Efeze 2 - MUKANDA WA MYIDI MUKULU

Kufua bua kupeta muoyi

¹ Kale nuvua bafue bua bilema bienu, ne bua mibi yenu.

² Nuvua benze malu mabi adibu benza pa buloba. Nuvua batumikile mfumu wa makole a mulu, mukishi mubi ewu utshidi ukuata mudimu munda mua bantu badi batombokela Mvidi Mukulu.

³ Bonsu buetu tuvua benze anu bu bobu. Tuvua tulonda amu majinga etu mabi. Tuvua tukumbaja amu bivua mubidi wetu, ne meji etu, bijinga. Nanku tuvua amu ne bua kupeta dinyoka kudi Mvidi Mukulu, bu bantu bakuabu bonsu.

⁴ Kadi Mvidi Mukulu udi ne luse lunene, kabidi udi utunanga bikole.

⁵ Ke muvuaye mutubishe pamue ne Kristu, diba dituvua bafue bua malu etu mabi. mMutupandishe amu ku luse luende patupu.

⁶ mMutubishe ku lufu pamue ne Kristu, bua kutusombesha mu nkuasa wa bumfumu mu diulu pamue nende.

⁷ Bionsu abi nebimueneke patoke mu matuku adi kumpala. Diba adi dinanga diende dinene dipite nedidileje patoke, bualu bua bidiye mutuenzele munda mua Yezu Kristu.

⁸ Bualu Mvidi Mukulu mmutusungile amu ku luse luende patupu. Nuenu kanuvua ne tshia kuenza. Tshienu tshivua amu kuanyisha mu ditaba dipa edi dia lupandu dia kudi Mvidi Mukulu.

⁹ Lupandu kaluena lufuma ku midimu yenu. Nanku muntu nansha umue kena mua kuditemba.

¹⁰ Bualu amu Mvidi Mukulu ke udi mutufumbe, mutufuke bua tuetu kudisanga ne Yezu Kristu, bua tukumbaje malu mimpe akavuaye mudianze kulongolola bua tuetu kuenza.

Tudi tshintu tshimue mu Yezu Kristu

¹¹ Kabavua banulele bena Yuda. Bena Yuda bavua banuamba ne: “ki mbabateke panshi.” Kadi bobu mene bavua babateka panshi amu mushindu udi bantu batekangana panshi. Nenku, vulukayi munuvua kale.

¹² Mu tshikondu atshi kanuvua pabuipi ne Kristu. Nuvua benyi. Kanuvua ba mu tshisamba tshia Izrayele, tshivua Mvidi Mukulu musungule. Ndondu ivua Mvidi Mukulu mutue ne bantu bende, ne malaya avuaye mubalaye, kabivua binutangila. Nuvua basombe panu, kanuyi batekemene tshintu, kanuyi ne Mvidi Mukulu.

¹³ Kadi nuenu bavua kule, mpindiewu nudi badisange nende. Nanku nudi basemene pabuipi ne Mvidi Mukulu ku lufu lua Kristu.

¹⁴ Amu Kristu ke udi mututuadile bupole, bualu mmusangishe bena Yuda, ne bantu ba bisamba bikuabu, mu tshisamba tshimue. Pavuaye mufile mubidi wende, mmupule tshimana tshivua pankatshi pabu, tshibatapulule, tshibenze bena lukuna.

¹⁵ Uvua mushipe mikenji ya bena Yuda, meyi ne mikandu biayi. Ke muvuaye mufile bupole munkatshi mua bantu ba bisamba bibidi ebi, mubenze muntu umue epele mupiamupia munda muende.

¹⁶ Ku lufu luende lua ku mutshi mutshiamakane, Kristu mmujikije lukuna kashidi. Ku mutshi awu mmusuikakaje bisamba bibidi mu mubidi umue, mmubatuangaje kabidi ne Mvidi Mukulu.

¹⁷ Nanku Kristu mmufike bua kumanyisha bantu Lumu lua Disanka, ludi lufila bupole kudi bantu bonsu, kunudi nuenu bantu ba bisamba bikuabu batua kabayi pabuipi ne Mvidi Mukulu, ne kudi bena Yuda batua pamue nende.

¹⁸ Bualu bua Kristu, tuetu bonsu, bena Yuda ne bantu ba bisamba bikuabu, bonsu basanga kudi Mueyelu wa Tshijila, tudi mua kusemena pabuipi ne Mvidi Mukulu.

¹⁹ Nanku nuenu bantu ba bisamba bikuabu, kanutshiena benyi, nansha bantu bafume kule. Nukadi bena tshisamba tshia Mvidi Mukulu, bamane kubuela mu diku diende.

²⁰ Nuenu kabidi nudi bidibu bibaka nabi nzubu. Tshitaku tshia nzubu awu, ke bapostolu ne bambi. Dibue dia mu ditumba ke Kristu mene.

²¹ Yeye ke udi utuangaja nzubu mujima, umubandisha, umuenza nzubu wa tshijila wa Maweja-Nangila.

²² Badisange nende, nudi penu bidibu bibaka nabi nzubu, bua, pamue ne bantu bakuabu bonsu, nuenze nzubu umue, muaba udi Mvidi Mukulu usomba mu Mueyelu wende.