Ebrewu 2 - MUKANDA WA MYIDI MUKULU

Lupandu lupite bunene

¹ Ke patudi ne bua kuangata ne mushinga malu malelela atudi bumvue, bua katujiminyi.

² Mikenji ivua batumibue ba Mvidi Mukulu bafike nayi kutudi, ivua ne mushinga munene. Muntu yonsu uvua kayi muyilonde, mubenge kuyitumikila, mmupete dinyoka di-vuaye ne bua kupeta.

³ Nanku, patualengulula lupandu bunene nenku, mutuapanduka dinyoka mmunyi? Maweja-Nangila nkayende uvua mudianze kutumanyisha lupandu elu. Pashishe bavua bumvue mudi lupandu elu kutujadikilabu bunene bualu.

⁴ Mvidi Mukulu uvua kabidi mujadike bulelela bua bivuabu bambe ku bishima ne ku malu a kukema a mishindu yonsu. Uvua muabanye kabidi mapa a kudi Mueyelu wa Tshijila muvuaye musue.

Musungidi wa bantu

⁵ Bualu Mvidi Mukulu kena mupeshe batumibue bende bumfumu bua buloba butshidi kumpala butuvua batele to.

⁶ Kadi mu Mukanda wa tshijila muntu mukuabu udi wamba ne: “Eyi! Mvidi Mukulu, muntu mene nnganyi bua wewe kumuelela meji? Muana wa muntu nnganyi bua wewe kumutangila?

⁷ Udi mumupuekeshe kuinshi kua batumibue bebe, wewe kumupa butumbi ne lumu,

⁸ wewe kumupesha bumfumu bua bintu bionsu.” Padibu bamba ne: Mvidi Mukulu “mmupeshe muntu bumfumu bua bintu bionsu,” mmomumue ne: mmumupeshe bumfumu bua bintu bionsu, kakuyi nansha tshimue tshidi tshishale. Kadi katuena tumona ne: bintu bionsu bikadi ku bumfumu bua muntu lelu to.

⁹ Kadi tudi tumona ne: Yezu uvuabu bapuekeshe kakese kuinshi kua batumibue ba Mvidi Mukulu, bualu bua lufu luvuaye mufuile bantu, mmupete butumbi ne lumu. Nanku bualu bua dinanga didi Mvidi Mukulu utunanga nadi, Yezu mmufuile bantu bonsu.

¹⁰ Bualu Mvidi Mukulu — udi mufuke bionsu, kabidi udibu bafukila bionsu — uvua ne bua kupitshisha Yezu mu makenga bua kumufikisha ku bujima buende, bua amone mua kubueja bana bende bavule mu butumbi buende. Bualu Yezu ke udi ubafikisha ku lupandu.

¹¹ Yezu udi ulengeja bantu ku mibi yabu, ne bantu badiye ulengeja badi bonsu ne Tatu anu umue. Ke padi Yezu kayi umvua bundu bua kubabtkila ne: mbana hetu.

¹² Bualu udi wamba ne: “Eyi! Mvidi Mukulu wanyi, nengambile bana hetu bualu buebe, nenkutumbishe bantu bonsu bateleje.

¹³ Udi wamba kabidi ne: “Nentekemene kudi Mvidi Mukulu.” Kabidi ne: “Ke meme ewu ne bana bavua Mvidi Mukulu mumpeshe.”

¹⁴ Padi bana aba, mudiye ubabikila, ne mubidi ne mashi, Yezu mene uvua mudienze bu bobu, mudisange nabu mu buntu buabu. Uvua muenze nenku bua ku lufu luende, amone mua kubutula diabolu, uvua ne bumfumu bua kushipa bantu.

¹⁵ Uvua muenze nanku kabidi bua kupikula bonsu bayua bu bapika, matuku onsu avuabu panu, bualu batata batshina lufu.

¹⁶ Bualu kena mutate bua kuambuluisha batumibue ba Mvidi Mukulu, kadi udi mutate bua kuambuluisha ndelanganyi ya Abrahame.

¹⁷ Ke patataye ne bua kufuanangana ne bana babu ku malu onsu, bua kuikalaye mutuangaji wabu munene, udi ne luse lua bungi, kabidi udi Mvidi Mukulu wanyisha, bua amone mua kujimija mibi ya bantu.

¹⁸ Mpindiewu udi mua kuambuluisha bantu badibu bateta, bualu yeye mene batata bamuteta, kabidi uvua mumvue makenga.