Ebrewu 3 - MUKANDA WA MYIDI MUKULU

Yezu udi mupite Moshe

¹ Nanku, bana hetu bena ditaba, nuenu batata Mvidi Mukulu mubikile kabidi, nutangile Yezu utata Mvidi Mukulu mutume bua kuikalaye mutuangaji munene utudi tutonda mu ditaba dietu.

² Bualu Mvidi Mukulu utata mumusungule bua mudimu ewu, utata mumuanyishe kabidi bu mutataye muanyishe Moshe “mu nzubu wende mujima.”

³ Muntu udi wibaka nzubu udi ne lumu lupite lua nzubu mene. Nanku Yezu udi ne lumu lupite lua Moshe.

⁴ Bualu nzubu yonsu mmuibaka kudi muntu. Kadi Mvidi Mukulu ke udi muibake bintu bionsu.

⁵ Kadi Mvidi Mukulu utata muanyishe Moshe mu nzubu wende mujima. Uvua muntu mutume bua kumanyisha bonsu malu avua Mvidi Mukulu musue kuamba.

⁶ Kadi Mvidi Mukulu udi wanyisha Kristu bu Muanende, udi ku mutu kua nzubu wende. Nzubu wende awu ke tuetu, amu patudi tuindila ne muoyi umue ne lutulu, bitudi tutekemena.

Ditaba didi ditupetesha dikisha kua Mvidi Mukulu

⁷ Ke mudi Mueyelu wa Tshijila wamba ne: “Nuenu bumvue diyi dia Mvidi Mukulu lelu,

⁸ kanupapiji mioyi yenu bu tshikondu tshinuvua bamutombokele, dituku dinuvua bamutete mu tshipela.

⁹ Mvidi Mukulu udi wamba ne: Bankambua benu kumfunyina, kunteta mu tshipela amu, nansha muvuabu bamane kumona malu onsu amvua muenze bidimu makumi anayi.

¹⁰ Ke pamvua mubafikile munda. Ke meme kuamba ne: ‘Matuku onsu, meji abu adi aya kua patupu. Kabena bajingulule tshindi mutekemene kudibu.’

¹¹ Meme kuditshipa ne tshiji ne: bantu aba kashidi kabena babuela mu ditunga, dimvua mubalongoluele bua bikishe!

¹² Bana hetu, dimukayi! Muntu wa kunudi nansha umue kikadi ne muoyi mubi, wa kuvila ditaba, mufuane kulamuka kudi Mvidi Mukulu wa muoyi.

¹³ Kadi nukoleshangane ku muoyi dituku dionsu. Bidi Mikanda ya tshijila yamba bitshidi bilelela buetu tuetu “lelu.” Nenku muntu wa kunudi, kapapiji muoyi wende, kanyishi bua mibi imudinge.

¹⁴ Bualu tudi tuenda pamue ne Kristu mu njila, patudi tulama ne muoyi umue ditekemena dietu dia ku tshibangidilu too ne ku ndekelu.

¹⁵ Bualu Mukanda wa tshijila udi wamba ne: “Lelu panudi numvua diyi dia Mvidi Mukulu, kanupapiji mioyi yenu, bu tshikondu tshinuvua bamutombokele.”

¹⁶ Bavua bumvue diyi dia Mvidi Mukulu, bamutombokele mbanganyi? Ke bantu bonsu bavua Moshe mupatule mu Ejipitu.

¹⁷ Bavua Mvidi Mukulu mufikile munda bidimu makumi anayi mbanganyi? Ke bonsu bavua benze bibi. Kufuabu mu tshipeta.

¹⁸ Pavua Mvidi Mukulu muditshipe ne: “Bantu aba kashidi kabena babuela mu ditunga, dimvua mubalongoluele bua kuikisha,” bavuaye wamba nanku mbanganyi? Uvua wamba bua bonsu bavua batomboke.

¹⁹ Nenku tudi tumona ne: kabena babuela mu muaba ewu wa dikisha, bualu kabavua bitabe.