Dielulula 4 - MUKANDA WA MYIDI MUKULU

Nuitabe mikenji ya Mvidi Mukulu

¹ Moshe kuambila kabidi bena Izrayele ne: Nuenu bitabe meyi ne mikenji bindi munulongeshe, nenuikale ne muoyi. Kabidi nenukuate ditunga dia Kenaane, didibu banupesha kudi Maweja-Nangila Mvidi Mukulu wa bankambua benu.

² Kanusakididi bualu bukuabu ku mikenji ya Maweja-Nangila Mvidi Mukulu wenu, indi munulongeshe. Kanumushi bualu nansha bumue. Nuyikumbaje yonsu, bungi buayi.

³ Nuvua badimuene nkayenu, muvua Maweja-Nangila Mvidi Mukulu wenu, mubutule bantu, bavua batendelela mvidie Baale-Peyore.

⁴ Kadi nuenu bavua balamate Maweja-Nangila Mvidi Mukulu wenu, nutshidi bonsu ne muoyi too ne lelu.

⁵ Panuafika mu ditunga dia Kenaane dinukuata, nukumbaje meyi ne mikenji bimvua munulongeshe, bu muvua Maweja-Nangila Mvidi Mukulu wanyi mungambile.

⁶ Nuenu bakumbaje mikenji eyi bimpe, bantu ba bisamba bikuabu pamanyabu mikenji eyi, nebajadike ne: nuenu nudi bantu ba lungenyi ne meji. Nebakeme, bamba ne: “Bena tshisamba tshinene etshi badi ne bantu ba lungenyi ne meji.”

⁷ Bualu ku bisamba bionsu, nansha bidi ne bantu bapite bungi, kakuena tshisamba tshidi ne mvidie pabuipi natshi, bu mudi Maweja-Nangila Mvidi Mukulu wetu pabuipi netu, misangu yonsu itudi Kunubikila, tumulomba diambuluisha.

⁸ Ku bisamba bionsu, nansha bidi ne bantu bapite bungi, kakuena tshisamba tshidi ne mikenji mimpe, bu idi mu mukanda wa mikenji undi nnuleja lelu ewu.

Mvidi Mukulu udi uleja bena Izrayele malu

⁹ Nanku nuenu bena Izrayele, dimukayi. Nudi bamanye bionsu bidi Maweja-Nangila muenze. Kanuena mua kubipua muoyi musangu nansha umue to. Nubivuluke, nubilondele bana benu ne bikulu benu.

¹⁰ Vulukayi dituku dinuvua ku mukuna wa Sinayi, kumpala kua Maweja-Nangila Mvidi Mukulu wenu. Yeye uvua mungambile ne: “Sangisha bena Izrayele bonsu. Ndi musue kubamanyisha mikenji yanyi, bua bayilonde, bannemeke patshidibu ne muoyi. Nebayilongeshe kabidi ndelanganyi yabu.”

¹¹ Nuenu kusemena kuinshi kua mukuna. Ke kuvua ndimi ya kapia ilakuka, iya mulu, yenza mavuba a muinshi mufike.

¹² Nuenu kumvua diyi dia Maweja-Nangila, wakula nenu munkatshi mua kapia, kadi kanuyi numumona to.

¹³ Kunumanyishaye ndondu wenu nende. Uvua munuambile bua nunemeke ndondu, nukumbaje mikenji dikumi ivuaye mufunde pa mabue abidi.

¹⁴ Musangu awu, Maweja-Nangila kungambila, bua meme kunulongesha meyi ne mikenji yonsu bua nuenu kubikumbaja, panuakuata ditunga dia Kenaane.

Kanutendeledi mvidie

¹⁵ Kadi, nutambe kuvuluka bualu ebu: Dituku divua Maweja-Nangila wakula nenu ku mukuna wa Sinayi, munkatshi mua kapia, kanuvua bamumone to.

¹⁶ Nanku kanuenji bibi to. Kanusongi mpingu, kanuzodi bimfuanyi bileja mvidie, nansha bayileja bu bantu balume nansha bakaji,

¹⁷ bu nyama, nyunyi,

¹⁸ bilandadi, nansha minyinyi ya mu mayi.

