Dielulula 20 - MUKANDA WA MYIDI MUKULU

Mushindu wa kuluangana mvita

¹ Nuenu baye kuluangana mvita ne bantu badi ne tubalu, kabidi ne matempu a mvita, nansha ne baluishi bapite bena mvita benu ku bungi, kanubatshinyi to. Bualu Maweja-Nangila Mvidi Mukulu wenu, uvua munupatule mu Ejipitu, udi munkathi muenu.

² Panudi nudilongolola bua kuluangana, mutuangaji imane kumpala kua bena mvita ba bena Izrayele, ele lusanzu ne:

³ “Nuenu bena mvita ba bena Izrayele, numanye ne: lelu nudi nuluangana ne bena lukuna benu. Panuafika muaba udibu, nukoleshe muoyi. Kanubatshinyi, kanupampakanyi, kanuzakadi to.

⁴ Maweja-Nangila Mvidi Mukulu wenu udi nenu. Neanuluile mvita ayi, bua nuenu kubatshimuna!”

⁵ Pashishe balombodi ba bena mvita, nebambile bena mvita ne: “Pikala muntu wa munkatshi muenu muase nzubu, kayi muanji kusombamu, apingane kuende. Bualu badi mua kumushipa mu mvita, muntu mukuabu kuvua kuangata nzubu awu.

⁶ Pikala muntu wa munkatshi muenu mukune mitshi ya mvinyo, kayi muanji kupolaku bimuma bia tshianyi, apingane kuende. Bualu udi mua kufua mu mvita, muntu mukuabu kuvua kupola bimuma abi.

⁷ Pikala muntu wa munkatshi muenu mubangile mukaji, kayi muanji kumubuelela mu nzubu, apingane kuende. Bualu udi mua kufua mu mvita, muntu mukuabu kuangata mukaji awu.”

⁸ Pashishe balombodi ba bena mvita nebambe kabidi ne: “Pikala muntu kayi ne muoyi mukole, utshina, mbimpe apingane kuende. Bualu udi mua kupumbisha bakuabu mua kuluangana.”

⁹ Pajikija balombodi ba bena mvita abu mayuki awu, nebasungule muntu ku tshisumbu tshionsu bua kulombolaye bakuabu.

¹⁰ Bua kuluisha tshimenga kampande, nudianjile kulomba bena tshimenga atshi bua kubuelamu tshianana, kakuyi mvita to.

¹¹ Pikala bena tshimenga atshi bitabe, banunzuluile biibi bia tshimenga, nebanukuatshile mudimu. Nenubenzeje midimu ku bukole.

¹² Kadi pikalabu basue mvita, babenge bua nuenu kubuela mu tshimenga tshiabu, nuele tshimenga munkatshi ne tshiluilu.

¹³ Padi Maweja-Nangila Mvidi Mukulu wenu unuambuluisha bua nutshikuate, nushipemu bantu balume bonsu.

¹⁴ Kadi, bakaji, bana, bimuna, ne bintu bionsu bidi mu tshimenga atshi, nubiangate, nuenza nabi munudi basue. Bualu bintu bia baluishi benu mbintu bidi Maweja-Nangila Mvidi Mukulu wenu munupeshe.

¹⁵ Ke munudi mua kuenzela bimenga bionsu bidi kule, kabiyi mu ditunga dinuasomba.

¹⁶ Kadi mu bimenga bia mu ditunga didi Maweja-Nangila Mvidi Mukulu wenu munupe bua nudikuate, nenushipemu bantu bonsu, kanuyi nushiya nansha umue ne muoyi.

¹⁷ Bena Iti, bena Amore, bena Kenaane, bena Perizi, bena Ivi ne bena Yebusa, nenubashipe bonsu, muvua Maweja-Nangila Mvidi Mukulu wenu muambe.

¹⁸ Bualu bantu aba, badi mua kunulongesha buenzayi, budibu benza bua kusankisha mvidie yabu. Nuenu balonde buenzayi ebu, nudi nuenzela Maweja-Nangila Mvidi Mukulu wenu bibi.

¹⁹ Nuenu bele tshimenga munkatshi matuku a bungi, kanuyi ne mushindu wa kutshikuata, kanupudi mitshi ya bimuma to. Bualu mitshi eyi, kayena bu bantu banudi nuluisha to. Nanku nudi mua kudia bimuma biayi. Kadi kanukosu mitshi to.

²⁰ Kadi mitshi idi kayiyi ikuama bimuma bia kudia, nudi mua kuyishimbula, kuenza nayi miaba ya kuimanyina, bua numone mua kukuata tshimenga atshi bimpe.