua kutshisha dituku adi bua kuvuluka dipatuka diabu mu Ejipitu, bualu ndituku dia tshijila.

Mikenji ya tshibilu tshia Dipita dia Maweja-Nangila

⁴³ Maweja-Nangila kuambila Moshe ne Arone ne: — Mikenji ya tshibilu tshia Dipita dianyi idi nunku: “Muntu muenyi kena mua kudia biakudia bia Dipita dianyi to.

⁴⁴ “Mupika yonsu unudi basumbe, numuteke panshi bua amone mua kubidia.

⁴⁵ “Muena mudimu unudi nufuta, nansha muenyi udi usomba ku mbelu kuenu, kabena mua kudia biakudia abi to.

⁴⁶ “Nubidile anu mu nzubu, kanupatuki ne munyinyi pa mbelu. “Kanuzaji mifuba ya nyama.

⁴⁷ “Bena Izrayele bonsu bikale benza tshibilu etshi.

⁴⁸ “Pikala muenyi udi kumbelu kuebe musue kuenza tshibilu tshia Dipita dianyi, nuteke bantu balume bonsu, ne bana mene, ba mu diku diabu panshi, bua bikale bu bena Izrayele. “Kadi, muntu udi kayi muteke panshi, kena mua kudia biakudia abi to.”

⁴⁹ “Mikenji eyi idi bua bantu bonsu, benyi ne bena ditunga.”

⁵⁰ Bena Izrayele bonsu kuenza bivua Maweja-Nangila muambile Moshe ne Arone.

⁵¹ Anu dituku adi. Maweja-Nangila kupatula bena Izrayele mu Ejipitu, balondangane mu bisamba biabu.