Dielulula 29 - MUKANDA WA MYIDI MUKULU

Bidi Mvidi Mukulu muenzele bena Izrayele

¹ Moshe kubikila bena Izrayele bonsu, kubambila ne: — Panuvua mu Ejipitu, nuvua badimuene muvua Maweja-Nangila mukengeshe mukalenga wa bena Ejipitu, balombodi ba mu bukalenga buende, ne bantu bonsu.

² Nuvua badimuene bipupu bikole bivuaye mubakengeshe nabi, ne bishima bia dikema bivuaye muenze.

³ Kadi too ne mpindiewu, Maweja-Nangila kena muanji kunupesha lungenyi lua kujingulula bionsu bivua bienzeka ebi to. Bualu mesu enu kaena manji kumona mene, matshi enu kaena manji kumvua.

⁴ Maweja-Nangila uvua munulombole mu tshipela bidimu makumi anayi, bilamba bienu, nansha bisabata bienu, kabiyi bisunsuke to.

⁵ Kabidi kanuvua nukengela mampa a kudia, nansha maluvu a kunua. Maweja-Nangila kunupesha bionsu, mbua nuenu kujadika ne: Maweja-Nangila udi Mvidi Mukulu wenu.

⁶ Patuafiki muaba ewu, Sihone, mukalenga wa tshimenga tshia Eshebone, ne Oge, mukalenga wa ditunga dia Bashane, kutubundabu. Kadi tuetu kubatshimuna,

⁷ kubanyenga matunga abu. Tuetu kuabanyina bena Rubene, bena Ngade, ne tshitupa tshia tshisamba tshia Menashe.

⁸ Nanku nuvuluke ndondu wenu ne Maweja-Nangila, nukumbaje bidi ndondu awu unulomba, bua nuikale bena diakalenga mu bionsu binudi nuenza.

Nunemeke ndondu wenu ne Mvidi Mukulu

⁹ Nuenu bena Izrayele, lelu nudi bimane bonsu kumpala kua Maweja-Nangila Mvidi Mukulu wenu, pamue ne bamfumu ba midimu mishilangane, bakulu ba ditunga,

¹⁰ bana benu, bakaji benu, ne benyi badi basombe munkatshi muenu mu mitanda, badi bamunguila nkunyi, banusunyina mayi.

¹¹ Maweja-Nangila Mvidi Mukulu wenu, udi utua nenu ndondu ewu mpindiewu. Udi unulomba bua nuditshipe ne: netukumbaje ndondu ewu.

¹² Nanku nuenu bena Izrayele, nenuikale tshisamba tshia Maweja-Nangila Mvidi Mukulu wenu. Yeye neikale Mvidi Mukulu wenu, bu muvuaye mumane kunulaya, muditshipe kabidi kudi bankambua benu, Abrahame, Izake ne Yakobe.

¹³ Ndondu unudi batue ne Mvidi Mukulu, ke undi nnuambila bua nuitabe patoke ne: netukumbaje. Ndondu ewu, kena anu buenu nuenu, badi bimane muaba ewu lelu kumpala kua Maweja-Nangila to.

¹⁴ Kadi udi bua bantu bonsu, ne bua badi muaba ewu lelu, ne bua ndelanganyi yenu yonsu, nansha bua badibu kabayi banji kulela.

¹⁵ Nudi bamanye mushindu utuvua mu Ejipitu, ne mushindu utuvua bapitshile mu matunga a bisamba bionsu bivua mu njila.

¹⁶ Nuenu kunudimuena bintu bibi bia tshianana bivua bantu batendelela: mpingu ya mvidie ya mabue, ya mitshi misonga, ya tshiamu tshia mpawungi, nansha ya tshiamu tshitoke tshia mushinga mukole.

¹⁷ Nanku muntu nansha umue wa kunudi, ne mulume ne mukaji, tshisamba nansha tshimue, diku nansha dimue, kanuena mua kubenga Maweja-Nangila Mvidi Mukulu wetu bua kutendelela mvidie ya bisamba ebi to. Bualu muntu udi wenza nanku, udi bu mutshi wa lulengu munkatshi mua bantu.

¹⁸ Muntu yonsu wa kunudi udi ubenga bindi nnuambila ebi, wela meji ne: “Nansha meme muenze malu mabi, kakuena tshidi mua kungenze-kela,” wambila kabidi bantu bakuabu bua kutendelela mvidie,

¹⁹ muntu awu, Maweja-Nangila kakumufuila luse to. Kakuanyisha nansha kakese muntu udi umutombokela. Neamufuile munda bikole. Neamunyoke ne manyoka onsu mashilangane, adibu bafunde mu mukanda ewu. Kabakuvuluka nansha dina diende kabidi pa buloba to.

²⁰ Maweja-Nangila neamupeteshe diakabi, amumushe munkatshi mua bena Izrayele, bilondeshile manyoka adibu bafunde mu mukanda wa mikenji ya ndondu ewu.

Maweja-Nangila neanyoke bena Izrayele

²¹ Ndelanganyi yenu, ne bantu benyi badi munkatshi muenu bafume ku matunga a kule, pamonabu mushindu udi Maweja-Nangila munukengeshe ne bipupu, nebambe ne:

²² “Ditunga dijima edi ndimane kunyanguka ku kapia, kabidi ne luepu. Kakuena mushindu wa kumiaminamu nansha wa kukunamu biakudia. Nansha bisosa mene kabiena bitolokamu. Bualu ditunga edi ndifuanangane ne bimenga bia Sodome ne Ngomore, Adma ne Seboyime, bivua Maweja-Nangila mubutule pawaye ne tshiji tshikole.”

²³ Nanku, bantu ba bisamba bikuabu bionsu, pamonabu bualu ebu, nebakeme, bebejangana ne: “Maweja-Nangila uvua ne tshiji tshikole nanku bua tshinyi? Uvua mukengeshe bena ditunga edi mushindu ewu bualu kaayi?”

²⁴ Pashishe nebandamune ne: “Dikenga edi ndibakuate bualu bena ditunga edi kabena bakumbaje ndondu uvua Maweja-Nangila Mvidi Mukulu wa bankambua babu, mutue nabu pawaye mubapatule mu Ejipitu.

²⁵ Bena ditunga bavua batendelela mvidie ya bisamba bikuabu bivuabu kabayi bamanye, ivua Maweja-Nangila mubakandike, bua kabayenzedi mudimu.

²⁶ Ke padi Maweja-Nangila mufike munda bikole, mubanyoke ne manyoka mashilangane, adibu bafunde mu mukanda ewu.

²⁷ Ke padiye mubipate ne tshiji mu ditunga diabu, mubatume mu ditunga dia bende, didibu basombe too ne mpindiewu.”

²⁸ Maweja-Nangila Mvidi Mukulu wetu nkayende mmumanye malu masokome. Kadi tuetu ne ndelanganyi yetu, tudi bamanye anu malu adi Maweja-Nangila mutumanyishe bua kashidi, mmomumue ne: tudi bamanye mikenji yende itudi ne bua kukumbaja tshiendelele.