Efeze 4 - MUKANDA WA MYIDI MUKULU

Bobumue mu Tshisumbu tshia bena ditaba

¹ Nanku, meme udibu bakuate mu lukanu, bualu ndi nkuatshila Mfumu mudimu, ndi nnulomba se: nuenze malu mimpe adi bantu, badi Mvidi Mukulu ubikila bua bikale bende, ne bua kuenza.

² Diba dionsu nudipuekeshe. Nuikale ne lutulu, kabidi ne diyi dimpe. Nulengululangane bilema, nunangangane.

³ Nuenze muenu muonsu bua kulama bobumue budi Mueyelu wa Tshijila ufila, pa kunusuikakaja pamue mu bupole.

⁴ Bualu mubidi udi umue, Mueyelu wa Tshijila amu umue. Ke mudi Mvidi Mukulu munubikidile kabidi ku ditekemena amu dimue.

⁵ Mfumu udi umue, ditaba didi dimue, kutua kua bantu mu mayi kudi kumue.

⁶ Mvidi Mukulu udi umue, udi Tatu wa bantu bonsu. Udi ku mutu kua bonsu, ukuata mudimu kudi bonsu, usomba munda mua bonsu.

⁷ Kadi yonsu wa kutudi mmupete dipa dia pa buadi, bilondeshile muvua Kristu mudifile.

⁸ Ke padi Mukanda wa tshijila wamba ne: “Diba divuaye mubande mulu, mmuye ne bena lukanu, mmuabanyine bantu mapa.”

⁹ Padibu bamba ne: “mmubande mulu,” mbuena kuamba ne: uvua muanji kupueka mu kandondu.

¹⁰ Uvua mupueke awu, ke Yeye menemene uvua mubande mulu, bua kuwujaye bionsu ne bukole buende.

¹¹ Yeye ke uvua mupeshe bantu mapa a pa buawu: uvua mubikile bakuabu bua bikale bapostolu, banga bua bikale bambi, bamue bua bikale balongeshi ba Lumu lua Disanka, bakuabu bua bikale balami ba bena ditaba, nansha balongeshi babu.

¹² Uvua muenze nanku bua kulongolola bantu ba Mvidi Mukulu, bua bakuatshile Kristu mudimu, bua mubidi wa Kristu utante mu ditaba.

¹³ Ke mutudi mua kuenza bonsu tshintu tshimue mu ditaba dietu, patudi tumanya Muana wa Mvidi Mukulu. Nanku netufike bonsu pamue ku mulongu wa Muntu mukole muakanangane: ke Kristu mu bujima buende.

¹⁴ Diba adi katuakuikala kabidi bana, badibu batekakaja kudi malongesha mashilangane, mushindu udi mavuala ne mpepele bitekakaja majuwa. Muntu utshidi muana mu ditaba, bena dishima badi bamupambula, banubueja mu ntupakanyi, ne malongesha abu a kudinga nawu bantu.

¹⁵ Kadi patudi bimane ne makasa abidi mu malu malelela, tunangangane kabidi, netutante bonsu, tuye kudi Kristu, mutu wetu.

¹⁶ Yeye nkayende ke udi utuangaja bikole bitupa bishilangane bia mubidi, ubisuikakaja ne manungu. Nanku padi tshitupa tshionsu tshia mubidi tshikuata mudimu amu pa wowu, mubidi mujima udi utanta, ukola mu dinanga.

Muoyi mupiamupia mu Kristu

¹⁷ Mu dina dia Mfumu, ndi nnuambila, nnujadikila se: kanuenji kabidi malu adi bantu badi kabayi bamanye Mvidi Mukulu benza, bualu badi balonda meji abu a patupu.

¹⁸ Badi ne lungenyi lukutakane. Bu mudibu bapange malu bikole, bapapisha muoyi wabu wa munda, kabakupeta muoyi udi Mvidi Mukulu ufila.

¹⁹ Bu mudibu kabayi bumvua bundu, badi badifila ku malu mabi a mishindu yonsu. Badi bakeba kunema nansha ku buenzavi buabu mene.

²⁰ Kadi Kristu uvuabu banumanyishe, udi ubenga nsombelu wa nanku.

²¹ Bulelela, nuvua bumvue bamba, banulongesha malu ende. Nanku nudi ne bua kulonda njila mulelela wa Yezu.

²² Nudi ne bua kuvula muntu wenu wa kale awu, kulekela malu mabi anuvua benze. Muntu mukulukulu ewu udi ne majinga ende mabi, adi anufikisha ku kabutu.

²³ Nuikale bantu bapiabapia. Nupete ne meji mapiamapia.

²⁴ Vualayi muntu mupiamupia, udi Mvidi Mukulu mufuke mu tshimfuanyi tshiende. Nuenze malu makane a tshijila adi Mvidi Mukulu musue. Muaku mulelela neunuleje njila.

²⁵ Nanku lekelayi dishima. Muntu yonsu ambile mukuende bualu amu mudibu. Bualu tuetu bonsu tudi bidimba bia mubidi umue.

²⁶ Panudi ne tshiji, kanuenji bibi. Tshiji tshienu katshinengi too ne ku dilolu.

²⁷ Tshianana, diabolu neapete mushindu wa kunupita bukole.

²⁸ Nanku, muntu uvua wiba, alekele kuiba, akuate mudimu muimpe, bua kudidisha, ne bua amone mua kuambuluisha kabidi udi mu dikenga.

²⁹ Kanuakudi muaku wa nsenda nansha umue. Kadi nuakule anu miaku milenga, idi ikolesha bantu ku muoyi, ilengelela badi banuteleja.

³⁰ Kanubungamiji Mueyelu wa Tshijila wa Mvidi Mukulu. Mueyelu udi tshitampi tshia Mvidi Mukulu, tshidi tshileja munudi bantu bende. Mueyelu udi ujadika kabidi ne: dituku nedifike didi Mvidi Mukulu unupikula kashidi ku bubi buonsu.

³¹ Lekelayi kanyinganyinga konsu, bumfika munda, ne tshiji tshionsu. Kanuedianganyi mbila ya bipendu. Kanuikadi ne lukinu kudi muntu nansha umue.

³² Kadi nuikale ne muoyi muimpe, nuambuluishangane. Nufuilangane luse, bu mudi Mvidi Mukulu munufuile luse mu Kristu.