Dielulula 3 - MUKANDA WA MYIDI MUKULU

Bena Izrayele badi batshimuna mukalenga Oge

¹ Pashishe tuetu kubenda bua kupitshila mu ditunga dia Bashane. Kadi Oge, mukalenga wa Bashane, ne tshiluilu tshiende tshionsu, kutubunda pabuipi ne tshimenga tshia Edreyi.

² Ke Maweja-Nangila kungambila meme Moshe ne: “Kutshinyi mukalenga uvuavua awu to! Nkadi mumane kumufila mu bianza biebe, yeye ne bantu bende bonsu, kabidi ne ditunga diende dijima. Neumuenze muuvua muenze Sihone, mukalenga wa bena Amore, uvua muase mu Eshebone.”

³ Nanku Maweja-Nangila, Mvidi Mukulu wetu, kutuambuluisha. Tuetu kutshimuna mukalenga Oge, ne bantu bende bonsu. Tuetu kubashipa, katuyi bashiye muntu nansha umue ne muoyi.

⁴ Pashishe tuetu kukuata bimenga biende bionsu. Tshimenga nansha tshimue katshivua ne bukole bua kutuluisha. Bimenga abi, bivua makumi asambombu, bivua mu buloba bua Argobe, mu ditunga dia Bashane, muaba uvua mukalenga Oge ne bumfumu.

⁵ Bimenga abi bavua babikolesha ne bimana, babiela mu mpangu mikanga ne bibi bia biamu. Kadi kuvua misoku mikuabu mivule kayiyi miela mpangu to.

⁶ Tuetu kubutula misoku eyi ne bantu bonsu ba wamu, balume, bakaji ne bana, anu bu mutuvua benze mu ditunga dia Sihone, mukalenga wa Eshebone.

⁷ Kadi tuetu kupawula bimuna ne bintu bionsu bituvua basangane mu bimenga abi.

Bena Izrayele badi babanyangana ditunga dia Ngilaade

⁸ Ke mutuvua bakuate tshikondu atshi matunga a bakalenga babidi ba bena Amore, bavua base luseke ludi diba dipatukila lua musulu wa Yardene, pankatshi pa musulu wa Amone wa muenji mukole, ne mukuna wa Ermone.

⁹ (Mukuna ewu wa Ermone, bena Sidone badi baubikila ne: Sifiyone. Kadi bena Amore badi baubikila ne: Senire.)

¹⁰ Ke mutuvua bakuate bimenga bionsu bivua pa mikuna, buloba bua Ngilaade ne bua Bashane, too ne ku Salka ne Edreyi, bimenga bia mu bukalenga bua Oge, mu ditunga dia Bashane.

¹¹ (Ku ndelanganyi ya bena Refayime bonsu, Oge, mukalenga wa Bashane, ke wa ndekelu udi mushale ne muoyi. Lukita luende bavua baluenze mu dibue. Batshidi mua kulumona mu Raba, tshimenga tshinene tshia bena Amone. Ludi ne bule bua metre anayi ne tshitupa, butshiama bua metre abidi.)

¹² Ke mutuvua bakuate ditunga didi ku mutu kua tshimenga tshia Aroyere, tshidi pabuipi ne musulu wa Amone. Meme Moshe, mvua mupeshe ndelanganyi ya Rubene ne ya Ngade tshitupa tshia ditunga dia mikuna dia Ngilaade, ne bimenga bionsu bivuamu.

¹³ Tshitupa tshia tshisamba tshia Menashe, tshidi tshisomba luseke ludi diba dipatukila lua Yardene, ndi mutshipeshe tshitupa tshivua tshishale tshia buloba bua Ngilaade, ne ditunga dijima dia Bashane, mmumue ne: muaba uvuabu kudi mukalenga Oge kale. (Buloba bua Argobe, ne bua Bashane, badi babubikila kabidi ne: ditunga dia Refayime.

