Dielulula 16 - MUKANDA WA MYIDI MUKULU

Tshibilu tshia Dipita dia Maweja-Nangila

¹ Nuenu bena Izrayele, nuvuluke mua kuenzela Maweja-Nangila Mvidi Mukulu wenu tshibilu tshia Dipita diende, mu ngondu wa Abibe wa tshidimu tshionsu. Bualu Maweja-Nangila mmunupatule mu Ejipitu anu mu ngondu awu butuku.

² Nanku nyama ya mu bikumbi inudi mua kulambula mu tshibilu etshi nyoyi eyi: ngombe, mikoku ne mbuji. Kadi nuyilambule anu muaba wikalaye musungule bua nuenu kumonangana nende.

³ Matuku malondangane muanda mutekete mu didia dia tshibilu, kanuena mua kudia mampa mela buanga. Panudi nudia mampa kaayi mela buanga nanku, nenuvuluke dituku dinuvua bapatuke ne lubilu mu Ejipitu.

⁴ Matuku awu onsu muanda mutekete, kanuena mua kulama buanga bua mampa mu ditunga dienu dijima. Munyinyi wa nyama unu-vua balambula Maweja-Nangila dilolu dia dituku dia kumpala, nuudie, ujika anu dituku adi.

⁵ Kanuena mua kuenzela tshibilu tshia Dipita dia Maweja-Nangila Mvidi Mukulu wenu, mu bimenga bionsu bikalaye munupa bua kusomba to.

⁶ Kadi nudi mua kulambula milambu eyi, anu mu tshimenga tshikala Maweja-Nangila musungule bua nuenu kumonangana nende. Nuyilambule dilolu diba dimane kubuela, bualu ke diba dinuvua bapatuke mu Ejipitu.

⁷ Nulambe munyinyi awu, nuudile muaba wikala Maweja-Nangila musungule. Mu dinda, nupingane ku nzubu yenu.

⁸ Nuenu bena Izrayele, matuku malondangane asambombu kanuena mua kudia mampa mela buanga. Dituku dia muanda mutekete, nudisangishe bua kutendelela Maweja-Nangila Mvidi Mukulu wenu. Kanuena mua kuenza mudimu dituku adi to.

Tshibilu tshia Dinowa dia biakudia

⁹ Kutuadija dituku dinuvua nubanga kunowa biakudia bienu, nubadike mbingu milondangane muanda mutekete.

¹⁰ Pashishe nuenze tshibilu tshia Dinowa dia biakudia, bua kutendelela Maweja-Nangila Mvidi Mukulu wenu. Nufile milambu ya ku budisuile, bilondeshile bionsu bidi Maweja-Nangila munuenzele.

¹¹ Nuye ku nzubu wikale Maweja-Nangila musungule bua nuenu kumonangana nende. Muaba wa tshijila awu, nuenu bena Izrayele, nusanke ne bana benu, bena midimu benu, bena Levi, benyi banudi nabu, bana ba nshiya, ne bakaji bakamba badi munkatshi muenu.

¹² Nuvuluke ne: nuvua bapika mu ditunga dia Ejipitu. Nanku nukumbaje mikenji eyi yonsu.

Tshibilu tshia tuzubu tua Bisasa

¹³ Nuenu bamane kushipula ntete ya kuenza bukula, bamane kukama kabidi tumuma tua mvinyo, bajikije, nuenze tshibilu tshia tuzubu tua Bisasa matuku muanda mutekete malondangane.

¹⁴ Nanku nuenu bena Izrayele bonsu, bana benu, bena mudimu benu, bena Levi, benyi banudi nabu, bana ba nshiya, ne bakaji bakamba badi munkatshi muenu, nusanke bua tshibilu etshi.

¹⁵ Nuenze tshibilu etshi matuku muanda mutekete, bua kutendelela Maweja-Nangila Mvidi Mukulu wenu. Nutshienzele anu muaba wikalaye musungule. Nusanke bikole, bualu Maweja-Nangila neanuvudijile biakudia bia bungi mu madimi enu. Neanusankishe kabidi mu bionsu binudi nuenza.

¹⁶ Ku tshidimu tshionsu, bantu balume bonsu badi munkatshi muenu, nebadileje kudi Maweja-Nangila misangu isatu, muaba wikalaye musungule, bua tshibilu tshia mampa adi kaayi mela buanga, bua tshibilu tshia Dinowa biakudia, ne bua tshibilu tshia tuzubu tua Bisasa. Kadi muntu kafiki mu nzubu wa Mvidi Mukulu wenu kayi ne tshintu tshia kumulambula to.

¹⁷ Muntu yonsu neafike ne mulambu, bilondeshile mudimu udiye wenza, ne mushindu wikala Maweja-Nangila Mvidi Mukulu wenu mumuambuluishe.

Mikenji ya dikosa dia bilumbu

¹⁸ Mu bimenga bionsu bikale Maweja-Nangila Mvidi Mukulu wenu munupe bua kusomba, nusungule balumbuluishi ne bulombodi, badi mua kulumbuluisha bantu bonsu ba mu bisamba bienu, kakuyi kansungansunga.

¹⁹ Kanunyangi tshilumbu tshia muntu. Kanubingishi muena tshibawu. Kanuangatshi tshintu tshia mabuejila. Bualu tshintu tshia nanku, tshidi tshiumbusha mulumbuluishi, nansha yeye muntu wa meji, ku ba muanda, tshimutuma ku ba wetu, bua kunyangaye bilumbu bia bantu.

²⁰ Nuenze muenu muonsu bua kulumbuluisha bantu bimpe. Nanku nenukuate ditunga didi Maweja-Nangila Mvidi Mukulu wenu munupe, nushalemu ne muoyi.

Ditendelela dibi

²¹ Kanuena mua kuasa dikunji, nansha kukuna mutshi, bua kutendelela mvidie mikuabu, pabuipi ne tshilambuilu, tshinudi benzela Maweja-Nangila Mvidi Mukulu wenu to.

²² Kanuena mua kuimanyika dibue dia kutendelela mvidie muaba awu to. Bualu Maweja-Nangila kena musue bintu bia mushindu awu to.