Dielulula 31 - MUKANDA WA MYIDI MUKULU

LUFU LUA MOSHE Yoshuwa udi upingana Moshe

¹ Moshe kuambila kabidi bena Izrayele bonsu ne:

² — Mpindiewu mbakumbaji bidimu lukama ne makumi abidi. Tshiena ne bukole bua kunulombola kabidi to. Maweja-Nangila mmumane kungambila ne: tshiakufika dishiya dia Yardene to.

³ Maweja-Nangila Mvidi Mukulu wenu nkayende, neende kumpala kuenu. Neabutule bonsu badi base dishiya dia Yardene, bua nukuate ditunga adi. Yoshuwa neikale mfumuenu, bu muvua Maweja-Nangila mumane kuamba.

⁴ Maweja-Nangila neabutule bena ditunga adi, bu muvuaye mubutule Sihone ne Oge, bakalenga ba bena Amore, ne matunga abu.

⁵ Neafile bena ditunga adi mu bianza bienu. Nenubenzele bionsu bindi mumane kunuambila.

⁶ Koleshayi muoyi, kankamanayi, kanutshinyi bena ditunga adi to. Bualu Maweja-Nangila Mvidi Mukulu wenu udi munkatshi muenu. Kakunulekela to.

⁷ Pashishe Moshe kubikila Yoshuwa, kumuambila, bena Izrayele bonsu bateleja, ne: — Kankamana! Kolesha muoyi. Wewe neufikishe bena Izrayele bonsu mu ditunga divua Maweja-Nangila mulaye bankambua babu. Wewe neubabanyine miaba ya kuasa.

⁸ Maweja-Nangila neende kumpala kuebe, neikale nebe, kayi ukulekela. Nanku kutshinyi, kuzakadi to, kutekeshi mu maboku.

Nubadile bena Izrayele mikenji

⁹ Moshe kufunda mikenji ya Mvidi Mukulu, kuyipesha batuangaji, ndelanganyi ya bena Levi, bavua ne mudimu wa kuambula mushete uvua ne mikenji ya ndondu. Kuyipeshaye kabidi bakulu ba bena Izrayele.

¹⁰ Moshe kubambila ne: — Padi bidimu muanda mutekete bikumbane, nuafiki ku tshikondu tshia kulekelangana mabanza, ne tshia kuenza tshibilu tshia tuzubu tua Bisasa.

¹¹ Nusangishe bena Izrayele bonsu muaba umue, balume, bakaji, bana, ne bantu benyi badi munkatshi muenu. Nubabadile mikenji eyi kumpala kua Mvidi Mukulu Maweja-Nangila, muaba wikalaye musungule.

¹² Padibu bababadile mikenji nanku, bantu nebanemeke Maweja-Nangila Mvidi Mukulu. Nebakumbaje mikenji yende.

¹³ Nanku bana bonsu badi kabayi banji kumanya mikenji eyi, nebayumvue, nebamanye mua kunemeka Maweja-Nangila, matuku onsu anuikala dishiya dia Yardene, mu ditunga dinuakuata.

Nebatombokele Maweja-Nangila

¹⁴ Maweja-Nangila kuambila Moshe ne: — Ukadi pa kufua. Bikila Yoshuwa. Nufike nende kumpala kua ntenta wa kusambakena, bua mmumanyishe mikenji yanyi. Moshe ne Yoshuwa kuya ku ntenta wa kusambakena.

¹⁵ Maweja-Nangila kubamuenekela mu divuba dia muinshi, divua mu mushiku wa ntenta wa kusambakena.

¹⁶ Maweja-Nangila kudianjila kumanyisha Moshe ne: — Ukadi pa kufua. Kunyima kua lufu luebe bena Izrayele nebatendelele mvidie idibu batendelela kudi bantu benyi badi mu ditunga dinuabuela. Bena Izrayele nebambenge. Nebanyangakaje ndondu umvua mutue nabu.

¹⁷ Nanku nembafikile munda, mbalekela, bua babakengeshe bikole kudi bisamba bikuabu. Nebajadike mudi makenga aa abenzekela, bualu meme Mvidi Mukulu tshiena kabidi munkatshi muabu.

¹⁸ Dituku adi, nembalekele bulelela, bualu mbenze malu mabi, batendelela mvidie.

¹⁹ Mpindiewu wewe Moshe, ndi nkulongesha musambu, uufunde, ulongeshe bena Izrayele, baumanye, bua padibu bawimba, bajadike ne: meme Maweja-Nangila Mvidi Mukulu wabu ndi munkatshi muabu. Malu adi mu musambu awu neanusonguele.

²⁰ Nanku meme nemfikishe bena Izrayele mu ditunga didi ne biakudia bia bungi, dimvua mulaye bankambua babu, bua badie batshionkomoka. Nebikalemu ne disanka. Kadi nebampeje, nebatendelele mvidie ya bantu benyi. Nebanyangakaje ndondu umvua mutue nabu.

²¹ Bena Izrayele nebapete ntatu ne makenga makole. Kadi meyi a musambu ewu neanusonguele. Bualu ndelanganyi yonsu ya bena Izrayele neikale imba anu musambu ewu. Meme ndi mumanye meji adi bena Izrayele nawu mpindiewu, tshiyi muanji kubafikisha mu ditunga dimvua mubalaye.

²² Dituku adi Moshe kufunda musambu uvua Mvidi Mukulu mumuambile, bua kulongeshaye bena Izrayele.

²³ Pashishe Maweja-Nangila kukolesha Yoshuwa, muana wa Nune, ku muoyi, umuambila ne: “Kutshinyi, kuzakadi. Wewe neufikishe bena Izrayele mu ditunga dia Kenaane dimvua mubalaye. Meme nengikale nebe.”

²⁴ Moshe kufunda mikenji ya Maweja-Nangila yonsu mu mukanda. Ujikija kufunda,

²⁵ kuambilaye bena Levi bavua ne mudimu wa kuambula mushete wa Maweja-Nangila ne:

²⁶ — Angatayi mukanda ewu wa mikenji ya Maweja-Nangila, nuuteke pabuipi ne mushete wa ndondu. Mukanda ewu, newikale ujadikila bena Izrayele ne: nansha bobu babenge Maweja-Nangila Mvidi Mukulu wabu, kadi yeye udi anu munkatshi muabu.

²⁷ Meme Moshe ndi mumanye ne: bena Izrayele badi ne tshitunu, badi bonsu bantomboji. Mpindiewu pantshidi ne muoyi munkatshi muabu, bakabenga Maweja-Nangila. Kadi pambafua, nebamubenge bikole.

²⁸ Mpindiewu wewe Yoshuwa, bikila bakulu ba ditunga ne balombodi ba bisamba bienu. Basemene pabuipi nanyi, bua meme Moshe nebalongeshe musambu ewu ne diyi dikole kumpala kua diulu ne buloba, bua kujadika ne: nansha bobu babenge Maweja-Nangila Mvidi Mukulu wabu, kadi yeye udi munkatshi muabu.

²⁹ Ndi mumanye ne: pambafua, bena Izrayele nebenze bibi, nebabenge bionsu bimvua mubambile. Nanku nebikale bena diakabi, bualu bavua benza muabu muonsu bua kutombokela Maweja-Nangila, kumufikisha munda.

Musambu wa Moshe

³⁰ Pashishe Moshe, kulongesha bena Izrayele bonsu musambu ewu ne: