Dielulula 23 - MUKANDA WA MYIDI MUKULU

¹ Muntu kena mua kubuelela mukaji kampande wa tatuende mu nzubu to. Udi ufuisha tatuende bundu.

Badi kabayi mua kutendelela

² Muntu mulume mubozeke mipese, nansha mukoseke mubidi wa bantu balume, kena mua kubuela muaba udi bantu ba Maweja-Nangila basangile.

³ Muana yonsu mulela kudi mukaji udibu kabayi mua kulela nende, kena mua kubuela muaba udi bantu ba Maweja-Nangila basangile, too ne ku ndelanganyi yende ya musangu wa dikumi.

⁴ Bena Amone ne bena Mowabe kabena mua kubuela muaba udi bantu ba Maweja-Nangila basangile, nansha ndelanganyi yabu ya musangu wa dikumi.

⁵ Bualu panupatukila mu Ejipitu, bantu aba bavua banupale biakudia ne mayi a kunua mu luendu luenu. Kabidi bavua bafuta Balaame bua kunutshipaye. Balaame ewu, ke muana wa Beyore, uvua mu musoku wa Petore, mu Mezopotamiya.

⁶ Kadi Maweja-Nangila Mvidi Mukulu wenu kavua musue kuteleja Balaame nansha. Nanku bu mudiye mununange, mitshipu ya Balaame kuandamukayi diakalenga dienu kashidi tshiendelele.

⁷ Nanku kanuena mua kumvuangana ne bena Amone ne bena Mowabe kashidi tshiendelele. Kanuena mua kubakebela diakalenga too ne kashidi.

⁸ Kanupepeji bena Edome, bualu mbana benu. Kanupepeji kabidi bena Ejipitu, bualu nuvua basombe mu ditunga diabu.

⁹ Ndelanganyi ya bena Edome ne ya bena Ejipitu, biangatshile ku ya musangu muisatu, idi misombe mu ditunga dienu, ke idi mua kubuela muaba udi bantu ba Maweja-Nangila basangile.

Mu mitanda kamuikadi mikiya

¹⁰ Panuikala mu mitanda, nuluangana ne baluishi benu, nuepele bionsu bidi mua kunukebela mikiya.

¹¹ Tshilejilu, pikala muena mvita wa munkatshi muenu mutatakane butuku, muele biana panshi, neapatuke mu mitanda dituku dijima.

¹² Pashishe owe mayi, apingane mu mitanda anu dilolu, pakadi diba dibuela.

¹³ Nulongolole muaba wa kusesukila mutantshi mule ne mitanda yenu.

¹⁴ Muena mvita yonsu ikale ne tshikasu, bua padiye usesuka, ambule buloba, ajibikile bunyawu.

¹⁵ Muaba udi mitanda yenu wikale wa tshijila. Bualu Maweja-Nangila Mvidi Mukulu wenu udi wendakanamu, bua kunulama, kunuambuluisha bua nutshimune baluishi benu. Nanku, Yeye musangane tshintu tshibi munkatshi muenu neanushiye nkayenu.

Mupika munyeme

¹⁶ Pikala mupika munyeme mfumuende, musokome mu ditunga dienu, kanumupingaji kua mfumuende to.

¹⁷ Adisunguile muaba udiye musue munkatshi muenu. Asombe mu tshimenga tshidiye ujinga. Kanumutatshishi to.

Buendenda mu nzubu ya kutendelela

¹⁸ Muena Izrayele yonsu, mulume nansha mukaji, kena mua kuenda tshiendenda mu nzubu ya mvidie ya bena ditunga.

¹⁹ Balume ne bakaji badi benda buendenda bua nanku, kabena mua kulambula Maweja-Nangila Mvidi Mukulu wenu bintu bia mapiku bipeta ku buendenda bua nanku. Bualu Maweja-Nangila kena wanyisha malu adi bantu aba benza.

Kusombeshangana bua kupeta bia kasombela

²⁰ Nuenu basombeshe muanenu makuta, biakudia nansha tshintu tshikuabu, kanuena mua kumulomba tshia kasombela to.

²¹ Kadi nudi mua kulomba bintu bia kasombela, anu kudi muenyi udi munkatshi muenu. Kanulombi kudi muanenu. Nukumbaje mikenji eyi mu ditunga dinuakuata, bua Maweja-Nangila Mvidi Mukulu wenu anuele lupemba mu bionsu binudi nuenza.

Malaya

²² Nuenu balaye Maweja-Nangila Mvidi Mukulu wenu tshintu tshia mapiku, numulambule tshintu atshi lukasa. Bualu yeye munulombetshi ku bukole, nenuikale bena tshibawu.

²³ Nuenu kanuyi balaye Maweja-Nangila tshintu tshia mapiku, kakuena bualu to.

²⁴ Kadi nuenu bamane kumulaya tshintu, mmulambule amu tshintu tshinuvua bamulaye atshi ku budisuile buenu.

Munudi mua kupola bimuma

²⁵ Nuenu bapitshile mu budimi bua bende budi ne mitshi ya mvinyo, nudi mua kudia tumuma bu munudi basue. Kadi kanuena mua kutupola bua kuela mu tshisaka, kuya natu pambelu to.

²⁶ Nuenu bapitshile mu budimi bua bende budi ne ntete ya kuenza bukula, nudi mua kuangata biakudia bikese. Kadi kanukoshi miepu ne muele to.