¹⁹ Kanutangidi mulu bua kutendelela diba, ngondu, mitotu, nansha bintu bionsu bidi mu tshibuashibuashi. Kanubienzedi mudimu, kanubikukuidi. Maweja-Nangila mmuitabe anu bua bisamba bikuabu bitendelele bintu abi.

²⁰ Kadi nuenu bena Izrayele, Maweja-Nangila mmunukebe, munupatule kabidi mu Ejipitu, munuvua munkatshi mua dikenga dikole, bua nuikale tshisamba tshiende yeye, bu munudi lelu.

²¹ Kadi Maweja-Nangila mmumfikile meme Moshe munda bualu buenu, muditshipe wamba ne: “Kuena mua kusabuka musulu wa Yardene, kufika mu ditunga edi dimpe, dindi mupeshe bena Izrayele to.”

²² Nanku meme nemfuile mu ditunga ditudi edi. Tshiakusabuka musulu wa Yardene to. Anu nuenu nenusabuke musulu ewu, bua kukuata ditunga dimpe, didi dishiya dia musulu ewu.

²³ Nudimuke, kanupu ndondu muoyi, uvua Maweja-Nangila Mvidi Mukulu wenu mutue nenu. Kanusongi mpingu. Kanuenji tshimfuanyi tshia tshintu nansha tshimue tshidiye munukandike.

²⁴ Bualu Maweja-Nangila Mvidi Mukulu wenu udi wosha, ubutula bu kapia. Yeye nkayende mmusue kuikala Mvidi Mukulu wenu.

²⁵ Nuenu bamane kushala matuku a bungi mu ditunga edi, didi Maweja-Nangila munulaye, nuenu bamane kulela bana, bapete ne bikulu, kanuenji bibi to. Kanusongi mpingu, kanuzodi bimfuanyi, bia tshintu nansha tshimue. Kanuenji malu mabi makuabu, adi Maweja-Nangila Mvidi Mukulu wenu ubenga, amufikisha munda.

²⁶ Ndi nnujadikila lelu, diulu ne buloba biumvue, ne: Nuenu basonge mpingu, nebanuipate lukasa mu ditunga dia Kenaane dinuakuata, didi dishiya dia musulu wa Yardene. Nenubutukemu.

²⁷ Maweja-Nangila neanutangalaje munkatshi mua bisamba bikuabu. Kadi mu matunga ikalaye munutume awu, nenuikale anu bakese.

²⁸ Mu matunga awu, nenuikale nutendelela mvidie ya mabue, nansha ya mitshi misonga kudi bantu, idi kayiyi imona, kayiyi yumvua, kayiyi idia, nansha inunkila.

²⁹ Diba adi, mu matunga aa, nenukebe Maweja-Nangila Mvidi Mukulu wenu. Kadi bua nuenu kumupeta, anu nuenu bamukebe ne muoyi mujima ne bukole buenu buonsu.

³⁰ Pikala malu onsu andi mmuambile manuenzekele, nuenu babuele mu dikenga, nenupingane kudi Maweja-Nangila Mvidi Mukulu wenu, bua kumutumikila.

³¹ Nanku bumudi Maweja-Nangila Mvidi Mukulu wenu ununanga, kakunulekela, kakunubutula to. Neavuluke ndondu uvuaye mutue ne bankambua benu.

Bena Izrayele mbena diakalenga

³² Mpindiewu nudikonke bua malu onsu avua menzeke kale, kabayi banji kunulela, katshia Mvidi Mukulu wafuka bantu pa buloba. Nuele meji ku bionsu bivua bienzeka pa buloba bujima. Malu makole a mushindu ewu akavua menzeke anyi? Bantu bakavua bumvua lumu lua malu a nunku anyi?

³³ Ku bisamba bikuabu bionsu, kudi tshisamba tshidi ne mvidie, wakula natshi munkatshi mua kapia, bu mudi Maweja-Nangila wakula nenu, nuenu kushala ne muoyi anyi?

