Dielulula 9 - MUKANDA WA MYIDI MUKULU

Maweja-Nangila mmunange bena Izrayele patupu

¹ Nuenu bena Izrayele, telejayi. Lelu nenusabuke musulu wa Yardene. Nenuipate bisamba bionsu bidi binupita ku bukole ne ku bungi. Nenukuate bimenga biabu bidi ne bimana bitumbuke mulu.

² Nenutshimune bena Anake, bantu bale ba bukole, badi bantu bakuabu batshina, bamba ne: “Kakuena udi mua kukandamana kudi ndelanganyi ya Anake!

³ Lelu nenujadike ne: Maweja-Nangila Mvidi Mukulu wenu, udi wenda kumpala kuenu. Yeye udi bu kapia kadi kabutula bintu bionsu. Nanku Maweja-Nangila neabipate. Nenubatshimune lukasa, mubabutule bonsu, mbanyenge bintu biabu, bu muvua Maweja-Nangila mulaye.

⁴ Maweja-Nangila Mvidi Mukulu wenu mumane kuipata bantu aba, kumpala kuenu, kanuditambishi ne: “Maweja-Nangila mmutupe ditunga edi, bualu tudi bantu ba nsongu.” Kadi numanyene: Maweja-Nangila mmuipate bantu aba kumpala kuenu, bualu mbena buenzayi.

⁵ Nanku Maweja-Nangila kena unupa ditunga edi bua buakane buenu to. Neipate bantu aba, bualu mbena buenzayi. Udi musue kabidi kukumbaja bionsu bivuaye mulaye bankambua benu, Abrahame, Izake ne Yakobe.

⁶ Numanye ne: Maweja-Nangila Mvidi Mukulu wenu neanupe ditunga edi dimpe, kadi ki mbua buakane buenu to. Bualu nudi tshisamba tshia bantu badi bamutombokela!

Kana ka ngombe ka mpawungi

⁷ Nuvuluke ne: mu tshipela nuvua bafikishe Maweja-Nangila Mvidi Mukulu wenu munda. Kanupu bualu ebu muoyi diba nansha dimue! Katshia numuka mu Ejipitu too ne munudi bafike muaba ewu, nutshidi amu numutombokela.

⁸ Ku mukuna wa Sinayi nangananga, Maweja-Nangila uvua musue kunubutula bonsu, bualu nuvua bamufikishe munda bikole.

⁹ Meme Moshe mvua mubande ku mukuna bua kuangata mabue, avua ne mikenji ya ndondu wenu ne Maweja-Nangila. Meme kulalaku matuku makumi anayi a munya ne a butuku, tshiyi mua kudia nansha kunua.

¹⁰ Mvidi Mukulu Maweja-Nangila kumpesha mabue abidi, avuaye mufunde nkayende mikenji yonsu. Ke mikenji iwaye munumanyishe munkatshi mua kapia, panuvua kuinshi kua mukuna.

¹¹ Nanku matuku makumi anayi a munya ne butuku mamane kukumbana, Maweja-Nangila kumpesha mikenji ya ndondu,

¹² kungambilaye ne: “Tuluka lukasa. Bantu bauvua mupatule mu Ejipitu mbenze bualu bupite bubi. Kabena bitabe ku bionsu bimvua mubambile. Mbadienzele lupingu lua tshiamu tshiengulula.”

¹³ Maweja-Nangila kungambila kabidi ne: “Ndi mujadike ne: bantu aba mbantombokele.

¹⁴ Kunkandiki to. Ndekela, mbanyoke. Ndi musue kubabutula, kabayi mua kubatela kabidi pa buloba. Pashishe nenkuambuluishe bua ulele bana ba bungi, benze tshisamba tshinene, tshidi tshipita bena Izrayele ku bukole ne ku bungi!”

¹⁵ Meme kutuluka ku mukuna, uvua umueneka mukuate kapia. Mvua muambule ku bianza mabue avua ne mikenji ya ndondu.

¹⁶ Meme kujadika ne: nuvua batombokele Maweja-Nangila Mvidi Mukulu wenu bushiwa. Nuvua badienzele lupingu lua kana ka ngombe ka tshiamu. Kanuvua bitabe bionsu bivua Maweja-Nangila munuambile to.

¹⁷ Ke pamvua muimanshe mabue abidi amvua nawu ku bianza, muatshibule, nuenu batangile.

Moshe udi wakuila bantu

¹⁸ Pashishe meme kudiela panshi kumpala kua Maweja-Nangila. Meme kushala muaba awu matuku makuabu makumi anayi a munya ne butuku, tshiyi mua kudia nansha kunua. Mvua muenze bionsu abi, anu bua bubi bu-nuvua benze. Nuenu kuenza bidi Maweja-Nangila ubenga, kumufikisha munda.

¹⁹ Mvua ntshina, nzakela tshiji tshikole tshivua Maweja-Nangila natshi. Ukavua musue kunubutula. Kadi kuitabaye kabidi dilomba dianyi musangu ewu.

²⁰ Maweja-Nangila uvua mupite kufikila Arone munda, musue kumushipa. Kadi dituku adi, meme kumulombela ne yeye kabidi.

²¹ Meme kuangata lupingu lua kana ka ngombe ka tshiamu, lunuvua badienzele bua bubi buenu. Meme kulosha mu kapia. Bivua kabiyi bipie, meme kubizaza, kushalabi butu. Meme kuimansha butu abu mu musulu uvua upueka mu mukuna.

²² Nuenu bena Izrayele, nuvua bafikishe kabidi Maweja-Nangila munda ku Tabera, ku Masa ne ku Kibrote-Taawa,

²³ Kabidi ku Kadeshe-Barneya pavua Maweja-Nangila munutume bua kukuata ditunga divuaye munulaye, kanuvua batekemene kudiye to. Kanuvua bangate bionsu bivuaye munuambile ne mushinga.

²⁴ Katshia tumanyangana nenu, nudi amu nutombokela Maweja-Nangila.

²⁵ Pavua Maweja-Nangila musue kunubutula, meme kudiela panshi kumpala kuende, kushala nanku matuku makumi anayi a munya ne a butuku.

²⁶ Meme kulomba Maweja-Nangila ne: “Mvidi Mukulu Maweja-Nangila, kubutudi bantu badi bebe, baudi mupikule, mupatule mu Ejipitu ku bukole ne ku bumfumu buebe.

²⁷ Uvuluke bantu bebe: Abrahame, Izake ne Yakobe. Kuedi meji ku bubi bua bena Izrayele, padibu bakutombokela, babenga diyi diebe.

²⁸ Bualu bena Ejipitu badi mua kuamba ne: ‘Maweja-Nangila wapangi mua kufikisha bantu bende mu ditunga divuaye mubalaye. Kena mubanange. Uvua mubapatule mu Ejipitu anu bua bafuile mu tshipela!’

²⁹ Maweja-Nangila, bena Izrayele aba mbantu bebe, baudi mudisunguile, bauvua mupikule, mupatule mu Ejipitu ku bukole ne ku makanda ebe mapite.”