Dielulula 15 - MUKANDA WA MYIDI MUKULU

Tshidimu tshia kulekelangana mabanza

¹ Padi bidimu muanda mutekete bikumbana, nuikale nulekelangane mabanza onsu anudi nawu.

² Mabanza awu nulekelangane mushindu ewu: padi tshidimu tshikumbana tshia kulekelangana mabanza mu dina dia Maweja-Nangila, bantu bonsu bavua basombesha bana babu makuta, kabena mua kunana makuta awu to. Kabidi muntu kena mua kutatshisha muanabu bua kufutaye dibanza adi to.

³ Panudi nusombesha muenyi makuta, udi mua kunupingajila. Kadi muanenu kena ne bua kunupingajilawu to.

⁴ Kadi Maweja-Nangila Mvidi Mukulu wenu, neanuambuluishe, bua nupete bintu bia bungi mu ditunga didiye munupe. Nanku munkatshi muenu kamuakuikala bapele to,

⁵ panuikala bitabe meyi ende, bakumbaje mikenji yende yonsu indi nnuambila lelu eyi.

⁶ Pikala Maweja-Nangila Mvidi Mukulu wenu numusankishe ne bintu, bu nuwuaye mulaye, kanuakusomba makuta kudi muntu to. Kadi nuenu nenusombeshe bantu benyi ba bungi makuta. Kabidi nenuikale bamfumu ba bisamba bia bungi, kanuyi penu ku bumfumu bua tshisamba nansha tshimue.

⁷ Pikala muntu mupele munkatshi mua bana benu, mu tshimenga tshia ditunga dianupesha Maweja-Nangila Mvidi Mukulu wenu, unusomba tshintu, kanumuiminyi to.

⁸ Numusombeshe ne muoyi muimpe tshionsu tshidiye ukengela.

⁹ Nudimuke. Kanuikadi ne meji mabi a ne: tshidimu tshia muanda mutekete tshia kulekelangana mabanza tshidi pabuipi. Kanutatshishi muanenu mupele bua bualu abu. Kanumupadi tshintu tshidiye ulomba. Bualu yeye mudidile Maweja-Nangila, nenuikale bena tshibawu.

¹⁰ Nanku nuikale ne muoyi muimpe, nusombeshe mupele tshintu tshidiye ulomba. Nuenu benze nanku, Maweja-Nangila Mvidi Mukulu neanusankishe mu bionsu binudi nuenza.

¹¹ Mu ditunga dienu nemuikale bapele misangu yonsu. Ke pandi nnuambila ne: nuikale ne muoyi muimpe. Nuvuluke bana benu bapele, ne bena dikenga badi munkatshi muenu.

Kupikula bapika

¹² Pikala muanenu muena Ebrewu, mulume nansha mukaji, musue kudisumbisha bu mupika kuudi, akukuatshile mudimu anu bidimu bisambombu. Kadi tshidimu tshia muanda mutekete, neumulekele, aye.

¹³ Kumulekedi uya, kayi ne tshintu.

¹⁴ Umupeshe bintu binuikala bapeta kudi Maweja-Nangila Mvidi Mukulu wenu: mikoku, mbuji, ntete ya kuenza bukula. Umupeshe kabidi ne maluvu a mvinyo.

¹⁵ Nuvuluke ne: nuvua bapika mu ditunga dia Ejipitu. Maweja-Nangila Mvidi Mukulu wenu kunupatula. Ke pandi nnupesha mukenji ewu mpindiewu.

¹⁶ Pikala mupika mulume anyi mukaji mununange nuenu ne bena diku dienu, ubenga mua kumuka, bualu udi musombe bimpe,

¹⁷ munuimanyike ku tshiibi tshia nzubu. Nuangate mulonda, numutubule ditshi, bua ashale mupika wenu too ne ku lufu luende.

¹⁸ Kanuikadi ne kanyinganyinga bua kupesha mupika budikadidi to. Bualu bidimu bisambombu bidiye munuenzele mudimu, mmunupeteshe bintu bia bungi, bipite misangu ibidi binuvua mua kupeta kudi muena mudimu unudi nufuta. Nanku mupika apete anu budikadidi, bua Maweja-Nangila Mvidi Mukulu wenu anusankishe mu bionsu binudi nuenza.

Bamuanabute ba bimuna

¹⁹ Bamuanabute balume bonsu, ba ngombe, mikoku ne mbuji yenu, nubajidile mu dina dia Maweja-Nangila Mvidi Mukulu wenu. Muanabute mulume wa ngombe, kanuena mua kumuenzeja mudimu to. Kabidi kuena mua kukosa miosa ya muanabute wa mukoku.

²⁰ Ku tshidimu tshionsu, nudie munyinyi wa bimuna ebi ne meku enu, muaba wa tshijila wa Maweja-Nangila Mvidi Mukulu wenu, mu nzubu wikalaye musungule.

²¹ Pikala tshimuna tshimue tshia ku bimuna ebi tshitebuke, tshifua disu, nansha ne bulema bukuabu pambidi, kanuena mua kutshilambula Maweja-Nangila Mvidi Mukulu wenu to.

²² Munyinyi awu, nudi mua kuudila ku nzubu yenu pamue ne bantu bonsu, badi ne mikiya nansha badi kabayi nayi, anu bu munudi nudia munyinyi wa kabuluku nansha wa ngulungu.

²³ Kadi misangu yonsu, kanudi mashi a tshimuna to. Nualekele, apueke panshi bu mayi.