³⁴ Kudi mvidie ukadi mupatule tshisamba tshia bantu bende mu bupika, muleje bumfumu buende, ne bukole buende, bu munuvua nuenu badimuene anyi? Kudi mvidie uvua mukengeshe bantu, mutshimune mvita, muenze bishima ne malu a kukema, muenze kabidi ne malu adi akuatshisha bantu bowa, bu muvua Maweja-Nangila Mvidi Mukulu wenu munuenzele mu Ejipitu anyi?

³⁵ Nuenu nudi bena diakalenga, bualu nuakumona bionsu ebi, bua nujadike ne: Maweja-Nangila nkayende ke Mvidi Mukulu, kakuena mvidie mukuabu, amu Yeye.

³⁶ Nuenu nuakumvua diyi diende mu diulu, unulongesha bua kumutumikila. Pa buloba, wakanuleja tshimunyi tshia kapia, wakula nenu mu kapia aku.

³⁷ Maweja-Nangila uvua wenza bionsu ebi, bualu uvua unanga bankambua benu. Kabidi uvua munusungule nuenu ndelanganyi yabu. Kunupatulaye mu Ejipitu ku bukole buende.

³⁸ Mpindiewu, Maweja-Nangila neanutshimuine bisamba bionsu binudi nabi mutumba, bidi binupita ku bukole ne ku bungi. Yeye neanufikishe mu ditunga adi bua dishale bumpianyi buenu.

³⁹ Kutuadijila lelu, nuele meji, nujadike ne: Maweja-Nangila udi anu Mvidi Mukulu nkayende mu diulu ne pa buloba. Kakuena mvidie mukuabu to, amu yeye.

⁴⁰ Nuenu ne ndelanganyi yenu, nukumbaje meyi ne mikenji bia Maweja-Nangila Mvidi Mukulu wenu, bindi munumanyishe lelu. Nanku nenuikale bena diakalenga. Nenushale ne muoyi matuku mavule mu ditunga didiye munupe kashidi.

Bimenga bisatu bia kunyemena

⁴¹ Diba adi, Moshe kusungula bimenga bisatu luseke ludi diba dipatukila lua musulu wa Yardene.

⁴² Nanku muntu yonsu udi ushipa muntu mukuabu mu mpukapuka, kayi nende ne muoyi mubi, neanyemene mu tshimenga tshimue tshia ku bimenga ebi bua kudipandisha.

⁴³ Ke mena a bimenga ebi: Beshere mu mpata ya mu tshipela bua bena Rubene; Ramote mu ditunga dia Ngilaade bua bena Ngade; Ngolane mu ditunga dia Bashane bua bena Menashe.

DIYUKI DIBIDI DIA MOSHE

⁴⁴ Moshe kuambila bena Izrayele mikenji ya Mvidi Mukulu.

⁴⁵ Kumanyishaye bena Izrayele, bamane kumuka mu Ejipitu, bionsu bivua Maweja-Nangila musue: meyi ne mikandu, kabidi ne mikenji.

⁴⁶ Bakalua bafika luseke ludi diba dipatukila lua musulu wa Yardene, mu tshibandabanda tshidi tshitangilangana ne tshimenga tshia Bete-Peyore, mu ditunga dia mukalenga Sihone wa bena Amore, wa mu Eshebone, uvuabu batshimune kudi Moshe ne bena Izrayele.

⁴⁷ Bena Izrayele bavua bakuate ditunga dia mukalenga awu, bakuate kabidi ditunga dia mukalenga Oge wa mu Bashane. (Bakalenga aba babidi ba bena Amore, ke bavua ne bumfumu luseke ludi diba dipatukila lua musulu wa Yardene.)

⁴⁸ Ke bena Izrayele kuya kuasa ku ditunga dijima adi, kutuadijila ku tshimenga tshia Aroyere, tshidi ku muelelu wa musulu wa Amone, too ne ku mukuna wa Ermone, udibu babikila kabidi ne: Siyone,

⁴⁹ ditunga dijima dia luseke ludi diba dipatukila lua musulu wa Yardene, too ne ku Mayi manene a luepu, kuinshi kua mukuna wa Pisga.