¹⁴ Ndelanganyi ya Yayire, muana wa Menashe, ivua mikuate ditunga dia Argobe, divua mu Bashane, too ne ku mikalu ya bena Ngeshure ne bena Maaka. Misoku ya ditunga adi batshidi bayibikila ne: mmisoku ya Yayire.)

¹⁵ Ndelanganyi ya Makire, muana wa Menashe, ndi muyipeshe ditunga dia Ngilaade.

¹⁶ Kadi ndelanganyi ya Rubene ne ya Ngade, ndi muyipeshe ditunga dia pankatshi pa ditunga dia Ngilaade ne musulu wa Amone. Musulu wa Amone ke mukalu wa kuinshi wa ditunga adi. Musulu wa Yaboke udi wenza mukalu wadi ne ditunga dia bena Amone.

¹⁷ Mikalu idi luseke ludi diba dibuelela, idi ilonda tshibandabanda tshia Yardene, biangatshile ku dijiba dia Ngenesarete too ne ku Mayi manene a luepu, too ne ku mukuna wa Pisga, luseke ludi diba dipatukila.

¹⁸ Diba adi, mvua muambile bisamba bionsu ne: “Maweja-Nangila Mvidi Mukulu wenu mmumane kunupesha ditunga edi. Nanku bonsu banudi nabu, bambule bia mvita, bapite kumpala kua bana benu bena Izrayele bakuabu, bua kusabuka musulu wa Yardene.

¹⁹ Ndi mumanye ne: nudi ne bakaji ne bana, kabidi ne bimuna bipite bungi. Bionsu ebi bishale anu mu bimenga ebi bindi mumane kunupesha.

²⁰ Nanku nuambuluishe bena Izrayele bakuabu, too ne pikala Maweja-Nangila mubafikishe mu ditunga didiye ubapesha didi dishiya, luseke ludi diba dibuelela lua musulu wa Yardene, bua kupetabu dikisha bu munudi bapete nuenu. Pashishe muntu yonsu wa kunudi neapingane kuende mu ditunga dindi mumupeshe.”

²¹ Meme kuambila Yoshuwa ne: “Wewe nkayebe uvua mudimuene muvua Maweja-Nangila Mvidi Mukulu wenu mutshimune bakalenga babidi ba bena Amore. Ke muatshimunaye kabidi bakalenga bonsu banudi nusangana dishiya dia musulu wa Yardene.

²² Nanku, kanubatshinyi to, bualu Maweja-Nangila Mvidi Mukulu wenu neanuluile mvita ayi.”

Moshe kakubuela mu ditunga dia Kenaane to

²³ Pashishe mvua musengelele Maweja-Nangila ne:

²⁴ “Maweja-Nangila Mvidi Mukulu wanyi, udi mudianjile kundeja butumbi ne bukole buebe. Kakuena mvidie, pa buloba nansha mu diulu, udi ne bukole bua kuenza malu a dikema, bu muudi wenza wewe.

²⁵ Anyisha, nsabuke musulu wa Yardene, bua meme kumonaku ditunga dimpe dialabale dia mikuna, didi dishiya dia musulu, kabidi ne mikuna ya Lebanone.”

²⁶ Kadi Maweja-Nangila kena muitabe dilomba dianyi to. Uvua mumfikile munda bikole bualu buenu, unkandika ne: “Kuajiki! Kundombi bualu ebu kabidi to!

²⁷ Banda ku lusongu lua mukuna wa Pisga, ukenzakane nseke yonsu: ku mutu kua ditunga, kuinshi kuadi, luseke ludi diba dipatukila, ne ludidi dibuelela. Kadi ujadike, umanye ne: kuena usabuka musulu wa Yardene to.

²⁸ Ulongeshe Yoshuwa malu onsu. Umukoleshe ku muoyi, ashindike muoyi wa munda. Bualu yeye nealombole bena Izrayele, bua kusabukabu musulu wa Yardene, too ne muafikabu mu ditunga diudi umona edi.”

²⁹ Nanku tuetu kushala mu tshibandabanda etshi, batangilangane ne tshimenga tshia Bete-Peyore.